Дагъусттаннал сий гьаз дуллалисса давурттавух ккалли дансса давурттив хьунни октябрь зуруй Аьрасатнал Федерациялул ПрезидентначIасса Республикалул постпредствалул, Москавуллал культуралул Департаментращал уртакьну Бухмур Арбатрай дурсса суратирттал выставкарду.
Октябрь зурул 18-нний «Дагъусттаннал шаэртал ччаврия» тIисса выставка тIиртIуну дур. Ва уттинин къадурсса даву дур цурдагу: дагъусттаннал шаэртурал суратру ва шеърирду чивчусса ххуйсса стендру дур. Авурсса экспозиция дур, кутIану учин. Ирчи Къазахълул, Апанни Къапиевлул, Оьмарла Батырайл, Расул ХIамзатовлул, Фазу Аьлиевал, Юсуп Хаппалаевлул язисса шеърирду ккалай бур вай гьантрай му выставкалий москавуллал агьлу ва хъамал. Бур микку ттизаманнул шаэртуралссагу. Масалдаран, жагьилсса шаэр Тимур Раджабов «Фейсбукраву» чичлай ур цала шеърирдугу бушиву, классиктурал чIарав цалламур цIа душиву цанма тIааьнну бушиву. Тема ччаврил духьурчагу ( анжагъ эшкьи-ччаврия бакъар ихтилат), ниттихасса, Ватандалухсса, дустурахсса ччавриягу бур шеърирду, дагъусттаннал шаэртурал шеърирдачIа бур Аьрасатнал Виричу МахIаммад НурбахIандовлухасса шеърирдугу.
КIилчинмур фотовыставка «Зунттаяр ххуйссар анжагъ зунттурду» («Лучше гор могут быть только горы») октябрь зурул 13-нний Чистопрудный бульварданий тIиртIуну дур. Дагъусттаннал БакIчи Рамазан АьбдуллатIиповлул 2016 шин Зунттал шинни тIий баян бувнавхьур, Республикалул постпредствалул хIукму бувну бур Дагъусттаннал суратирттал выставка дуван. Конкурсрайнсса суратру дуркIун дур Дагъусттаннал сайки циняв районная. Аьмну 500 сурат дуркIун дур конкурсрайн. Миннувату язи-язими личIи дурну дур. Суратирттал автортал профессионалныйсса суратрищултгу бур, укунна суратру ришлан гъирасса, дагъусттаннал зунттурдал ххуйшиврия цайминнахьгу бусан чялиш бувксса инсанталгу бур. Ва выставка дикIан тIий дур ноябрьданул 10-ннин, шаэртуралмур выставка тIурча – декабрьданул 5-нийн дияннин.
