Ноябрьданул 19-нний МахIачкъалалив Поэзиялул театрдануву «Воспевшие Дагестан» цIанилусса Республикалул театрдал фестиваль-конкурс тIитIлатIисса хъуннасса шадлугъ хьунни. Ва фестиваль-конкурс дувансса сипта цайнна ларсун диркIссар ДР-лул Культуралул министерствалул ва Поэзиялул театрданул, Респуб­ликалул БакIчи Р. АьбдуллатIиповлул чIарах ацIаврийну.

З. АьбдурахIманова
Фестиваль тIитIлатIисса шадлугърай гьуртту хьунни цува Рамазан АьбдуллатIиповгу ва, жула шиччасса бакъа, Аьрасатнал личIи-личIисса шагьрурдая, регионная бувкIсса хъамалгу.
Шадлугърал дайдихьулий фестивальданувух гьурттусса Дагъусттаннал циняв театрдал вакилсса артистътурал «Вин, Поэзияй, барчаллагь!» тIисса композициялул лагрулий циняв барча буллай, бувккунни шеърирду. Хъирив махъ лавсунни Рамазан АьбдуллатIиповлул.
-ХIакьмур, ххуймур, хъиншиву, эшкьи-ччаву – вай бур шаэртурал цала назмурдаву лахъа-хъун буллалисса ххазинартту, жува цанначIан ца гъан буллалисса, цаннащал ца дус буллалисса ярагъ.
Дагъусттаннай чIаххувчунал, хъамаличунал хIурмат баву – мархха цIакьсса аьдатри. Жулагу буржри му аьдат ядан. Ва ишираву жунма жула шаэртуралгур кумаг бантIисса. Аьрасатнал ва Дагъусттаннал шеърилугъ цурда хъинну авадан­ссар. Жулагу буржри жула халкьуннан му ччя-ччяни дакIнийн бутлан. Жула дур хъинну бусравсса Чичултрал союз, мунил каялувчинугу ур хIурматрайсса МахIаммад АхIмадов. ЛичIи-личIисса шиннардий ялапар хъанай, зий-занай бивкIсса да­гъусттаннал шаэртурал творчествардайну жун пикри хьунни ва фестиваль дуван. Дагъусттан хьхьичIунмай хъит учин бансса цаппара ххуллурдавасса агьаммур ххуллугу культуралул ххуллийн буккан бавур, – увкунни БакIчинал.
Фестивальданул жюрилувух гьурттусса ва ванил председательсса Виктор Малыгиннул кIицI бувунни ттинин укунсса фестиваль жучIара къархьушиву ва, ца жучIава бакъа, яла чувкIуй бакъашиву Поэзиялул театргу.
Дагъусттаннал Театрдал деятельтурал союзрал хъунама Айгум Айгумовлулгу кIицI бувунни укунсса фестиваллал артистътураву гьавас ххи байшиву, усттаршиву ххи шайшиву.
Фестиваль тIитIаврицIун бавхIусса барча бавурттал ихтилатирттая махъ Шеърилугърал театрданул сахIналий ХI. ЦIадассал цIанийсса Яруссаннал музыкалул ва драматургиялул театрданул артистътурал кка­ккан бувунни «МахIмуд ва Муи» тIисса яруссаннал цIанихсса шаэр ХъахIабросолиясса МахI­мудлул кьадарданиясса пьеса. Яру маз къабувчIайминнан ва жюрилун пьесалул синхрон журалул таржума най дия. Сакиншинначитурал бусаврийну, фестиваль нанисса щалла нюжмардий миллатирттал мазурдийсса пьесарду укунсса журалул таржума ишлану бикIан тIий бусса бур. Вагу уттизаманнул театрдал оьрмулувасса цIушиннар.
Фестивальданул хъиривмур кьини, ноябрьданул 20-нний, С. Стальскийл цIанийсса Лазгиял музыкалул ва драмалул театрданул ккаккан бувунни «Да­гъусттаннал Гомер» тIисса, лазгиял цIадурксса шаэр Сулайман Стальскийл оьрмулиясса пьеса.
Фестивальдалул шамилчин­сса кьини жюрилул ва тамашачитурал хьхьичIун бувккунни А.Къапиевлул цIанийсса Лак­рал музыкалул ва драмалул театрданул гьунар бусса артистътал «Ккурккуллал Щаза» тIисса пьесалущал. Ванил редакторшиву дурну дур, Халил Халиловлул пьесалийн чул бивщуну, ДР-лул Культуралул лайкь хьу­сса зузала Гулизар Султановал. Пьесалул режиссершиву дурну дур Да­гъусттаннал халкьуннал артист Аслан МахIаммадовлул. Жагьилнийсса ва оьрму лавгсса Щазал рольлу дургьуну бия театрданул артистка Зульфия Архилаева ва Дагъусттаннал халкьуннал артистка Луиза Шагьдилова. Щазал нитти-буттал рольлу дургьуну бия ДР-лул лайкь хьусса артистка Юлиана МахIаммадова ва Аслан МахIаммадов. Мукунма ванивух гьурттуну бия Да­гъусттаннал лайкь хьу­сса артистътал Уди Аьлие­ва, ХIа­жи­аьли ХIажиаьлиев, Халисат Ба­тирбекова, Шамсуттин Къапланов ва цаймигу.
Залданувусса тамашачитурал хъинну ххуйну, хъунмасса хIаллай хъатру ришлай кьамул бувна пьеса.
Пьесарду ккаккан бувсса гайми театрдан кунма, Лакрал театр­данул коллективрангу «Воспевшие Дагестан» фестивальданул диплом буллунни ва чIа увку­н­ни хьхьичIуннайшивуртту ва цIу-цIусса лахъазанну ласлан­сса ккаккияртту. Фестивальдалул жюрилулмур пикри кIул хьунссар гихунмай, циняв театр­дал коллективирттал пьесардая махъ.