Декабрьданул 23-нний МахIачкъалалив Р. ХIамзатовлул цIа­нийсса Миллатрал библиотекалуву хьунни жагьилтурал культуралул сиптардал Республикалул цалчинсса форум «Вдохновение гор – 2016».

Бадрижамал Аьлиева
Форумрал даву дайдихьлай, ДР-лул культуралул министр Зарема Буттаевал кIицI лавгунни хIакьину жагьилтал культуралухух гьан баву тIайла дурну дикIан аьркиншиву рувхIанийсса хазнардахух лагаврийн, обществалул лаг­рулий хъуннамур ва жагьилмур никирттал дянивсса диалог щаллу баврийн. Министрнал дакIнийн дуртунни уттигъанну Дагъусттаннал БакIчинал ва республикалул жагьилтурал активрал дянив хьу­сса хьунабакьаву.
— Муний мяълумну, яргну чIалачIи бувну бия хIакьинусса форумрал вирдакIну хъана­хъисса суаллу: «Дагъусттаннал цIушиннардаву циксса жагьилтал гьуртту хъанахъиссар? Чув дур жагьилтурал сиптарду?». Хъанахъисса дахханашивур­ттавух гьуртту хьун Республикалул БакIчинал жагьилтурайн оьвтIутIаву – му жагьилтурансса ххаллилсса ресурсри, – увкунни министрнал.
Гихунмай бувсунни республикалул муниципал сакиншиннардий ялапар хъанахъисса жагьилтуращалсса ва оьрчIащалсса зузаврил платформану, Республикалул БакIчинал бигарданийн бувну, Аьрасатнал халкьуннал аслийсса культуралул центрдай тIивтIушиву жагьилтурал секторду «Наследники», микку бувайшиву личIи-личIисса темардайн багьайсса ихтилатру, дарсру, ветерантуращалсса хьунабакьавуртту, концертру, халкьуннал творчествалул фестиваллу. Министрнал дакIнийн бувтунни Дагъусттаннай щаллу дуллалисса, республикалул цинявппагу дуклаки оьрчIансса проектрая – «Культура – детям Дагестана» украсса абонементрая, цийн бувнугу оьрчIру ва чIава жагьилтал жула ва щалагу дунияллул миллатрал искусствалухух машхул буллалисса. Му проект щурущи дурсса 3 шинал мутталий мунил давривух гьуртту хьуну бур сайки 20 азаруннийн бивсса оьрчIру. Му давривухгу хъуннасса гьурттушинна дурну дур волонтертурал – «Я Помощник Президента» жагьилтурал суккушиндарал активистътурал ва «Единая Россия» политикалул партиялул молодогвардейцынал.
— Республикалул личIи-личIи­сса районная ва шагьрурдая бувкIсса оьрчIал группарду аьркиннийн тIайла буллай, волонтертал цивппагу хъунмасса гъирарай буруглай бия театрал постановкардах, выставкардах, музыкалул лекториярттах, — увкунни Зарема Буттаевал.
КIицI лавгунни жагьилтурал бигьалагавриву хъунмасса кIану бугьлай бушиву киноискусствалулгу, ялату нанисса шинал респуб­ликалий хьушиву личIи-личIисса кинофестиваллу ва акциярду. Бувсунни республикалий, жува заллусса киностудия бакъанугу, ласлай бушиву личIи-личIисса фильмру, гьунар бусса жагьилтурал сиптардайн бувну.
— Федерал целевой программардайн заявкарду дуллуну, федерал чIаравбацIаврийну щаллу дуллай бур мукунсса давуртту. Жугу хIарачат буллай буру жула ведомствалия хъар шайсса кумаг буллан миннан. Масалдаран, жагьилсса режиссер МахIаммад Казиевлул жул чIарав бацIаврийну Каннардай ккаккан дунни цала ларсъсса короткометражный фильм «Кровь». Жагьилсса режиссер Арслан Мирзабековлул цала дустуращал ларсъсса «Кизяк – добро, кизяк – тепло» цIанилусса короткометражный художественный фильмрал презентация хьунни…
Цила ихтилатрал ахирданий министрнал оьвчаву дунни жагьилтурайн:
— Искусствалух луглагияра мяйжаннугу му дусса кIанттурдай – концертный заллаву, театрдаву, музейрдаву, творчествалул сообществардаву. Малугларди искусст­валух му дакъаний…
Хъирив ихтилат бувсса Да­гъусттаннал жагьилтурал ишир­ттал министр Арсен ХIажиевлул чIурчIав дунни махъсса шиннардий республикалул каялувшиндарал хъуннасса къулагъас дуллай бушиврий жагьилтурал политикалух, вай гьантрай хьусса респуб­ликалул парламентрал сессиялий кьамул дуршиврий жагьилтурал политикалиясса закон.
— Ва иширал дакI ххари къадуллай дакъар, цанчирча махъра-махъ укунсса закон 1997 шиналъя кьамул дурсса. Ялун нанисса шинал жагьилтурал политикалун­сса бюджет дур ва ялату нанисса шинал бюджетраяр 15-лла лахъсса. Жул давриву диялдакъашивуртту дунугу, республикалул каялувшиндарал итталун багьлай бур хIаз-хIазсса проектру щаллу давриву жу буллалисса хIарачат, — увкунни республикалул жагьилтурал бакIчинал.
Ихтилатру мукунма бунни Дагъусттаннал паччахIлугърал филармониялул художествалул каялувчи Ирина Нахтигальлул, «Дербент 2000» волонтертурал корпусрал вакил Гюльшад Шихкеримовал, «Молодежный центр культуры» ГКУ-лул директорнал хъиривчу Арсен ЛухIуевлул, мукунма цайминналгу.
Гихуннай форумрал даву лахъи ларгунни секциярдай. Му кьини мукунма зий бия выставкалул майданну, «Свободный микрофон», буллай бия мастер-классру.
Форумрал хIасиллайн бувну кьамул дунни резолюция.