Октябрьданул 24-нний МахIачкъалалив Къумукьнал театрдануву «Творческие пересечения» цIанилу байбивхьунни уттизаманнул музыкалул форум. Му хас бувну бур цIа дурксса композитор, дирижер ва пианист Сергей Прокофьев увну 125 шин шаврин. Мунил сакиншинначи бур Дагъусттаннал паччахIлугърал филармония, чIарав бацIаву дурну дур Аьрасатнал Культуралул министерствалул ва ДР-лул Культуралул министерствалул.
Бадрижамал Аьлиева
Форумрал лагрулий дуван дакIний бур тамансса давурттив, миннувух дур концертру, творчествалул хьунабакьавуртту, дискуссияртту, «Поэтика музыкального фольклора в контексте современности» цIанилусса «ккуркки стол» ва цаймигу. Миннувух гьуртту хьунтIиссар Москавлиясса, Ростов-на-Донураясса, Астраханнаясса хъамалгу.
Форум тIитIлай, ДР-лул культуралул министр Зарема Буттаевал бавтIми барча бунни Сергей Прокофьевлул юбилейран хасну сакин дурсса щалагу Аьрасатнал программалувун Дагъусттаннай хъанахъисса «Творческие пересечения» цIанилусса уттизаманнул музыкалул форум буххаврищал.
— Композитор, дирижер ва пианист Сергей Прокофьевлул музыка бур тикрал къашайсса журалул, мелодикалул, гармониялул, оркестровкалул ва ритмикалул чулуха. Му баяйхтува най буна бувчIай, муних вичIилий буссар дунияллул билаятирттайсса миллионну инсантурал.
2016 шин Аьрасатнаву, Кинорал шинну дакъассагу, най дур Прокофьевлул – композиторнал-генийнал музыкалул шиннугу, цалгу цала цалчинсса произведение чивчусса оьрмулул 6 шинаву, 15 шинаву тIурча, дуклан увхсса консерваториялувун, 11 опералул, 7 симфониялул, 7 балетрал, 8 концертрал автор, театрдал постановкардансса ва кинордансса музыкалул автор.
Ва форумран хавар бакъулий къадирзссар «Творческие пересечения» тIисса цIа, ноябрь барз бачIи хьуннин республикалий хъанантIиссар личIи-личIисса композитортуращалсса хьунабакьавуртту, концертру, уттизаманнул музыкалиясса ихтилатру, дискуссиярду, — увкунни Зарема Ажуевнал.
Ва кьини Къумукьнал театрданул сахIналийн бувккунни Дагъусттаннал ПаччахIлугърал симфонический оркестр, Аьрасатнал халкьуннал артист Валерий Хлебниковлул каялувшиндаралу, Ростов-на-Дону шагьрулия бувкIсса пианистка, дунияллул халкьуннал даражалийсса личIи-личIисса конкурсирттал лауреат Софья Бугаяннущал. Миннал щаллу бунни ХХ аьсрулул бюхттулсса композитор Сергей Прокофьевлул произведенияртту.
