Каспийск шагьрулий республикалул цайми шагь­рурдайнияр чIярусса дакI­нийхтунусса батIавуртту, хьунабакьавуртту шайссар куну учирча, ми му­къурттищал рязий къахьунсса нажагьсса акъа къаукканссар.

Ми чIярумигу шай ЦБС-рал хъунмур, «Матери России» щалагу Аьрасатнал суккушиндарал региондалул отделениялул председатель Таиса МахIаммадовал каялувшиндаралу. Уттигъаннугу хьунни мукуннасса ца хьунабакьаву – оьрмулул бугьарасса инсантуран, цIуллу-сагъшиврул ссуссукьуминнан шагьрулул хъунмур библиотекалий тIивтIусса «Общение» цIанилусса культуралул ва бигьалагаврил центрданий. Ва журалул хьунабакьавур­тту шикку чIун-чIумуй шайссар, оьрчIру, оьрчIал оьрчIругу хъуни хьуну, цала къайгъурдахух лавгун, оьр­мулул бугьарасса инсантал бизарну, цахунма цивппа багьсса кунма къаличIан, вай куннащал кув кIул хьуншиврул, яхши-хаш буллай, аьмсса масъаларттаясса ихтилатирттахух гьан буваншиврул.
БатIаву дачин дурну бия ЦБС-лул методист Зугьра Аьбдуллаева.
«Общение» клубравун бавтI­миннал хьхьичI махъ лавхъунни Таиса МахIаммадовал, барча бунни ми ялун нани­сса Халкьуннал цашиврул кьинилущал, цувгу жулва билаятрай гьарца шинал ноябрьданул 4-нний кIицI лагайсса, чIа увкунни миннан цIакьсса цIуллу-сагъшиву, ла­хъисса оьр­мулул шинну.
БавтIми ялун нанисса байрандалущал барча бунни шагьрулул 1-мур школалул директор, психолог Фарида Аьлиевалгу. Ванил дакIнийн бувтунни утти­гъанну кунма ва Центрданий тIивтIушиву психологиялул кумаграл къуллугъ, кIицI лавгунни ччимур чIумал цуппа хIадурну бушиву аьркинсса кумаг буван.
Зугьра Аьбдуллаевал бувсунни ялун нанисса байрандалул тарихрая, мукунна цаймигу Кьинирдая ва байранная. Бувсунни ДР-лул БакIчи Рамазан АьбдуллатIиповлул ХIукмулийн бувну КIяла кьурукьирттал кьини кIицI лаглантIишиву Расул ХIамзатов увсса сентябрьданул 8-сса кьини. ХьхьичIра му Кьини кIицI лаглай бивкIссар октябрьданул 22-нний. Бувсунни КIяла кьурукьирттал кьини ва мукуннасса цаймигу датарду кIицI лагайшиву ялун нанисса никирайн халкьуннал рувхIанийсса ва пат­риот зумунусса аьдатру диян даву мурадрай, жагьилтал бу­ттал буттахъал дурсса чувшивуртту дакIнийну, ватан ххирану тарбия шаву мурадрай.
З. Аьбдуллаевал бавтIми кIул бунни ва Центрданул «Советы психолога» тIисса цIусса рубрикалущал.
БатIаврий цинявнналвагу барча бунни вай гьантрай кIицI ларгсса юбилейращал ЦСОН-лул хъунмур пишакар Мадинат МахIаммадова. ЧIярусса шиннардий бувсса захIматрахлу ва шагьрулул жяматийсса оьрмулуву дуллалисса хьхьичIунсса гьурттушиндарахлу Таиса Билаловнал ванин ХIурматрал грамота дуллунни. Шагьрулул чIяруми батIавурттай гьуртту шайсса ЦСОН-лул Ветерантурал хорданул Мадинатлун хасну щаллу бунни балай.
Шадлугъ гихуннай лахъи ларгунни дукрардал бувцIусса ссупралух.