Цирив ца ссихIир бур вай цIусса шин ялун нанисса, духмур къуртал хъанахъисса гьантраву. Ци баларду ливксса шин яла най дунугу, ялун нанимуниву чара бакъа тирхханнугу, талихIгу бикIан аьркинсса кунма чIалан бикIай. Мукун хьугу шайхьунссар. Оьмунищал хъачI-хъачIну хъинмургу бурхха оьр­мулуву. Хъинмунийн­сса умудрал гъилишиву дакIниву дакъахьурчарив, оьрмулул мяънарагу дакъар.

Вана жувагу цIунилгу духсса ва цIусса шиннал дазуй бавцIуну. Дакъая ва шин бигьасса. ДакI тирх учинсса ялун нанисса шиная баяймургу бакъар. ЗахIмат биялсса бишин багьлай чIалай бур. Вардишрухха. Уттигу яхI банну. Гьарнангу захIматсса ппурттуву хъинну кIусса гьиву ялун диллай дур жула миллатрал кказитрайнгу, кказит­рал коллективрайнгу. Итадакьлакьисса хIукуматрал арцу гьашину тачIав дакъачIин чанну итадакьлай бия. ДукIу кунма, гьашинугу декабрь зурул харж къалавсна хьунадакьлай буру ЦIусса шин жугу. ХIукуматрал ххазна ссуссукьу хьуну бур. Вай цинярдагу шиннардий кказитрал чIарав бацIлай бивкIминнал каши-кьудратгу мадара чан хьуну чIалай дур. Ссавур данну да, барачат ххи хьуннин. Лахъанну ва кьинигу. Амма кказит буруччин жува буржлувссару, цукунчIавсса чIумул захIматшиврух къабурувгун. Цанчирча, ва канища итадакьин бучIисса, ягу замана баххана хьуну, ларгния буллугъшиврущал зана ритан шайсса хъус дакъа тIий.
Цимил тикрал барчагу мяъна ссукъассайсса зат – кказит, театр – му щалагу миллатран аьм­сса, щалагу миллатрал дуруччин аьркинсса, буржлувсса хъу­­с-ххазинар. Ца редакциялуща, гьарма ацI-ацIра бакI дусса ухьурчагу, му буруччин къашайссар. Укун кьини дурккун, захIматшиврувун багьсса чIумал хаснува циняв хIала буххан аьркинссару, агарда жува миллатру тIий бухьурча. ЧIарав бацIан аьркинссару циняв. Гьарная чIиви-чIивисса кумаг биярча, биялсса гужгу, цIакьгу аьмну салкьи хьунтIиссар. Гьарун Саэдовлуя ва га кунма «аьзизсса миллат­ран хъинбала буван» дакI ххядук­лай бивкIсса уздантурая бивсса ва миллатрал рувхIанийсса ххазина ябуллай жугу, я бюджетрал ссуссукьушиврух ягу жуйнна дуклакисса кьинилул захIматшиврух буруглай бакъару, «Илчилул» оьрму абад буллай. Ва зулгу цинявннал цIанийсса захIматри. ЧIарав бацIияра зугу. Гьарцагу лаккучура тIисса инсан. Тасттикь бара зува лак бушиву. «Илчилул» журналистътуран кIулну, асар хъанай бикIан аьркин­ссар, жула чIарав жулла дакI дан­сса, яхI бара, жучIа зул захIматрал кьадру буссар, зу бакъа чара ба­къассару тIисса миллат бушиву. Ма мяш шару ва кказитрах дулунсса чIяру дакъасса арцуй. Ми къурушру махъун щун дурну, зу авадан къахьунссару. Амма кказит буруччин­ссар. Маз кказитрайвагу яхьунссар. Чичара «Илчи» зувагу. Чича учара зула махъ баяйнахьгу. Чича учара ниттил маз къакIулнахьгу. Кказит къабуккайнахьгу. Бувккумур къа­ххуй бизай тIинахьгу. Буруччияра «Илчи». Жула оьрчIайнгу, оьрчIал оьрчIайнгу бияншиврул жула нахIува-нахIусса, нацIува-нацIусса ниттил мазрал ххазина. Кказит буруччаву миллат буру­ччаврин ккаллиссар хIакьину. Эбрат ласияра жула аьрасатнал элмулул пахруну хъанахъисса, дунияллийх цIа машгьур дурсса Рауф Мунчаевлуя ва МахIаммад Дандамаевлуя, интернетравугуния буккин хьун­ссар вища му «Илчи» увкукун, «Юх. Му ттула кIунттил бувгьуну буккин ччай бур» тIий, жучIаванияр кIи-шамлий ххирану хъуни шагьрурдайн шаппайн «Илчи» тIалав буллалисса.
Уттирив – барча ЦIусса шин! Барачатращал, бах­тти-талихIращал, цIуллу-цIакь­­шиврущал, нахIу-хIалимшиврущал, тирххандаращал, буллугъшиврущал духханнав зул ужагърайн ЦIусса шин.
«Илчигу» ххуй-ххуйсса хавардащал чан къабаннав зул тIювай.
Качар ХIусайнаева