Ноябрь зурул 2-нний оьрмулул 76 шин хьунтIиссия жунма ххирасса, хIурмат бусса Сияли ХIажиевнан. 2013 шинал бяливчIунни ванил оьрму, амма лирчIунни ванил марцIсса цIа, ххаллилсса давуртту, цIу бусса махъру, хъинсса насихIатру.

Андриана Аьбдуллаева
Кказит буккултраву нажагьсса бухьунссар Сияли ХIажиева къакIулсса, къабавсса. Ца-ца инсан лагай дунияллия, лахъисса, амма дакIний личIансса цичIар къакьариртсса оьрмугу бувтун. Ца-ца инсан тIурча лагай, кутIасса, амма яргсса оьрму бувтун.
Сияли ХIажиевал яргсса, авадансса оьрму бувтшиву цIунилва-цIунил мяйжан хъанай бур, ванил биографиялуву ххилтIу тIутIийни. МахIачкъалаллал 14-мур школагу къуртал бувну, 1957 шинал бувххун бур Дагъусттаннал университетрал чил билаятирттал мазурдил факультетрайн, немец мазрал отделениялийн. Мунияр шихунмай ванил бавхIуну бур цила оьр­му немец мазрацIун. 1962 шинал университет къуртал байхту миккува зун бацIан бувну бур. Микку зузисса шиннардий лавгун бур пишалул даража гьаз байсса курсирдайн — Москавлив, Минскалийн, Галли тIисса немецнал шагьрулийн. 1993 шинал Сияли зун бивкIун бур Да­гъусттаннал университетрал экономикалул управлениялул факультетрай, чил билаятир­ттал мазурдил кафедралий хъунмур преподавательну. 1995 шинал дурурччуну дур филологиялул элмурдал кандидатнал диссертация. 1996 шинал ванин дуллуну дур доцентнал цIа.
Сияли ХIажиева бия ДР-лул кIулшивуртту дулаврил лайкь хьусса зузала, захIматрал ветеран. Ва гьуртту шайва Аьрасатнал ва дунияллул халкьуннал дянивсса конференциярттай, бувайва асар хьунсса, бюххансса ихтилатру.
Цила даву дакI марцIну дуллай тIий ва университетрал жяматийсса иширттавух чялиш­сса гьурттушинна дуллай тIий, Сияли цимилагу лайкь хьуну бур хIурматрал грамотарттан ва барчаллагьрал чагъардан. Буттал бу­ттахъал аьпа абад баву ва халкьуннал дянивсса дусшиву цIакь даву мурадрай бивхьусса захIматрахлу, Дунияллул халкьуннал дянив­сса Шамиллул фондрал чулуха ванин дуллунна «200 лет Шамилю» тIисса медаль.
2001 шинал Дагъусттаннал миллатирттал аслийсса культура ва халкьуннал дянивсса дусшиву дуруччаврил цIаний бивхьусса захIматрахлу ва лайкь хьу­ссия ДР-лул ХIукуматрал чулухасса ХIурматрал грамоталун. АрхIал зузиминнавугу, студентътуравугу Сияли ХIажиевна дакIний ливчIунни кагу, тIуллугу марцIсса, кIулшивуртту дулайсса, тIайлану кьимат бишайсса преподавательну.
Немец мазрая Оьруснай таржума бувну, Сияли ХIажиевал пишкаш бунни Дагъусттаннал халкьуннан Халилбек Мусаясуллул «Страна последних рыцарей» тIисса ххаллилсса лу. Шикку къабувсун къабучIир, Сиялил душнил душ Фатимагу ванил шаттирдайх лавгшиву. Ванилгу Дагъусттаннал университетрал чил билаятирттал мазурдил факультетрал немец мазрал отделение къуртал бунни. ЦIана ва жагьилтурал ва студентътурал немец мазрал кIулшивуртту куртI дайсса Европанал программалий зий Германнаву бур. Сияли ХIажиева бия цила миллат хъинну ххирасса, лакрал хьхьичIуннайшивурттая, тIайлабацIурттая дазу-зума дакъа ххари шайсса, жула мазгу, культурагу яшаврил цIаний жан дулун хIадурсса, цила бикIайкунсса патриот. «Илчи» кказитрай олимпиадарттай, спортрал бяст-ччаллаву ххув хьусса лакку оьрчIая, къуллугърал лахъ хьусса, элмулул ххуллий лавайсса шачIанттуйн лавхъсса лакрал арамтунная ва хъанния буккайхту, га цIана редакциялийн оьвкуну, аьмсса ххаришиву кIидачIлан бикIайссия.
«ХIаж бан чара бакъа Маккалив гьан къааьркинссар» тIисса цила ниттил махъру тикрал буллан ххирассия Сияли ХIажиевнан. Ва рязину бикIайва, хIажлийн къагьарчагу, цила ниттил Аллагьнал ххуллий, адав-инсапрай оьрму бувтун тIий.
Сиялил ппу ХIажи Кьадинахъал агьулданиясса ия. Ва буслан бикIайва цила буттал ва ни­ттил, цащава шайсса ка-кумаг инсаннан барча бакъа, тачIав цаманан дакIнийн щунсса махъ къаувкушиву, ми чIахху-чIарахнащал, лагма-ялттунащал хIал бавкьусса, нахIу-хIалимсса бивкIшиву.
— Инсаншиву дуну, ка тIир­тIуну, цаманай дакIмяш къахъанай оьрму бутан бюхъарча, — мури инсаннал талихI, — учайва Сияли ХIажиевнал.
Мукун бухьурча, му цуппагу талихI бусса инсаннан ккалли бан бучIиссар.