Октябрь зурул 5-нний ДР-лул Аьрали комиссариатраву хьунни ссуттилсса призыврал хIакъиравусса пресс-конференция. ДР-лул аьрали комиссар Дайтбек Мустапаевлул бувсунни ссуттихунмай Дагъусттанная аьралуннаву къуллугъ бан гьантIишиву 1530 жагьил. Миннава 300 инсан – национал гвардиялувун, 1230 инсан – личIи-личIисса журалул аьралуннавун.
Интнил призыврал чIумал Дагъусттанная аьралуннаву къуллугъ бан тIайла увккун ур 1790 жагьил, миннава 632 (35,5%) – ларайсса пишалул кIулшивуртту ларсъсса.

А. Аьбдуллаева
— Дагъусттаннал жагьилтал гьан бантIиссар къуллугъ буллан Кьиблалул, Баргълагавал, Баргъбуккавал ва Центральный округирттайн, мукунма Ухссавнил флотрал подразделениярттавун. Аьралуннаву къуллугъ бан наними цала-цала частирдавун тIайла буккантIиссар машинарттай, поездирттай ва самолетирттай.
Аьралуннаву къуллугъ бу­л­лалими дузал буллалиссар дуки-хIачIиялул, аьркинсса лаххиялул. Му бакъассагу, миннахьхьун дулунтIиссар цанна-цаннасса электрон картарду. Ми картардай дувайссар залуннаясса гьарица чичрурду – аьрали учетрай авцIуния тихунай, къуллугъгу лавхъун, запасрайн укканнин.
Дагъусттаннай аьралуннаву къуллугъ бан ччисса жагьилтал буцин ккаккан бувминнаяр ххишала хъанай бур шиная шинайн. Мунийн бувну, аьралуннавун тIайла букканми язи бугьлагьиний хIисавравун ласласи­ссар, цIуллу-сагъшиврул тагьар дакъассагу, пишалул ларайсса кIулшивуртту, дянив­сса техникалул ва дянивсса хасъсса кIулшивуртту.
Мукунма хIисавравун ласайссар ДОСААФ-рал организациярдай кIулшивуртту ларсъсса бушиву, — бувсунни цала ихтилатраву республикалул военкомнал.
Гьарица шинах Дагъусттанная контрактрай къуллугъ бан нанимигу чIяву хъанай бур. Гьашину контрактрай къуллугъ бан лавгун ур 1318 дагъусттанчу (ларгсса шинал – 1800). Чан­сса бакъар жула жагьилтураву АьФ-лул Обороналул министерствалул дуккаврил заведениярттавун буххан ччиссагу. 2015 шинал 783 инсаннансса кIану ккаккан бувну бивкIун бур, ­уххан ччисса 1100 инсан ивкIун ур. Гьашину 830 инсаннансса кIану буллуну бур уххан ччисса 1040 инсан ивкIун ур. Миннава 318 жагьил увххун ур. Вай кка­ккиярттайн бувну Кьиблалул ва Ухссавнил Ккавкказуллал федерал округирттай Дагъусттаннал хьхьичIунсса кIану бугьлай бур, — бувсунни Д. Мустапаевлул.
Ссуттил призыв дикIан­тIи­ссар октябрь зурул 1-нния, декабрьданул 31-ннийн дияннин. ХIакьинусса кьининин призыврал комиссиярттайн оьвкуну бур 1000-нния ливчусса жагьилтурайн. Шиккува кIицI бан, райондалул, шагьрулул призыврал комиссиярттай гьурттушинна дан бюхъайссар призывниктурал нитти-буттаща.
Гьашину призыврал коми­ссиялул сияхIравун ххи бувну бур мадарасса жяматийсса организациярдал вакилталгу. Дайтбек Мустапаевлул бувсунни махъсса 2-3 зурул дянив аьралуннаву къуллугъ буллалисса да­гъусттанлувтурая рязисса биял­сса чагъарду бувкIшиву командованиялул чулуха. Шиккува кIицI бан, мукунсса чагъар бувкIун бур Нижегородский областьрайсса Богородск тIисса аьрали частьрава ЦIуссалакрал райондалийсса ЦIуссачIурттащиял шяравасса Саидов Рамазан Сайгидавовичлул хIакъиравугу.
— Жула жагьилтурал тIул­дакъашивуртту дурсса кIан­ттурду къавхьуну къабикIай, амма мукунсса ишру ялу-ялун чан хъанай бур. На хъунмасса барчаллагь учин ччай ура аьра­луннал частирдал хъуниминнащалгу, къуллугъ буллали­сса жула оьрчIащалгу хъуннасса даву дачин дурсса СаллатIнал ниттихъал комитетрахь, – увкунни ихтилат къуртал буллай Д. Мустапаевлул.
Хъирив ванал журналистурал суаллахьхьун жавабру дуллунни.