Октябрьданул 1-нний «Сочи-2016» форумрал хъаттиралу Да­гъусттаннал БакIчи Рамазан АьбдуллатIипов гьуртту хьунни АьФ-лул ПрезидентначIасса ХьхьичIунмай нанаврил стратегиялул ва приоритетсса проектирдал советрал президиумрал батIаврий. БатIаву хьуссар АьФ-лул ХIукуматрал Председатель Дмитрий Медведевлул каялувшиврулу.

«ХIакьину жува ихтилат банну кIантту-кIанттурдай проектирдал даву сакин даврия, гьарца региондалийсса финансирттал проблемарттугу хIисавравун лавсун. Жура къулагъас дуллантIиссар агьалинал буруккинтту буллалисса масъаларттах», — увкунни премьер-министрнал.
Проектрал управлениялия ихтилат буллай, Дмитрий Медведевлул увкунни: «Проект­рал управление лахьхьин аьркинссар цинявннан, миннавух ХIукуматрал члентурангу. Мунийн чул бивщуну жува уттинин зий къабивкIссару. ЦIана жува байбихьлахьиссару му системалий зун».
Дмитрий Медведевлул му­къурттийн бувну, Аьрасатнал Федерациялул субъектирдай щаллу дуллан аьркинссар софинансирование, яни кIанттул бюджетрава арцу итадакьлан федерал бюджетрава дуллалиминнуцIун.
Проектрал управлениялул метод зузи дурну махъ бювхъунни щаллу дуван реформарттал управлениялул мюнпатшиву. ЦIанасса ппурттуву ишла дуллай бур цIусса технологияртту, мунийну бюхълай бур паччахIлугърал властьрал органнал дянивсса хIала-гьурттушиву цIусса даражалийн дуккан дуван, луртанну ишла дуван региондалул экономика хъин чулиннай даххана даву мурадрай (доходру гьарза дурну, харжлугъ чан дан).
Билаятрай тагьар бигьасса да­къанугу, Дагъусттаннаща бювхъунни сахла дан экономикалул агьамми ккаккияртту. Ларгсса шанна шинал мутталий промышленностьрал давуртту лядурккун дур 1,6-йлла, шяраваллил хозяйствалулсса – 1,2-йлла, дурну дур 5,4 млн. кв. метра къатрал.
Республикалул АПК-раву хьхьичIунсса кIанттурду бугьлай бур ахънилсса ххяххан даврия, интенсивсса багъру баврил ва къюмайтIутIи бугьаврил.
Экономика «чаннайн дуккан даврищал» архIал дуллай бивкIссар бюджетрал харжлу­гъирттал оптимизациягу. Так 2015 шинал оптимизация дурну дур (экономия дурну дур) 3,1 млрд къурушру. Мира давуртту дуллай бур 2016 шиналгу, гьашину харжлугъирттал оптимизация дан тIий бур 4,0 млрд. къурушру.
Властьрал давурттаву агьам­сса кIану бугьлагьиссар инсантурал оьр­мурду мюхчан баврил. «Безопасный Дагестан» тIисса приоритетсса проектран хасну щаллу дуллай бур жяматий­сса низам дуруччаврил ва преступностьрайн къарши буккаврил программа. Ми давурттайну махъсса 3 шинай республикалий къавхьунни террорданул ишру.