Дагъусттаннал УФСИН-лул дуснакь бувминнащал тарбиялул даву дачин дурсса отделениялул зузалтрал сипталий дуснакьрал соцзащиталул зузалт хьунабавкьунни Ялапар хъанахъисса ца кIану бакъаминнан кумаг байсса республикалул комплексный социал центрданул ва бугьараминнаха ва мушакъатминнаха аякьа дайсса социал центрданул зузалтращал.

УИС-рал идарарттал зузалтращал хьунабакьин бувкIун бия Бугьараминнаха ва мушакъатминнаха аякьа дайсса центрданул отделениялул хъунмур Саида ХIажиева, мура Центрданул юрист ХIусайн МахIаммадов ва Ялапар хъана­хъисса ца кIану бакъаминнан кумаг байсса центрданул социал давриха зузисса пишакар Гульпери Шихамилова.
— Дуснакьрава бувкми вардиш шаврих ва реабилитациялул масъаларттах жула билаятрай, мукунма Дагъусттаннайгу хъунна­сса къулагъас дур. ЛичIи-личIисса багьанттайну захIматсса тагьарданувун багьсса инсантуран цила чIумал кумаг барча, ми тахсиркаршивурттайн кIункIу хьунсса сававртту чан дан хьун тIий дур. ЛяличIисса къулагъас дан аьркин­ссар дуснакьрай щябивкIсса чIумул дянив цала къатта-къушлицIа хьуну, кьатIув ливчIсса инсантурах, — увкунни цала ихтилатраву дуснакь бувминнащал тарбиялул даву дуллалисса отделениялул хъунама, виваллил службалул подполковник Мевлан АхIмадовлул.
Бугьараминнаха ва муша­къат­миннаха къуллугъ буллалисса центрданул отделениялул заведующая Саида ХIажиевал бувсунни социал центрдайн цукун тIайла буккантIиссарив дуснакьрава итабавкьуми бацIансса кIану ххал баврил хIакъиравусса аьрзри, мукунма ванил бувсунни ци документру щаллу бан аьркинссарив. Ми документру биян бан аьркинну бур дуснакь увма итаакьин ца нюжмардул хьхьичI.
Гульпери Шихамиловал бувсунни Центрданийсса шартIирдая ва микку ялапар хъанахъиминнаясса тIалавшиннардая. Хьунабакьаврий бухгалтертуращал архIал ххал бивгьунни дуснакьрава итабавкьуминнан шаппайн­сса электронный билетру ласаврил масъала.
Дагъусттаннал УФСИН-лул пресс-служба
ХIадур бувссар
А. Аьбдуллаевал