Ноябрьданул 23-нний Да­гъусттаннал БакIчи Рамазан АьбдуллатIипов хьунаавкьунни «Аьрасатнал ниттихъул» тIисса Аьра­сатнал жяматийсса ккурандалул председатель Валентина Петренкощал, Аьрасатнал халкьуннал ассамб­лея» тIисса Аьрасатнал Жяматийсса организациялул советрал председатель Светлана Смирноващал ва АьФ-лул Жяматий­сса палатанул член Лайла Амирхановащал.

Ва хьунабакьаву хьу­ссар «Аьрасатнал ялун бучIанмур – ниттихъал кIунттихь буссар» тIисса регионнал дянивсса форумрал лагрулуву.
«Аьрасатнал ялун бучIанмур – ниттихъал кIунттихь бу­ссар» тIисса форум хьунтIиссар захI­матшивурттаясса ихтилатру буллансса сий дусса кIанттуну. ХIакьину жува ихтилат ххал бигьинну хъамитайпахъул па­ччахIлугърал ва жяматийсса оьр­мулул циняв бутIраву хIала-гьуртту шаврицIун бавхIусса агьамсса масъалартту», — увкунни Рамазан АьбдуллатIиповлул.
Валентина Петренкол республикалул каялувчинахь барчаллагь увкунни форум лавайсса даражалий сакин баврихлу ва региондалул ккурандалуцIун кабакьаврихлу.
Ихтилатраву сукку бунни кулпатирттал ххазинарду цIакь баврил масъалартту.
Хьунабакьаврий гьуртту хьунни мукунма ДР-лул ХIукуматрал Председательнал хъиривчу Рамазан Жяъпаров, ДР-лул БакIчинал ва ХIукуматрал Администрациялул каялувчинал хъиривчу-прессалул къуллугърал каялувчи Тамара Чиненная ва ДР-лул миллатирттал политикалул министр Татьяна Гамалей.