Декабрьданул 14-нний республикалул журналистътуращал хьунаавкьунни Дагъусттаннайсса Национальная гвардиялул аьралуннал управлениялул каялувчи полковник МахIаммад Баачилов. Пресс-конференциялийн ганащал бувкIунни Баачиловлул хъиривчу Константин Тамилин ва кадрардал отделданул хъунама Натик Балабеков.
ХIасан Аьдилов
МахIаммад Баачиловлул бувсмунийн бувну, Аьрасатнал Национальная гвардиялул аьралуннал управление ва муниву Дагъусттанналмур Управлениягу сакин бувссар 2016 шинал апрельданул 5-нний Виваллил аьралуннал (Внутренние войска) гьанулий. Национальная гвардиялувун буххан бувну бур мукунма хьхьичIва МВД-луву бивкIсса ОМОН, СОБР, хасъсса авиациялул отряд ва вневедомственная охраналул управление. Апрельданул 1-нния октябрьданул 1-нин Национальная гвардиялул управление щаллу хъанай бивкIссар. Октябрьданул 1-нния шинмай зун бивкIссар цайнува цуппасса подразделение кунма. Управлениялуву цими инсан уссарив Баачиловлул къабувсунни.
Управлениялул хъунаманал бувсунни га подразделениялул хьхьичIсса масъаларттая. Миннувату яла агьамми хъанай бур АьФ-лий конституциялул низам щаллу даву, террордащалсса талатаву, кьатIатусса ва виватусса нигьачIаврищалсса талатаву, ляличIину агьамшиву дусса стратегиялул объектру буруччаву, битай ярагъ машай буккан баврил ялув бацIаву. Управлениялул биттур буллалиссар Аьрасатнал Виваллил иширттал министрнал управлениялул хьхьичI бивхьусса масъалартту, ФСБ-лул оператив штатрал управлениялул хьхьичI бивхьусса масъалартту.
Национальная гвардиялул управлениялул каялувчинал хъиривчутурал бувсунни цайвасса буржру биттур баврил хIакъираву.
Яла миннал жавабру дуллунни журналистътурал суаллахьхьун.
