Декабрь зурул 2-нний Дагъусттаннал паччахIлугърал университетраву хьунни гьар шинах шайсса отличниктурал слет.

Дуккавриву хьхьичIунсса ва университетрал оьрмулуву чялишну гьурттушинна дуллали­сса студентътал барча бунни республикалул вице-премьер Екатерина Толстиковал, ДР-лул элмулул ва образованиялул министр Шагьаьппас Шагьовлул, вузрал ректор Муртазааьли Рабадановлул.
Ванал бувсунни гьашину вузран 85 шин хъанай душивугу. «Жулва пахрулунсса выпускниктал чансса ба­къар, олимпи чемпион Аьбдурашид Садулаев, ятIул дипломращал университет къуртал бувсса Аьра­сатнал Виричу МахIаммад НурбахIандов ва чIявусса цаймигу. Жува уттиния тинмайгу вузрал хъин-хъинсса аьдатру хIурматрай ядуллантIиссару», — увкунни ректорнал. Ттигъанну вице- премьернал къуллугърай бивтсса Екатерина Толстиковал кIицI лавгунни Да­гъусттаннал университет билаятрал хьхьичIунми вузирдавух ца хху­ттай бушиву. «Университет къуртал бувсса выпускниктал давурттал дузал буваву билаятрал ва хIукуматрал агьамсса масъалари, уртакьну зунтIиссару жува цIу-цIусса проектру бартдигьавриха. Ректорнащал ххал бигьарду университетраву образованиялул ва элмулул медиацентр хIасул буваврил масъалагу, зунтIиссару хьхьичIунсса информациялул ресурсирдащал уртакьну, зу кунма итххявх­сса, гьунар бусса жагьилтал давурттай битавур жулмур мурадгу», — увкунни Екатерина Толстиковал.
Университетрал марцIну ххювардай дуклакисса активис­тал бур гьашину 858 студент. Миннан цинявннан 10 азарда къуруш премиялун дуллунни.