Декабрьданул 24-нний МахIачкъалаливсса Дусшиврул къатраву гьашину хьхьичIунсса кIанттурду бувгьуми спортсментуран дуллунни «Спортсмен года» тIисса премияртту. Укунсса наградартту цалчин дуллуну диркIссар 2015 шинал. Му награда дулайссар 14 шинавату 35 шинайннинсса оьрмулул спортсментуран. Награда дулаврил сиптачину хьуссар МахIачкъалаллал администрациялул спортрал, туристшиврул ва жагьилтурал иширттал комитет.
ХI. Аьдилов
Наградартту дулаврий гьуртту хьунни МахIачкъалаллал бакIчи Муса Мусаев, ганал 1-ма хъиривчу Аьбдулмуъмин Ибрагьимов, вице-мэр Запир Алхасов, Халкьуннал Мажлисрал, ПаччахIлугърал Думалул депутатътал, цIа дурксса спортсментал, СМИ-рдал вакилтал ва цаймигу.
БавтIминнахь аьла-ссалам буллалисса махъ лавхъунни шагьрулул бакIчинал.
Яла спортсментуран дуллунни наградартту 8 номинациялий.
«Прорыв города» тIисса номинациялий ххув хьуну бур (14-18 шинну) Темирлан Рамазанов, Алина Хидирбекова, Жабраил Камаев, Руслан Аьлиев, Руслан ХIасанов, Жамбулат Бижамов, Оьмар Кьурбанов. Миннан наградартту дуллунни лачIун буккаврил лайкь хьусса спортрал мастер, олимпий чемпион Загъалав Аьбдулбековлул ва Дагъусттаннал лачIун буккаврил федерациялул президент МахIаммадхан Арациловлул.
«Лучшие спортсмены по неолимпийским видам спорта» тIисса номинациялий ххув хьуну бур РахIим Аьмаев, Кьурбан ХIажиев, Руслан ХIасанханов, Аьли МахIаммадов, МахIаммад Анкалаев, Жабир Аскеров. Миннан наградартту дуллунни АьФ-лул ПаччахIлугърал Думалул депутат Юрий Левицкийл ва ДР-лул захIматрал инспекциялул каялувчи Арсен Булатовлул.
«Лучшие спортсмены с ограниченными вохможностями» тIисса номинациялул наградартту дуллунни Шамил Исакьовлун, Мадина Казакован, Ферзали Жамиевлун, Аьбдуллагь КIурамахIаммадовлун, Тимур Аьлиевлун, Бийсултан Абакаровлун, Юсуп Юсуповлун, Мариян Салимгерееван, Расул Назировлун.
«Лучшие организации» тIисса номинациялий МахIачкъалалив студентътурал журалул спорт хьхьичIунмай баврихлу наградартту дуллунни МахIачкъалаллал Промышленный колледжран, Финансово-экономический колледжран.
«Лучшие спортивные федерации, общественно-спортивные организации и учреждения» тIисса номинациялий ххув хьуну бур ХIажимурад МахIаммадрасулов, ХIажимурад МахIаммадов, ттучан «Спортлидер», спортрал клуб «Армор».
Яла Аьрасатнал хIала-ккаласса данди-буккавурттал ию МахIаммад Маликовлул наградартту дуллунни физкультуралул ва спортрал давриву хъунмасса захIмат бивхьуминнан: Рамазан Рамазановлун, ГъазимахIаммад АхIмадовлун ва Александр Маркаровлун.
Муния махъ «Лучшие по олимпийским видам спорта» номинациялий наградартту дуллунни МахIаммад Ибрагьимовлун. Дарья Шистерован, Шамил КIудиявмахIаммадовлун, Милана Дадашеван, Земфира МахIаммадаьлиеван ва МахIаммад Кьурбанаьлиевлун.
Дагъусттаннал спортраву 2016 шинал тамансса хьхьичIуннайшивуртту даврихлу наградартту дуллунни тхеквандорал Олимпиадалул чемпион, спортрал лайкь хьусса мастер Радик Исяевлул ва UFC-лул профессионал ию ХIабиб НурмахIаммадовлун.
«Спортсмен года» номинациялий ххув хьуманан ккалли увунни 2016 шинал Олимпиадалул чемпион хьусса Аьбдурашид Садуллаев.
