Дурар ттигу республикалул хасъсса къуллугъирттал МахIачкъалаллал турбардавух нанисса щин хIачIан ва ич1уву ишла дуллансса рязишинна дулун. ХIакьинусса кьинигу щинал тагьар къулай дуллай, му масъалалул хIакъиравусса давуртту найнна дур. Щинал санитар тагьар сававну МахIачкъалаллал школардай ноябрьданул 17-ннин лахъи ларгунни ссутнил каникуллу ва оьрчIал садру зий бусса бур цIакьсса санитар тIалавшиннарду дурурччуну.
З.АьбдурахIманова
КIулшивуртту дулаврил идарарттал каялувчитал ва пишакартал буржлув бувну бур ххюттукалул азарду ппив хьун къаритан мурадрайсса профилактикалул давуртту дуллан. Шикку мукунма шагьрулул аварий-ремонтрал къуллугърал пишакартурал хIарачатрацIух щинал, канализациялул турбарду, щинал бакру хлорданий шюшлай, дезинфекциялул давуртту най дусса дур.
ОьрчIал садикирттаву хъунисса бакирдавун дартIсса щин цал ца-кIира ссятрай дитайсса дур, яла щаращи дурну махъ, дякъингу риртун ишла дувай­сса дур. Ишла дувайссагу дур так шюшу-кьютIулун. ОьрчIал хIачIан ва дукра-къюссун садикирттавун шушравусса щин ларсун бучIайсса бур. Ва даврил сакиншиннагу цала бакIрайн ларсун дур шагьрулул КIулшивуртту дулаврил управлениялул хъунама ТIагьир Мансуровлул. Садикирттавун щин укра диян дуллан рязий хьуну дур ОАО «Денеб» компания. Сайки гьарца шагьрулул садикравун, оьрчIал аьдадрах бурувгун, 300-ксса щинал литра диян дайсса дур вайннал. Ва бакъасса, каникуллу къуртал хьуну махъ школардайнгу диян дуллансса икьрал дурну дур.
Гьар кьини нитти-буттал садикир­ттавун бувцуну бувкIсса мюрщулт медициналул зузалтрал ххал бувну махъ кьамул байсса бур. Кьинилул мутталий температура, лякьлулсса дусса, кIарчI тIисса оьрчIру вайми оьрчIая личIи бувну, нитти-буттайнгу баян бувну, хIакинтурайн буккайсса бур. Садикирттал къатраву кварцевание дурну, гиву­сса тIахIни-кIичIу, шкаф-кроватьру шюшайсса бур.
Гьарца кIюрххил садикравун оьрчIру бувцуну къабувкIсса нитти-буттайн оьвкуну, ци сававну оьрчIру бакъассарив кIул бувайсса бур. Ми гьарзат хасъсса тетрадьрай чичлай, гьарзатрал ялув бавцIуну бусса бур. МахIачкъалаливсса оьрчIал садикирттал циняв пишакартал дакIнихтунусса барчаллагьрай бур ва укунсса захIматсса чIумал цала чIарав ххуйну бавцIусса «Денеб» компаниялул зузалтрайн, шагьрулул администрациялуйн ва хаснува гьар кьини цанма кумаг бан хIадурсса ТIагьир Мансуровлуйн.