Республикалул УИС-рал идарартту арцул ва аьркинсса техникалул дузал баврил масъалартту ххал бивгьунни 7-мур исправительный колониялий хьусса тыловиктурал семинар-совещаниялий. Шикку гьурттушинна дунни УИС-рал къинттуллухсса подразделениярттал каялувчитурал.
— Республикалул УИС-рал къинттуллухсса службардал гьарица аьркинмунил щаллу буллалиссар зузалт ва спецконтингент. ЦIанакул зий буру пландалий ккаккан дурсса, дуки-хIачIиялул ва ичIура аьркин данмунил жулва жува дузал буллансса давурттаха. Уттинингу му чулухуннай дурсса давурттив чансса дакъар, — тIий, буслай ур Дагъусттаннал УФСИН-лул хъунаманал хъиривчу, виваллил службалул подполковник Рамазан Камалуттинов.
Семинар-совещаниялий мукунма ихтилат хьунни дуснакь бувми дуки-хIачIиялул, лаххи-ликкиялул ва чара бакъа аьркинмунил дузал баврил хIакъиравусса закондалуву хьусса дахханашивурттая. Дузалшиннаралсса байсса отделданул хъунама, виваллил службалул подполковник Муртузааьли Иминовлул бувсунни дуки-хIачIиялул нормардая ва рациондалия, мукунма тахсир хьушиврий щак тIий ягу тахсирлув буллай УИС-рал идарарттай щябивкIми дукан баврил низамрая.
ДР-лул УФСИН-лул пресс-служба
