Москавуллал Миллатирттал къатлувугу хьунни Аьрасатнавусса КIяла кьурукьирттал байран хIисаврайсса литературалул мажлис.

Му хIадур бувну бия Аьрасат­нал ПрезидентначIасса Дагъус­ттаннал поспредствалул ва Да­гъусттаннал культуралул центрданул уртакьну. Чагъардая бувсса кIяласса кьурукьир­ттал чIюлу бувсса залданувун бавтIуна шаэртал, публицистал, личIи-личIисса идарарттал вакилтал. Агьали барча буллали­сса ихтилат бувна Миллатирттал Къатлул директорнал хъиривчу Алексей Дрожжиннул. «Арилчинну жу ва цал архIал пашмансса ва ххарисса байран дуллалисса. ДакIнийн бичару цинявппа дяъвирдай ливтIуцири. Дяъви – инсаннал оьрмулуву хьун бюхъайсса яла оьккимур балари, укунсса акциярдайну жу хIарачат буллай буру агьалинан бувчIин буван дяъвилул оьхIалшиву душиву яла нигь рутлатимур. Расул ХIамзатов дакьаврил илчи ия, му бюхттул дуллай ия кьиматрай дикIан аьркинмур ва кьадрулий ядуванмур. Жун тIааьнну бур залдануву хъунасса шаэрнал шанмагу душ ва гъан-маччами бушиврия», — увкуна ванал. Мукунма кIицI лавгуна Миллатирттал къатрая арх дакъа душиву Расул ХIамзатовлул гьайкал. Постпредствалул цIанияту ихтилат бувна Оьмар Ибрагьимовлул. Ванал цалвамур ихтилатраву бувсуна «КIяла кьурукьру» байрандалул гьану бивзшиву 30 шинал хьхьичI, 1986 шинал, тания шиннай му байран кIицI лагайшиву поэзиялул, рувхIанийшиврул, агьалинал цашиврул байран хIисаврай. Бувккуна мунал яру мазрая ­оьрус мазрайн таржума бувсса ХIамзатовлул шеъригу. Шаэрнал душ СалихIат ХIамзатовал бувсуна буттал утти­нин таржума къабувсса ххуй­сса шеърирду бушиву. «Да­гъусттан» Москавуллал культуралул центрданул президент Арсен ХIусайновлул барчаллагь увкуна «дакьаврил, ссавурданул ва цашиврул» байрандалийн бавтIцириннахь. Концерт­рал программалуву гьуртту хьуминнан буллуна Миллатирттал къатлул цIаниятусса Барчаллагьрал чагъардугу.