Ноябрьданул 17-нний МахIачкъалалив Олег Белавенцев хьунаавкьунни Дагъусттаннал БакIчи Рамазан АьбдуллатIиповлущал.

Олег Белавенцевлул бувсунни цанма кIулну бушиву утти­гъанну Дагъусттаннал БакIчинал Аьрасатнал Президентнащал­сса ихтилатраву гьаз бувсса масъалартту. Та чIумал ихтилат хьу­ссар Дарбантуллан 2000 шин шаврин шадлугърал лагрулий щаллу дуван аьркинну диркIсса ялун ххи дурсса давуртту АьФ-лул ХIукуматрал цIакь дан аьркиншиврул хIакъираву, 2016 шинал республикалун кумаг­ран дотация хIисаврай 9,1 млрд. къурушрал личIи баврил хIакъираву, МокIокIуллал шяраву цIу дагьаврия бивсса зараллу бухлаган баврил хIакъиравусса ва цаймигу масъаларттая.
Президентнал мукунма бувсунни паччахIлугърал бакIчинал АьФ-лул ХIукуматрайн тапшур бувну бушиву ми масъалартту щаллу буван.
«Ина гьаз бувсса циняв ма­съалартту хъинну агьамсса бур республикалул цIанасса тагьарданун. Аьрасатнал Президентнал СКФО-райсса вакилнал Аппарат­рал дуллантIиссар ларай кIицI дурсса ялув бацIаву. Гьаман миннуйн хъарну дур Дагъусттаннай­сса экономикалул ва политикалул тагьар. Ина каялувшиву дуллай ивкIсса шиннардий хъин чулийсса дахханашивуртту дур. На дакI дарцIуну ура, исполнительный властьрал федерал органналгу, Дагъусттаннайсса федерал органнал каялувчитуралгу, вакилнал аппаратралгу шайсса кумаг булланшиврий ми циняв масъалартту бартбигьаврил ххуллий», — увкунни Белавенцевлул.