Ноябрь зурул 23-нний МахIач­къалалив, Дусшиврул къатлуву лар­гунни «Аьрасатнал бучIантIимур нитти­хъал кIунттихьри» тIисса регионнал дянивсса ниттихъал форум. Форумрай гьуртту хьун Дагъусттаннал хъун шагьрулийн бувкIун бия цинярдагу Ухссавнил Ккавкказуллал республикардаясса делегациярду, Аьрасатнал личIи-личIисса регионнаясса бусравсса хъамал, республикалул районная­сса ва шагьрурдаясса вакилтал.

Форумрай гьурттушинна дунни Дагъусттаннал БакIчи Рамазан АьбдуллатIиповлул, ДР-лул Халкьуннал Мажлисрал председатель Хизри Шихсаидовлул ДР-лул личIи-личIисса министерстварттал ва ведомстварттал хъуниминнал.
Форумрал мурад бия буттал бутта­хъая шихуннай нанисса Ккавкказуллал миллатирттал аьдатру кьадрулий дуруччаву, кулпатру цIакь шаву, ттизаманнул обществалуву хъамитайпалул бияла хъунмасса бушиву тасттикь баву, хъамитайпалул сий гьаз даву. Ва форум Дагъусттаннай шамилчинни хъанахъисса, цурдагу «Укрепление единства российской нации и этнокультурное развитие народов России» тIисса федерал программалул лагрулий.