ДР-лул Роспотребнадзорданул МахIачкъалаллал агьалинайн баян буллай бур ичIура щин дигьайсса фильтрду даххана дуван аьркиншиву.

Махъсса гьантрай щинайхчил ххюттукалул лахъай азарду ппив шаврицIун бавхIуну, ичIура щин дигьайсса фильтрдаву бюхъай­ссар ливчIун бикIан ххюттукалул азарду сукку дайсса бактерияртту ва вирусру.
ХIакьинусса кьини, МахIач­къалалив ва Каспийскалийн итадакьайсса щин ххуй даншиврул, миннул гиперхлорирование дуллай бу­ссар. Гьарца кьинисса мониторинграл исват буллай бур тагьар цалийн дукIлай душиву ва щин марцI дуклай душиву. Хлор щинавун чанну хIала буллай тIий, дезинфекция щаллуну хъанай дакъар.
Дагъусттаннал Роспотребнадзорданул маслихIатну ккаклай бур ххюттукалул лахъай азарду цIунилгу тикрал къахьуншиврул, ичIура, оьрчIал, медициналул, дуккаврил ва социал учреждениярттай, дукра дукайсса кIанттурдай гигиеналул кьяйдарду дуруччин аьркиншиву, хаснува ичIува дизентериялул къашавайсса инсан ухьурча.
Мунищала архIал, къабучIи­ссар крандалувасса щин щаращи къадурну хIачIан. Щаралахъан дуван аьркинссар мукунна дук­ра дайсса щингу, ахъулсса шюшинсса щингу.