Бигьалаган оьрчIал лагерьданийн «Артекрайн» лавгсса дагъусттаннал дуклаки оьрчIал аьрххилул бюхъайва миннал дакIру зия дуван, лагерьдания шаппай зана хьуну ххуллий автобус гъавгъукун Кабардин- Балкарнал агьулданул кумаг къабувссания.

П.Рамазанова
Автобус гъавгъун бур федерал трассалий, Урванский райондалийсса Старый Черек тIисса шяравалличIа. Автобусрал водитель зия хьусса автобусралсса буллалиссаксса хIаллай оьрчIру автобусраву бяхълай бивкIун бур. Му иширая хавар хьусса райондалул хъунама Азамат Кошеев цува хъирив увкIун, 63 пассажир аьшвашханалийн бувцуну бур. Микку оьрчIру шеърирду ккалай, ватандалухасса ччаврил асардая буслай бивкIун бур, Урванский райондалул хъунаманал хъиривчуналгу кабардиннал ва балкарнал халкьуннал аьдатирттая, багьу- бизулия бувсун бур .ОьрчIру аьшвашханалуву бигьалаглай бунува, райондалул хъунаманал автобус ремонт бансса бригада лявкъуну зузи бувну бур, муницIухва, автобус бакьин буван къахьурчагу оьрчIру Дагъусттаннайн биян бувансса кIива автобусгу бучIан бувну бур. Автобус бакьин бувайхту, райондалул хъуниминнал оьрчIру хIурматрай тIайла бувккуну бур, оьрчIру шаппай бивну бурив цIухлай, оьвтIий ивкIун ур. Да­гъусттаннал элмулул ва образованиялул министерство барчаллагьрай бур оьрчIан кумаг бувсса Азамат Жабраиловичлуйн. «Ва иширалгу исват бунни Дагъусттаннал ва Кабардин- Балкарнал халкьуннал аьвзал заманная шиннай дусшиврийсса арарду душиву , оьрчIащал аьрххилий хьусса ишгу му дусшиврул ламу цIакь буллалисса ишри, жу барчаллагьрай буру жулва оьрчIаха ххуй­сса аякьа дурсса Азамат Кошеевлуйн ва Кабардин- Балкарнал щаллагу республикалийн»- тIий ур министр Шагьаьппас Шагьов.