Ва кьинилун хасну МахIачкъалаллал 9-мур лицейравугу «Соцветие» цIанилусса Дагъусттаннал культуралул ва мазурдил республикалул цалчинсса форум хьунни. Ва форум батIаврил сакиншинна дурну дия ДР-лул КIулшивуртту дулаврил ва элмулул министерствалул А.Тахо-Годил цIанийсса ДНИИП-рал, ДР-лул Жяматийсса палаталул ва МахIачкъалаллал КIулшивуртту дулаврил управлениялул. Ванивух гьуртту хьунни ДР-лул кIулшивуртту дулаврил ва элмулул министр Шагьаьппас Шагьов, ДНИИП-рал директор ХIамидуллагь МахIаммадов, ДР-лул миллатирттал ишир­ттал министр Татьяна Гамалей, ДР-лул печатьрал ва информациялул министр Бурлият Токбулатова, жяматийсса ишккаккулт ва личIи-личIисса конкурсирттай хьхьичIунсса кIанттурдан лайкь хьусса республикалул школардаясса учительтал.

Залму АьбдурахIманова
Форум тIитIлай, Шагь­аьппас Шагьовлул кIицI бунни чIявумиллатру яхъанахъи­сса Дагъусттаннай миллатирттал мазру, культура ва жулла аьдатру дуруччаву ва хьхьичIуннай дуллалаву му жула агьаммур буржну хъанахъишиву. Ва байран Да­гъусттаннай кIицI лаглан цIакь бувсса Республикалул БакIчи Р. АьбдуллатIиповлул хIукмулулгу тасттикь буллалишиву жула миллатирттал мазру ва культура дуруччинсса шартIру дузал давриха зунтIишиву унгу-унгуну вания гихунмай.
— Дагъусттаннал Культуралул ва мазурдил кьини респуб­ликалий кIицI дуллантIиссар гьар шинах октябрьданул 21-нний. Барчаллагь тIий ура ва форумравух гьуртту хъанахъи­сса министерстварттал каялувчитурахь, шагьрулул идарар­ттал пишакартурахь, шиккун бувкIсса оьрчIахь ва учительтурахь. Жура цачIу дайдирхьу­сса ва даву щаллуну бакIуйн ду­ккан дансса умуд хъунмасса бур. ХIакьину форумрал хахливу дувансса давурттал сияхI хъунна­сса дур. Ванил ахирданий жу аьмну ца чулухун ласунну рес­публикалул школардай ниттил мазрал дарсру дишавриву ва ми лахьхьавриву ци масъалартту, буруккинну бурив ва гихунмай ми щаллу буллалаврил ялув зунну, — увкунни министрнал.
Хъирив миллатирттал мазурдин хасъсса ихтилат бувунни ХIамидуллагь МахIаммадовлул. Ванал кIицI лавгунни хIакьину республикалул школардай ца яла цIурувкьюми, къизгъинми масъалартту мяйжаннугу бавхIуну бушиву ниттил мазрал дарсру лахьхьаврищал. Ва муницIун миллатирттал культура, аьдатругу хъамадитулул хъанахъишиву.
— Жу дакI дарцIуну буру миллатирттал мазурдих бувсса ургъилданул жула билаятрал гуж, кьуват цIакь бантIишиврий. ЦIана вай затру гьанулун лавсун тарбия буллан багьлай бур жула жагьилтал. Миллатирттал идеологиялул гьанурду цIакь бариха зун багьлай бур. Замана бувкIун бур жула мазру бухлаган бюхъайссар тIисса нигьачIишиву дусса, муницIун жулла культурагу, аьдатругу. Мунияту школардай ниттил мазрал дарсру дарс хIисаврай мазрал грамматика лахьхьин баву дакъасса, мазрацIун культура дуруччаврил мурадгу ххи бан багьлагьишиву аьч хъанай бур, — увкунни ванал.
Миллатирттал мазурдий­сса форумрал гихуннайсса даву дайдишин хьхьичI цачIанма бувкIсса хъамаллуран 9-мур лицейрал оьрчIал ккаккан дурунни ххуйсса къавтIавуртту, ниттил мазурдий бувккунни шеърирду ва ккаккан дунни Дагъусттаннай чIявусса мазру цукун лявхъуссарив бусласисса бусалалул инсценировка. Гужсса хъатру ришлай хъамаллурал кьамул дунни вай оьрчIавух лакку мазрай дю­хханну ва лахъ-лахъну дурккусса Новостройрайсса ЦIуссаккуллал школалиясса Султанов Батирханнул назмугу.
Хъирив форумрал гьурттучитурайн хъамалу оьвкунни школалул спортзалданувусса миллатирттал «ккурчIав». Шикку унгу-унгуну най дия республикалул личIи-личIисса школардаясса оьрчIал ва миннал учительтурал хIадур дурсса байран. Миллатирттал нахIу-нацIусса дукрардащалсса, лаххи-ликкия лархъсса, тIахIунттив ва цаймигу хъус дирхьусса гьарцагу миллатрал «ккурчIри» ши­кку щуруй бия. Бия яруссаннал, лазгиял, къумукьнал, даргиял, лакрал, чачаннал, оьруснал, рутIуллал, табасараннал, татнал «ккурчIри». Школа-лицейрал спортзал оьрчIи бувну бия табасараннал бартбисурттал, бархъаллал тIахIунттал, лазгиял ахъул­ссаннул, оьргърал варакъи-гунгунттал ва оьруснал хIазсса балайрдал. Гьарца «ккурчIав», бивщуну гармун-дачIу, зюннав, руцу-бизулий бия.
Шагьаьппас Шагьовлул, ХIамидуллагь МахIаммадовлул ва ваймигу хъамаллурал гьарцагу «ккурчIав» бивну, миллатирттал дукрардал тIин-тIааьнгу ххал бувну, оьрчIащал, учительтуращал яхши-хаш бувна.
ЛяличIину ттун ттунма жула «Лакрал ккурчIа» яла ххуймурну чIалай бия. Ва цуппагу сакин бувну бия МахIачкъалаллал, Каспийскаллал, Новостройрал цаппара школардай ла­кку мазрал дарс дихьлахьи­сса учительтурал ва вайннал дуклаки оьрчIал хIарачатрайну. Ва давривух гьурттуну бия МахIачкъалаллал №16 школалий зузисса ПатIимат Аьлиева, №36 школалиясса Джума Оьмал­аьлиева, № 51 лицейравасса СалихIат АхIмадова, №52 школалиясса Гулизар Аьлиева, №42 школалиясса Фиалка Шамилова, №6 школалиясса Марина Оьмарова; Каспийскалийсса музыкалул гимназиялий зузисса Оксана Аминова, №2 школалиясса Анзират АхIмадханова; Новостройрайсса Шушиннал школалиясса Умамат БахIирчаева, ЦIуссаккуллал школалиясса Рукьижат Султанова. ВайннацIун хъунмасса кабакьу бувну бия Тахо-Годил цIанийсса ДНИИП-рал элмийсса пишакартал Светлана Мутаевал ва Пиразат Магьдиевал. Мукунма вай барчаллагьрай бия шикку цанма кумаг бувсса аьркинний щаллушинна дурсса №9-мур школалий зузисса жула миллатрал учительтурайнгу.
«Лакку ккурчIа» хъиннува чIюлу бувну бия Джума Оьмал­аьлиевал бувцуну бувкIсса бархъаллал лаххи-ликкиялувусса дуклаки душварал. Хъиннува ххуйну чIалай бия Новостройраясса оьрчIал каруннаву ШавкIуллал уссал усттартурал ярагъгу. «КкурчIавсса» ссупралий ишттахI бутанну бия кIарттул ччатI, шархьсса хъюрув, ккуллал къячIив, дикIул буркив, гьавккури, дукьрахIанттил гьарацIи, бурувссаннул ккурч. Вайннух хъиннува ишттахI бутлай лакку макьаннайсса хъинну ххуйсса балайрду щаллу бувна шикку жунма чIявучин кIулсса, № 16 школалий ниттил мазрал дарс дихьлахьисса ПатIимат Аьлие­валгу. ВаницIун гармундалий бавхIуна №42 школалий лап ххуйну цалла даву дачин дур­сса 1-мур ЦIувкIратусса Гъазихан Рамазановлулгу. «Яруссаннал ккурчIа» сакин бувсса №42 школалул гьурттучиталгу кьабивтун, Гъазиханнул экьи нани бувсса гармундалул жуламур «ккурчIагу» лап чIюлу бувна.
Байрандалий гьуртту хьусса Тахо-Годил цIанийсса ДНИИП-рал директорнал хъиривчу, элмурдал доктор, профессор Мисиду Щурпаевал кIицI бувунни, миллатирттал мазурдин ва жулла культуралун хасъсса укунсса журалул байранну чIяву миллат­ру яхъанахъисса Дагъусттаннай дуллалаву му хъинну ххуйсса ва чара бакъа дуван багьлагьисса даву душиву.
— ЧIун наниссаксса, жула ниттил мазрай, лакку мазрай марцIну гъалгъа тIими чан хъанай бур. Мукунма вайми-вайми миллатиртталгу. Ниттил мазурдия жува арх буцаврицIун, арх буцантIиссару жува жулла культуралиягу, жула ппухълуннал аьда­тирттаягу, тарихраягу. Ла­кку маз лахьхьаву, школалийсса ца учительтурахун къабувтун, му жува аьмну, гьарнал цала-цала кулпатирттаву, нитти-бутталгу щаллу буван аьркинсса мурад бур. Школалий дарс дихьлай маз буруччин къашайссар. Муних­сса гъирагу, къулагъасгу гьарнал ужагърай дикIан аьркинссар. Жул институтрал ниттил мазурдийсса литература итадакьаврих, ми хIадур даврих хъунна­сса къулагъас дуссар. Методикалул литературагу, букварь, хрестоматия учинну, хаснува лакку мазрайми, биял къахъанахъи­сса кIанттурду бакъассар. Ми так жула учительтурал цала давриву ишла бан, тIалаври бан аьркинсса.
Жула оьрчIан гъалгъа тIунсса, цаннащал ца яхши-хаш банссавагу даражалий маз лахьхьин бан жула, хъуниминнал, буржри. Жу, элмийсса зузалт, муниха зийгу буссару, — увкунни ванил.
Шиккун хъамаллуравух бувкIсса Каспийскаллал ЦБС-рал хъунмур, «Матери Ро­ссии» щалагу Аьрасатнал су­ккушиндарал Региондалул отделениялул председатель Таиса МахIаммадовал мукунма кIицI бувунни Республикалул БакIчинал хIукмулий ва байран сакин дуваву хъинну ххуйсса, чIявусса миллатру яхъанахъи­сса жулла республикалий агьамсса иширан ккаллишиву.
— Гьаксса ххуйну ва лахъсса даражалий хIадур дурну дур сакиншинначитурал ва шадлугъ. Мяйжаннугу, цал ялагу мукIру хьунна жура хъуннасса дакI цIуцIаву дуван аьркиншиврий ниттил маз буруччавриву. Ттуятува тIайла хьуну, гьарнахь тавакъю буллай бура, хъамамабитару лакку маз ва хIарачат бувара цIанава му лахьхьин ва оьрчIавун муних гъира бутан. На нава вания гихунмай ттула оьрчIал оьрчIащал так мукун къуццу буллансса умудрай бура.
Гихуннай форумрал даву хIалли-хIаллицIух миллатир­ттал «ккурчIрая» ппив хьуна кла­ссирттавух, ниттил мазурдийсса дарсирдал «мастер-классру» буван. Лакку мазраха зузисса элмийсса пишакартал ва учительтал бавтIуна ялувгу кIицI був­сса №36-мур школалий дарсру дихьлахьисса, ларгсса шинал ниттил мазурдил учительтурал дянивсса республикалул конкурсрай 1-мур кIанттун лайкь хьусса Джума Оьмалаьлиевал лакку мазрай дихьлахьисса дарсирайн.
Ахиргу, гьарцагу хъун-чIивинан, хаснува дуклаки оьрчIан, дакIний личIансса, асардал видурцIусса байран хьуна га кьини.