Ноябрь зурул 15-нний Дагъусттаннал университетрал юридический факультетрал конференц-залдануву ларгунни «Эсктремизмалул ва терроризмалул идеологиялийн къарши бацIавриву кIулшивуртту дулаврил идарарттал бияла» тIисса цIанилусса элмийсса ва практикалул конференция.

А. Аьбдуллаева
Дагъусттаннал университетрал студентътуращал хьунабакьин бувкIун бия личIи-личIисса ведомстварттал вакилтал: Москавуллал паччахIлугърал университетрал профессор, юридический элмурдал доктор Сурен Абакян, Дагъусттаннал виваллил иширтал министрнал хъиривчу, Миграциялул къуллугърал хъунама, полициялул полковник Рамазан МахIаммадов, ДР-лул УФСИН-далул хъунама, Виваллил къуллугърал генерал-майор Муслим Даххаев, Дагъусттаннал МВД-лул пишакартал хIадур баврил центрданул хъунама, полициялул полковник АьбдуллатIип АьбдуллатIипов, участковыйтурал даврил сакиншиндарал ва балугъравун къабивминнал ишир­ттал подразделениярттал отделданул хъунама Султан Карибов, ДР-лул жагьилтурал иширттал министр Арсен ХIажиев, Да­гъусттаннал университетрал ректорнан кIанайма, физикалул ва математикалул элмурдал доктор, профессор Назир Аьшурбеков ва м. ц.
Цала ихтилатирттаву шикку гьуртту хъанахъиминнал бувсунни хIакьину республикалийсса тагьардания, социал сетирдайхчIин жагьилтал бяйкьу ххуллийн кIун­кIу буллалаврия, экстремизмалийн ва терроризмалийн къарши бацIансса чаран лякъаврия.
— Экстремизмалул ва терроризмалул идеологиялийн къарши бацIавриву хъунмасса бияла буссар кIулшивуртту дулаврил ва элмийсса идарарттахь. Да­гъусттаннал университетравугу му масъала хъуннасса къулагъа­с­­равун лавсун буссар. Университетрал цаппара факультетирттай дуллалисса элмийсса ахттаршиннарду терроризмалул ва экстремизмалул масъаларттан хас дур­сса дуссар. Психологиялул, философиялул факультетирттай буссар терроризмалул ва экстремизмалул идеологиялул ма­съаларттаха зузисса центр. Мукунма юридический факультетрай тIивтIуну буссар экстремизмалийн, терроризмалийн, коррупциялийн къарши бацIаврил ма­съалартту ххал бигьлагьисса центр. Так ихтиярду дуруччай органнал, кIулшивуртту дулаврил идарарттал, элмий­сса организациярттал цачIусса хIарачатрайнур жущава ва масъала щаллу бавриву ххуйсса хIасиллу ккаккан дан бюхъантIисса, — увкунни Назир Аьшур­бековлул.
Цала ихтилатраву Муслим Да­ххаевлул бувсунни цинярдагу УИС-рал идарарттайгу вай масъалар­ттах хъуннасса къулагъас дуллай бушиву.
— ХIакьинусса кьини жул идарарттай 100-нния ливчусса инсантал буссар терроризмалул ва экстремизмалул идеология ппив дуллай тIий дуснакь був­сса. Укунсса иширттан къарши бацIансса чаран ляхълай буру ихтияр дуру­ччай органнащал ва паччахIлугърал властьрал органнащал цачIу. Жула биялдаралусса идарарттай экстремизмалул идеология ппив хьун къаритан хъуннасса даву дуллай буссар му масъалалуха зузисса оперативный подразделенияртту. Дуснакьраву щябивтсса дин-чак дуллали­сса инсантуращал дуллайнма буссар цумурцагу диндалуву кьиматраймур ккаккан дуллалисса давуртту, мудангу вай идарарттайн биян буллай буссар бучIи буллалисса диндалул литература, — увкунни Муслим Даххаевлул.
Ихтилатру къуртал хьуну махъ хъамаллурал студентътурал суаллахьхьун жавабру дуллунни.