Шагьрул арс ХIажиев ХIажи
Вай гьантрай ахиратрал хьунни чIявучин дакIнил лавсъсса, дакI-аьмал аьчухсса, инсаншиву дусса, ххаллилсса зунтталчу, хIакьсса лаккучу, ххишала акъа бусравсса хIакин, ХIажиев ХIажи Шагьрул арс.
Увну ур ХIажи Хъусращиял шяраву. Буттал шяраву хьхьичIунсса хIасиллащал школагу къуртал бувну, 1954 шинал увцуну ур Аьралуннаву къуллугъ буллан, 4 шин дурну дур ХIажинал къуллугъ буллайгу.
Зана хьуну махъ най унува кьамул увну ур Дагъусттаннал медициналул институтравун. ЧIивинияцIава хIакиннал пишалух эшкьи хьусса ХIажи, дуклай унувагу, архIала зий ивкIссар медработникну. 1964 шинал институтгу къуртал бувну бур ЯтIул дипломращал.
ТIайла увккун ур Къалмукьнаву хIакин-терапевтну зун. ЧIал къавхьуну ва ивтун ур терапевтический отделениялул каялувчину.
1969 шиная 2001 шинайн ияннин ва зий ивкIун ур Москавуллал областьрайсса Балашиха шагьрулийсса 2-мур поликлиникалий хIакин-терапевтну. 2001-2004 шиннардий – Москавуллал 87-мур поликлиникалий диагностикалул хIакинну. ХIакиннал пишалий зузиссаксса хIаллай ХIажи Шагьруевич лайкь хьуну ур цикссагу хIурматрал грамотарттан ва къашайшалтрал чулухасса барчаллагьрал чагъардан.
ХIажи ия ичIувагу, кьатIувгу инсантуращал авкьусса, паракьатсса, хъинбала буван чялишсса инсан.
ХIажинал бивкIулул кьурчIишиву кIидачIлай, жижара буллай буру кулпатрахь Бичахь, арснахь Мурадлухь, махъсса гъан-маччанахь, агьлу-авладрахь.
Цал гьав нурданул дуцIиннав, алжаннул ххари аннав, махънал оьрмурдай барачат бишиннав. Амин.
Хъусращиял жямат
ОЬМАРДУЛ АРС ХIАБИБУЛЛАЕВ МАХIАММАД
Ноябрь зурул 23-нний, хар-хавар бакъасса апатI хьуну, жагьилсса оьрмулий, 45 шинаву, аьпалухьхьун лавгунни Уручуллал шяравасса Оьмардул ва Зубайрижатлул арс ХIабибуллаев МахIаммад.
МахIаммад увссар МахIачкъалалив 1971 шинал. Школа къуртал бувну махъ увхссар Москавлийсса Бауманский училищалувун (Технический университет), хъирив миккува аспирантуралувунгу. Дурурччуссар кандидатнал диссертация. Муния махъ зий уссия преподавательну Калугалийсса Бауманский училищалул филиалдануву. Зий унува гьуртту хьуссар США-наву элмийсса кIулшиву лахъ дайсса конкурсраву. Цала сянатрай му конкурсраву ххув хьуну, лавгссар Калифорнийский университетраву элмийсса давриха зун. ХIарачат бусса МахIаммадлул тиккугу дурурччуссар диссертация США-нал куццуй. 2005 шиная шинай, апатI хьуннин, зий уссия цIадурксса Катерпиллар тIисса корпорациялуву элмийсса зузалану.
МахIаммадлул кулпат Наида, Бастаминнул ва ТIагьиратлул душ, Хъусращиял шяравассар, вайннал бур ца душ ва ца оьрчI, мюрщину бунува ятинтал хьунни.
Цибанссар, жуятува хъинну ччяни лавгунни ххаллилсса нитти-буттал арс, уссу, лас, ппу, маччачу, дус.
Хъуннасса кьурчIишиву духIансса ссавур Аллагьнал дулуннав тIий, жижара буллай буру ванал кулпатрахь Наидахь, арснахь Адамлухь, душнихь Беллахь, буттахь Оьмардухь, уссурваврахь, ссурваврахь, агьлу-авладрахь, цинявппагу гъан-маччанахь.
Аьпа баннав ххаллилсса чувнал, ванан къабуллумур оьрчIан, душнин, кулпатран, уссурссуннан булуннав!
Укун язисса бивкIулул кьинирду щинчIав къаккаккаваннав!
Уручуллал, Хъусращиял
жяматрал чулуха
Камил МахIаммадов
ХIажиявл душ
Аьмаева (Аьлиева) ПатIимат (Паша)
Декабрь зурул 4-мур кьини, тамансса хIаллай къашавайгу бивкIун, аьпалувух бивхьунни КIямашрал шяраватусса ХIажиявл ва ПатIиматлул (БатIал) душ Аьмаева (Аьлиева) ПатIимат (Паша).
Паша бувну бур 1954 шинал КIямашав. ГьунчIукьатIрал дянивмур даражалул школагу къуртал бувну, зий бивкIссар «ЯтIул ттугъ» колхозрал накIлил фермалий. Ташулул хьуну махъ лавгссар бявкъусса Анадырдал чуллайн. Тих ласнащал тамансса шиннугу дурну, зана хьуссия МахIачкъалалив. МахIачкъалаливгу зий бивкIссар Приборостроительный заводрай, кIа лакьиннин.
Чув, ци даврий зурчагу, ПатIимат бикIайва чIяву гъалгъа бакъасса, архIал зузинащал бавкьусса, хIалимсса инсан. Цила язи увгьусса шяравучу Сергощал хъуни бувна арс ва душ, утти ххари хъанай буссия душнил оьрчIая. Къабивтунни Заннал, лавгунни, цIуцIаврил зулму ххи хьуну. Душнил, цуппагу духтур буну, букъав дару-дарман къабивтунни нину чанссарагу дунияллий лахъи лаган дан.
Хъуннасса кьурчIишивугу кIидачIлай, жижара буллай буру ниттихь ПатIиматлухь (БатIахь), ласнахь Сергохь, арснахь Алхаслухь, душнихь Аматуллагьлухь, куявнахь Рустамлухь, душнил оьрчIахь, уссихь МахIаммадханнухь, цилвагу, ласналгу уссурссуннахь, агьлу-авладрахь. Махънал оьрмурдай барачат бишиннав, ПатIиматлун бакъамур ванин ххирану бивкIнан булуннав. ПатIиматлул рухI алжаннул ххари даннав, гьав нурданул дуцIиннав. Амин!
КIямашрал жямат
Буккултран дакIнийссар тамансса шиннардил хьхьичI армиялияту къуршилуву лавсун увкIсса, цукун ци хьуссарив цичIав кIул бан къавхьусса, КIямашрал шяраватусса ХIаммадаев Марсел Ажувлул арснал оьрмулул кьурчIисса кьадардания чирчусса макьала.
Вана уттигъаннугу Ажувлун кьюлтI учин багьунни чIавама арснал МахIаммадлул оьлусса кьуругу. КIиягу оьрчIгу цалва биян бувссар гъурбатрая буттал аьрщарайн, цивппа дунияллийн бувксса кIанттай хIавтIливух бишин. Ссавур Заннал дулуннав зухьхьун, Ажув ва ПатIимат! Алжаннул ххари аннав зул кIиягу арс!
Загьрани Аьбдуллаева
МАХIАММАДЛУЛ ДУШ ДИБИРОВА ХАЛУН
Ноябрьданул 25-нний хар-хавар бакъа аьпалухьхьун лавгунни ххишала бакъа дакI-аьмал хъинсса, 1-мур ЦIувкIуллал шяравасса, Дибирова Халун ОьрбакIуйхъал МахIаммадлул душ.
Халун бувну бур 1934-ку шинал 1-мур ЦIувкIуллал шяраву. Ччянива нину-ппугу ливтIуну, ятинну ливчIсса Халуннул оьрчIшивугу ларгссар та чIумалсса цинявннал кунна, кьянатну, захIмат буллай.
Арулва классгу къуртал бувну, зун байбивхьуссар колхозрал давурттай. Яла махъ ласнащал архIал бивзун бур Южно-Сухокумскалийн. Микку Халун зий бивкIун бур «Строительный фирмалий» бригадирну. Махъату зун бивкIун бур шагьрулул 1-мур школалул завхозну. Миччава бувккун бур пенсиялийнгу.
Халун бия гьарца чулуха бювхъусса, дакI-аьмал хъинсса, гьарцаннан ка-кумаг буван чялишсса, жяматран, чIахху-чIарахнан, гъан-маччанан хъинну бусравсса, ххирасса инсан.
Буллай бивкIсса захIматрахлу ва лайкь хьуну бур чIярусса хIурматрал грамотарттан, бахшиширттан. Халун бия дяъвилул ва захIматрал ветеран.
Халуннул бивкIулул кьурчIишивугу кIидачIлай, жижара буллай буру душнихь Равзатлухь, уссурваврахь, ссурваврахь, гъан-маччанахь. Цув Алжаннул ххари баннав, гьаттай нур дизаннав.
Ттула ниттирссин Халуннун хас буллай бура вай ххаругу
Гьарнан бусравсса вил цIа
ЛухIи чарий чирчунни.
Вил исвагьисса чурхгу
Мармарчарийн бувккунни.
Дуваймунил усттаръяв,
Дулаймунил узданъяв.
Учай мукъуй цIу бия,
ТIуллугу ххуйсса дия.
Тухум нур лахъан байсса,
Гъанми хъинну ххирасса,
Жул аькьлулулгу кьуллай,
МаслихIатралгу хьхьирий.
Зий дакъацIайсса кару
Дигьалаглай духьунссар.
ХъункIултIутIив ххяхханнав
ХIатталливсса аьрщарай.
Вил рухI хъинний дишиннав,
Пирдавс Алжан булуннав.
ПатIиматлул пардавлух
ЩябикIан нясив баннав.
Камилат ХIажиева ,
ш. Ваччи
