Декабрь зурул 16-нний Динийсса идарарттащал зузисса комитетрал (Дагкомрелигиялул) 25 шин шаврил юбилей дунни Миллатирттал политикалул министерствалул конференц-залдануву.
П. Рамазанова
Юбилей барча дуван бувкIун бия республикалул вице-премьер Рамазан Жяъпаров, тIабиаьтрал ресурсирдал ва экологиялул министр Набиюлла Къарачаев, жагьилтурал иширтталсса буллалисса министр Арсен ХIажиев, ххуллурдал хозяйствалул агентствалул хъунама Загьид Ххучбаров, Миннацрал бакIчинал цалчинма хъиривчу Гьарун Давидов, Республикалул ХIукуматрал ва БакIчинал Администрациялул вакилтал, мукунма муфтиятрал, РПЦ-лул МахIачкъалаллал епархиялул ва Дагъусттаннал ягьудинал ккурандалул Советрал вакилталгу. Юбилейрал мероприятиялул дайдихьу дуллалисса махъ лахълай, Дагкомрелигиялул председатель МахIаммад АьбдурахIмановлул бувсунни цува каялувшиву дуллалисса комитет хIасул бувну 25 шин хьушиву, личIи-личIисса цIарду диркIхьурчагу комитетран, бигарду ва буржру гайва-гай бивкIшиву, хIакьинусса кьинигу хьхьичIрасса шиннардийсса опытрайн чул бивщуну зий бушиву личIи-личIисса динну дуллалиминнал дянив нахIушиву ядаву мурадрай. ХIукуматрал Председатель Рамазан Жяъпаровлул кIицI лавгунни хъунмасса штат бакъахьурчагу бунияласса давурттив дуллай бушиву Комитетрал зузалт, циняв диннал вакилтуращал уртакьну зий бушиву. Комитетрал зузалтран дуллунни паччахIлугърал наградартту.
