Ноябрь зурул 21-нний Миллатирттал политикалул министерствалул конференциярду бай залдануву хьунни аьрасатнал аьмсса граждан идентичность цIакь дуваврин хас дурсса элмийсса конференция.

П. Рамазанова
Му даврил каялувчину ия Миннацрал управлениялул хъунама МахIаммад Даитбагов. Мунал бувсунни аьрасатнал аьмсса граждан идентичностьрал гьану бизавриву хъунмасса бияла дуккаврил заведениярттахь ва вузирдахь бушиву, гьаманки дуклакисса кIанай чантI учайшиву инсаннал дакIниву патриот асарду. «Общероссийская гражданская идентичность» тIисса хъунмасса доклад бувна ДГПУ-рал спецобразованиялул факультетрал декан ПатIимат Оьмаровал. Мунил бувсуна жулла дакIурдиву жулва гужгу, кьувватгу жула цашивруву, куннал ку бугьавриву бушиву къабувчIуссаксса жущара аргъ, кутак цIакьсса билаят хIасул буван къахьунтIишиву. Конференциялий доклад бувна тарихрал элмурдал доктор МахIаммадхан МахIаммадхановлул, ДГПУ-рал Патриот тарбия дулаврил клуб­рал директор Лариса Кравцовал, Диндалул иширтталсса буллалисса комитетрал хъунама специалист ГъазимахIаммад МухIумагъазиевлул ва цайминнал. Миккура, заседаниялий, ххал диргьуна 2025 шинайннин­сса Аьрасатнал паччахIлугърал миллатрал политикалул Стратегия бартдигьаврил масъаларттугу: миллатирттал мазру ва культура ядаву мурадрайсса; интернет-ресурсирттай миллатирттал дянив къалмакъаллу ва питнарду хьун къабитаву мурад­райсса; жагьилтураву патриотизм асарду цIакь буваву мурад­райсса давурттив дуллан аьркиншиврий чIурчIав дуллалисса ва цаймигу агьамсса масъалар­тту хьхьичIун ласласисса.