Октябрь зурул 28-нний МахIачкъалалив, Яруссаннал драмтеатрданул сахIналий ккаккан бунни Москавлиясса Таганкалийсса театрданул артистурал спектакль: «Я, Высоцкий Владимир».

Му спектакль- концертрал режиссершиву дурну дур Высоцкийщал зий ивкIсса Валерий Золотухиннул. Спектакльданул гьанулун лавсун бур Высоцкийл кулпатрал, актриса Марина Владил чивчусса лу «Владимир, или Прерванный полет». КIира ссятрал лахъишиврийсса спектакльдануву ур увагу кIия инсан: Аьрасатнал лайкь хьу­сса артистътал Любовь Чиркова ва Валерий Черняев. Спектакль байбишиннин ихтилат бунни Высоцкийл арснал Никита Высоцкийл: «КIира шинал хьхьичI на МахIачкъалалив уссияв, Яр­у­ссаннал театрдануву артистуращал ва театрданул хъуниминнащалгу хьунаавкьуссияв. Микку щил увкуссарив дакIний ба­къар, ВысоцкийлуцIун дархIусса программа МахIачкъалаливгу кка­ккан дуварча хъинну хьун­ссия тIисса ихтилат гьаз бувна. АцIва гьантлул хьхьичI Яру­ссаннал театрданул директор МахIаммадрасул МахIаммад­расуловлул ттучIанма оьвчайхту, ттун гацIана му шиннардил хьхьичIва хьусса ихтилат дакIнийн багьуна. На увкIра ттучIава хъунмасса хIурмат бу­сса инсантурачIан хъамаличу хIисаврай. «Я, Владимир Высоцкий…» оьрму лахъисса спектакльли.Таганкалийсса Театрдануву бакъагу ва спектакль кка­ккан бувайссар на каялувшиву дуллалисса Высоцкийл Центрданувугу». МахIаммадрасул МахIаммадрасуловлул Москавлиясса артистуран дагъусттаннал усттартурал бувсса варси ва ххаржанну пишкаш дурна Да­гъусттаннал БакIчинал цIанияту. Дагъусттаннал БакIчи Рамазан АьбдуллатIипов цувагу ия спектакльданий. Москавлиясса хъамаллуран дуллуна Дагъусттаннал Культуралул министерствалул ХIурматрал грамотардугу.