Вирус чурххавун багьну махъ, азар дайдишиннин шайссар 15-30 кьини. ХIакьинусса кьини инсаннайн азар лахъаврил хьхьичIалу кьукьин шайссар так цила чIумал вакциналул ххалаххи бувну.
Циняннаяр ччяни къашавай шайссар 3-7 шинавусса оьрчIру, циняв къашавай хьуминнал 60% ми бур. Миннал хъирив чIявуну къашавай шайми бур 30 шинавун бияннинсса жагьилми. Хъунив хьуми нажагьну къашавай шайссар. Азар дирма цуксса оьрмулул угьарасса урив, муксса захIматну къашавай шайссар. А гепатитрал цал къашавай хьурча, оьрмулунсса иммунитет личIайссар. Мунияту вакцина бан аьркинссар му журалул гепатитрал къашавай къавхьуминнайн, мукунма ччяни къашавай шайминнайн: аьралуннаву къуллугъ буллалиминнайн, школалий дукралуха зузиминнайн, садикирттал зузалтрайн, вузирдал, сузирдал зузалтрайн, жяматран дукра дайсса кIанттурдал зузалтрайн ва цайминнайнгу.
А журалул гепатитрансса профилактика ххюттукалул азардайнсса профилактика куннассар. Гигиеналул кьяйдарду дуручлан аьркинссар ахъулсса ва ахънилсса чара бакъа шюшлан щара лархъсса щинаву, дикI ва чавахъ шашан дан, къавур дан аьркинссар тамансса хIаллай.
МахIачкъалаллал халкьуннайн вакциналул ххалаххив баву дархIуну дур агьалинан къаххуйсса щин дулаврицIун ва мунийну ххюттуканил азарду ппив шаврицIун. Мичча наниссар гепатитрал къашавай шавриясса нигьачIавугу. Ноябрьданул 6-нний А вирусрал гепатитрайн къарши_сса вакцинарду бувну бур 11882 инсаннайн.
Дагъусттаннал Роспотребнадзорданул агьалинахь тавакъю буллай бур А гепатитрайн къаршисса вакцинарду буван къашавай къахьуншиврул. Вакциналул ххалаххив байссар зулва яхъанахъисса райондалул поликлиникалий.
