Ялун нанисса ник ватан ххирану, тIабиаьт ва лагма-ялттусса дуниял ххирану тарбия давриву Каспийскаллал чIава натуралистътурал станциялул (Станция юных натуралистов – СЮН) хъуннасса даву дуллай бур. ХIарачат буллай бур шайссаксса чIявусса оьрчIру кIункIу буван чIава натуралистътурал кьюкьравун. Гьарцагу цIусса дуккаврил шинал дайдихьулий Станциялул дувайссар байран «Посвящение в юннаты». Ва ххуллухмур байран хьунни октябрьданул 14-нний ЧIава натуралистътурал станциялул актовый залдануву. Шивун ва кьини бавтIун бия преподавательтал, дуклаки оьрчIру ва миннал нину-ппу.

Бадрижамал Аьлиева
Гьарцагу шинал ва байран шай­ссар яргну, дакIний личIанну, магьравасса ва мульт­фильмрдавасса персонажирттал гьурттушиврийну. Ва ххуллухгу оьрчIачIан хъамалу бувкIун бия Баба Яга, Почтальон Печкин, Бременнаясса музыкантътал ва чIявусса цаймигу.
Байрандалувух гьуртту хьунни ва станциялий дусса 13-гу сакиншинна, цала-цала концертрал номердащал. Ва кьини хьунни чIярусса конкурсру, викторинарду, тIуркIурду, оьрчIал бувккунни шеърирду, бивзунни къавтIун, увкунни балайрду.
СЮН-лул педагог Зарема Аьбдуллаевал оьрчIахь кутIану бувсунни Станциялул даврия.
Аьдатрайн бувну, цIуну юннатътурал кьюкьравун бухлахисса оьрчIал хъа бунни дуручлан тIабиаьт, жула мюрщими уссурвавраха аякьа дуллан ва лагма-ялттусса дунияллухсса, тIабиаьтрахсса бургаву машгьур дуллан. Хъа бувну махъ вайнная хьуссар мяйжаннугусса юннатътал.
ОьрчIру ва иширащал барча бунни «Дагестанский» заповедникрал директорнал хъиривчу Зарипат МахIаммадовал. Мунил бувсунни заповедникрал даврия, оьвкунни бавтIсса цинявннайнмагу Дагъусттаннал заповедник­ру ххал буван.
ЧIава натуралистътурал станциялул директор Зинаида СалихIовал, оьрчIру барчагу бувну, увкунни:
— ТIабиаьт дуруччаву – му аькьлу-кIулши дусса гьарцагу инсаннал хьхьичI бивхьу­сса агьамсса масъалар. БувчIлан аьркинссар тIабиаьт дакъахьурча, инсангу акъашиву, аьрщарайсса цимурца кунницIун ку дархIуну душиву. Аьрщи дуру­члай, жува жулва жувару буручлачисса, дакIний битияра ва зат, — увкунни Зинаида Аьбдуллаевнал.
Ахирданий ларгсса дуккаврил шинал лахъишиврий респуб­ликалул личIи-личIисса конкурсирттай хьхьичIун ливчусса, гьуртту хьусса дуклаки оьрчIан ва преподавательтуран дуллунни грамотарду.