ЦIуссалакрал жяматращал хьунабакьин бувкIун бия рес­публикалул творчествалул агьлу, литературалул ва искусствалул аралуву зузими: ДР-лул Чичултрал союзрал председатель, Дагъусттаннал халкьуннал шаэр МахIаммад АхIмадов, халкьуннал чичу Багьауттин Аджиев, халкьуннал шаэртал Сибирбаг Кьасумов ва Мирза Давыдов, лакрал секциялул председатель, шаэр Илияс МахIаммадов,
ДР-лул Композитортурал союзрал председатель, ДР-лул искусствалул лайкь хьусса зузала Рамазан Фаталиев, ДР-лул Художниктурал союзрал председатель, АьФ-лул искусствалул лайкь хьусса зузала Кьурбанаьли МахIаммадов, АьФ-лул искусствалул лайкь хьусса зузала Гулизар Султанова, мукунма Лакрал театрданул артистал художествалул каялувчи, АьФ-лул искусствалул лайкь хьусса зузала Бадрижат МахIаммадхIажиеващал ва театрданул режиссер, ДР-лул халкьуннал артист Аслан МахIаммадовлущал.

Райондалул жяматращал­сса, жагьи-жугьултращалсса ва дуклаки оьрчIащалсса хьунабакьаву тIитIлай, ихтилат бунни МахIаммад АхIмадовлул. Ванал кIицI лавгунни хIакьину Дагъусттаннай жула магьирлугъраву ва тарихраву кьиматрай диркIмур цIудуклай душиву, дакIнийн дуртунни ЦIуссалакрал халкьуннал къучагъшиву, оьвчаву дунни жагьилминнайн буттал бутта­хъая шихуннай нанисса жула аьдат­ру дуруччияра тIий. МахIаммад АхIмадовлул мукунма бувсунни цала творчествалия. Хъирив шаэр­турал бувккунни шеърирду. Композитор Рамазан Фаталиевлул рурцунни цала произведениярттавасса макьанну. Кьурбанаьли МахIаммадовлул ихтилат бунни Дагъусттаннал халкьуннал аслийсса культуралия, мунил ляличIишиврия, бувсунни халкьуннал искусствалул усттартуращалсса хьунабакьавурттая. Ихтилатру къуртал хьуну махъ Лакрал театрданул артистурал ккаккан дунни концерт ва «Малла Насруттин» спектакльданувасса парчри. Миннуву гьуртту хьунни Аслан МахIаммадов, Луиза Шагьдилова, Саният Рамазанова, ХIажиаьли ХIажиаьлиев, Шамсуттин Къапланов, Ямлихан ХIажиев. Лакку, яру ва чачан мазурдийсса балайрду увкунни ЦIуссалакрал Культуралул къатлул зузалтрал.
Ва хьунабакьаву лайкьну тIайла дуккан хъунмасса хIа­рачат бунни ЦIуссалакрал райондалул культуралул отделданул хъунмур ХIабибат Буттаевал. Ахирданий ЦIуссалакрал райондалул администрациялул бакIчи ХIажи Айдиевлул барчаллагь увкунни хъамаллурахь райондалул агьалинащал хьунабакьин бучIаврихлу ва ши­кку бувсса мюнпатсса ихтилатирттахлу.