КIира мусил ва ца чарвитул медаллу дурххунни Дагъусттаннал боксрайн заназисса душварал Болгариянал хъуншагьрулий ноябрьданул 14-нния 23-ннийнин хьусса боксрал Европанал чемпионатрай.
София шагьрулий ацIулчин хьусса континентрал чемпионатрай гьуртту хьуну бур 150 спортсменкахъул, ххув хьуну дур Аьрасатнал команда.
Мусил медаллу ларсун дур Зенфира МахIаммадаьлиевал, га буклай бивкIссар 82 килорал кIушиврий Аьрасатнал командалухлу, Елена Выстроповал мусил медаль ларсун дур 69 килорал кIушиврий Азирбижаннахлу ччалли бувккун.
Земфира цалчин ххув хьуссар Европанал чемпионатрай. ТIиларатIиял райондалиясса душ бачIифиналданий ххув хьуну бур Азирбижаннаясса Айнур Рзаева тIисса душнияр, финалданий тIурча ххув хьуну бур Польшанавасса Силвия Кушяклуяр. Земфира уттинин хьуссар Аьрасатнал ва дунияллул чемпион. Софиялий Елена Выстропова кIилчин хьуссар Европанал чемпион, цалчинмур мусил медаль ванил ларсун диркIссар ванияр 5 шинал хьхьичI хьусса Европанал чемпионатрай. Ва душ мукунма гьуртту хьуссар Олимпий тIуркIурдавухгу. Выстроповал уттинингу дунияллул чемпионатирттай ларсун диркIссар арцул ва чарвитул медаллу.
Ва Софиялий хьусса Европанал чемпионатрай чарвитул медаль ларсун дур 69 килорал кIушиврий Сааьдат Аьбдуллаевал, ва бух хьуну бур бачIифиналданий Елена Выстроповаяр.
