Санкт-Петербургливсса Дагъусттаннал вакилханалий ПаччахIлугърал Думалул депутат Аьбдулмажид МахIрамов хьунаавкьунни дагъусттанлувтуращал. Представительствалул цIанияту хъамаличу Думалувунсса бувчIавурттаву ххув шаврищал барча уллай, ХIасанов ХIасаннул депутатнахь барчаллагь увкуна та петербургуллал дагъусттанлувтуращал хьунаакьин чялиш уккаврихлу.

П. Рамазанова
Аьбдулмажид Варисовичлул бувсуна цала оьрмулул ххуллия, даврия, агьалинал цIуллушиву дуруччаврилсса буллалисса Комитет­раву цува дуллан дакIнийсса давурттая, Дагъусттаннайсса оьр­му хьхьичIунмай шаву мурадрай бартдигьлантIисса проектирттая.
Петербургливсса дагъусттанлувтурал бувсуна ххуйсса давурттив дуллансса ва дуллалимур бакIуйн дуккан дувансса потенциал Аьбдулмажид Варисовичлуву чIалай бушиву, мунайн хъуннасса вихшалагу душиву.
КIилчинмур ЦIувкIратусса, Москавуллал гидромелиоративный институт марцIну ххювардай къуртал бувсса, экономикалул кандидат хьунсса диссертация дурур­ччусса, «Даггортехводстрой» тIисса проектно-технологический центрданий зий ивкIсса, гьаннайсса, кIулшивурттайну ва захIматрайну гьаз хьусса Аьбдулмажид МахIрамов Москавлив мукьра шинай элмий­сса институтраву ( МГИ НИС) зий ивкIун ур, захIматсса 90-ку шиннардий гьалмахтуращал архIал «Северный» тIисса машлул къатта хIасул бувну, цувагу зий, цайминнангу предпринимательствалул мухIлу-хIин лахьхьин дуллай ивкIун. Муния махъ унгу-унгуну бизнесрахун агьну, хъунисса компаниярттал директортурал советрай каялувшиву дуллалисса даражалийн гьаз хьуну ур. ХIакьинусса кьинигу ва каялувшиву дуллалисса компаниярттал итадакьлакьимур, медициналуву ва косметологиялуву ишла дуваймур Аьрасатнаву, СНГ-лул билаятирттай кьиматрай дур. Му ба­къассагу, ва мудангу Дагъусттаннал агьалинал чIарав авцIуну ур гьарцагу ккалли бансса ишираву. Иш бавчусса бизнесменнан ци чарабакъашивуя политикалул ишир­ттавух хIала уххан тIисса суалдану­хьхьун жаваб дуллай, ванал увкунни: «Ттул даврил биялсса опыт бур, Аьрасатнал яла лахъмур законодательный органналувун цIа рирщуну, ттулва билаятран, Дагъусттаннан мукъуйну, иширайну ка-кумаг буллансса сантгу, кашигу хъун хъанай дур, ххуй-ххуйсса давурттив дуллансса хIалу дагьлай дур. «Единая Россия» халкьуннал къайгъурдаха зузисса партия дунавхьур, му партиялуву, уртакьну, хIалану билаятрайсса оьрму сантирай ва лябукку буну хьхьичIунмай бувавриха зунтIиссару».
Балжину бувсуна депутатнал цукунсса давурттаха зун дакIний уссарив, бувсуна гьунар бусса оьрчIал центр хIасул буван дакIний ушиву, оьрчIансса пособиярду лахъ бувансса, газ буцинсса, шагьра­ххуллурду ххуй бувансса чараннах луглантIишиву. Бувсуна Госдумалуву хасну агьалинал цIуллу-сагъшиврул масъалартталсса буллалисса Комитетран чIярусса давурттаха зун багьлай бушиврия. Да­гъусттанчу ЖахIпар Закаржаевлул депутатнахь миннат бувна шанна шинай цIуцIаврил азурда дуллали­сса ниттин Санкт-Петербургуллал медучреждениялувун квота дуван кумаг бува тIисса. Аьбдулмажид Варисовичлул бувсуна ухссавнил хъун шагьрулийсса федерал медучреждениярдал махъсса шиннардий жулла республикалун квотарду чан дурну душиврия, ми учреждениярттайн ивну, хъуниминнащал хьунаавкьуну, квотарду чан дуваврил сававгу кIул дурну, тагьар ххуйчулиннай даххана дувансса хIарачат бувантIишиву, ЖахIпардул ни­ттингу, цайми-цайминнангу чIумуй аьркинсса кумаг бансса мурадрай хъирив уккантIишиву. Дагъусттанлувтурал цаймигу суаллу буллуна хъамаличунахьхьун. Мунал цайнма уккан ччиминнахьхьун буллуна цала телефондалул номерду. Ахирданий, депутатнащалсса хьунабакьавуртту аьдатравун дагьан­сса мурад бушивугу бувсун, ХIасан Аьлиевичлул хъамаличунан пишкаш бувна «Дагъусттаннал этноатлас» тIисса лу.