1990 шинал декабрь зурул 14-нний бувк­сса ООН-лул Генеральный Ассамблеялул хIукмулийн бувну октябрь зурул 1-сса кьини щалагу дунияллий баян бувну бур оьрмулул
Бугьараминнал кьинину.

Бугьараминнал кьини кIицI дуллан бивкIун бур хьхьичIва-хьхьичI Европанаву, хъирив Американаву. 1990 шинал ахирданий байран кIицI дуллан бивкIун бур щалагу дунияллий. Аьрасатнавугу бугьараминнал байран аьдатравун дагьну дур.
Ва кьини цинявппагу билаятирттай лагай бугьараминнан хас дурсса, миннал ихтиярду дуру­ччаврил цIанийсса фестиваллу, конференцияртту, конгрессру. Жяматийсса организациярттал ва фондирттал бувай личIи-личIисса чирилул акциярду.
Бугьараминнал кьини кIицI ларгунни вай гьантрай ЦIуминалийгу. «И года не беда – коль душа молода» цIанилусса, байрандалун хас дурсса шадлугъ ларгунни трестрай культуралул къатраву. Бугьарами вайннал кьинилущал барча бан бувкIун бия ЦIуссалакрал райондалул администрациялул бакIчи ХIажи Айдиев, мунал хъиривчу Алик Исрапилов, райондалийсса президентнал вакил АхIмад Нахаев.
Шадлугърал мажлис бачин був­ну бия ЦIуссаккуллал шко­лалул учительница Индира АхI­мадханова.
Бугьарами барча буллалисса ихтилат бунни ХIажи Айдиевлул:
— Зул кьинину баян бувсса октябрь зурул 1-сса кьини хъанай дур хIурматрал ва кьадрулул кьини. Зун оьрмулуву чIярусса захIматшивуртту ккаркссар, амма миннул хьхьичIгу ник къарирщуну, лайкьну, яхI-къириятрай бувтссар зу зула оьрму. Дяъвилул шиннардий къинттуллух зий, бизан бувсса чIумал цIусса миналий хъу-лухччи дугьлай, ризкьи-кьини ядуллай зу бивхьусса захIматран багьа бищун къашайссар. Зу хIакьинугу жун чара бакъа аьркинссару, жула хъирив наниминнахь насихIат бусан, гай тIайласса ххуллийх бачин бан.
Ттула чулухагу, райондалул активрал чулухагу цинявппагу бугьараминнахь ва байран барча дуллай, барчаллагь тIий ура, цIуллушиву чIа тIий ура, — увкунни райондалул хъунаманал. Цала дурцирив давурттая, хьунадаркьу­сса захIматшивурттая бусласисса, оьрмулул шиннал жям дуллали­сса, асар хьунсса ихтилатру бунни байрандалийн оьвку­сса бугьарасса инсантурал: Хъунмасса Бу­ттал кIанттул цIанийсса дяъвилул участник Аьвдулхаликь Алимовлул, дяъвилул шиннардий къинттуллух зий бивкIсса ва бизан баврил захIматшивуртту дурхIусса Загьидат Исмяиловал, ТIюхчардал школалул учитель, захIматрал ветеран Идрис Идрисовлул, ДР-лул лайкь хьусса учитель ПатIимат Оьмаровал ва м.ц. Вайннал чIа увкунни, цанна куннасса захIматшивурттугу къаккарккун, цIуллу-сагъну оьрмулул буччиннин битаннав цинявппагу куну. Бугьараминнал кьинилун хасну ДучIиннал 2-мур школалий чирчуну дия «Мои любимые бабушки и дедушки» тIисса сочиненияртту. КIулшивуртту дулаврил управлениялул зузалтрал лавайсса кьимат бивщуми сочиненияртту байрандалул кьини залданул чIирайн лархъун дия. Бугьараминнан хас дурсса концерт хIадур дурну дия райондалул культуралул къатлул зузалтрал. Бава-ттаттахъан ххуйсса макьанну рурцунни ва кьини Гьамиящиял школалул 6-мур классрал дуклаки оьрчI Нарчаев Жамалуттиннул.
Бугьараминнал байран тяхъану, ххарину ларгунни. Ва хIадур дурну бия ЦIуссалакрал райондалул КСОН-лул заведующая Аьлиева Минажатлул каялувшиндаралу социал зузалтрал ва райондалул культуралул къатлул зузалтрал.