Октябрьданул 7-нний Пятигорскалий хьунни чIяву миллатру бусса регионнай культуралул ирс буруччаврин хас дурсса батIаву. Му хьунни АьФ-лул Президентнал СКФО-райсса вакилнал хъиривчу Андрей Шишкиннул каялувшиндаралу. Мунивух гьуртту хьунни СКФО-лул субъектирдал культуралул министртал ва Оьруснал килисалул вакилтал. Дагъусттанная му совещаниялувух гьуртту хьунни культуралул министр Зарема Буттаева.

Бадрижамал Аьлиева
БатIаврил дайдихьулий Андрей Шишкиннул кIицI лавгунни СКФО-рал регионнал диндалул туризм хьхьичIуннай дуван­сса диялсса луртан душиву.
— ЦIанасса чIумал зиярат­райнсса аьрххирду машгьурну бур, яни округрайсса диндалул туризм хьхьичIуннай най дур. Ккавкказуллал тарих так ца исламрал щюллисса рангирайну ягу оьруснал килисардал мусил рангирайну кьамул бувангу къахьунссар. Му региондалул цимирагу рангирая сакин хьусса хазнар, — увкунни ванал.
Шикку ихтилат буллай, Зарема Буттаевал бувсунни рес­публикалул язисса кIанттурдая ва аьдатирттая, культуралул объектирдая. Дагъусттаннай дур диндалул агьамшиву ду­сса, паччахIлугърал ядуллали­сса 2611 гьайкал, миннуву бур 424 мизит, 8 килиса, 2 синагога. Гьайкаллал аьмсса сияхIраву 31 мизит ва 4 килиса бур федерал агьамшиву дусса.
Диндалул туризмрая ихтилат буллай, Зарема Буттаевал бувсунни Дагъусттаннай, туристурал дянив тIий, зияратрайн наниминнал дянив тIий, хъинну машгьурну бушиву Дахадаевуллал райондалийсса Къала-Къорейш, мукунма Шалбуздаг зунтту. Бувсунни щаллу­сса кулпатрува лагайшиву ми кIанттурдайн, мукунма бувсунни Дарбантлив ва Дарбантуллал райондалийсса тарихрал ва культуралул агьамшиву дусса объектирдая. Мирив микку къачансса бур. Культуралул министрнал бусаврийн бувну, Дарбантлив бивхьусса федерал агьамшиву дусса культуралул ирсирал 25 объект­рая сакин хьусса сияхIрал цалчинмур кьюкьлуву бур Нарин-Къала, Бухмур шагьру ва Дарбантуллал къалалул сооруженияртту, цивгу 2003 шинал Щалагу Дунияллул Ирсирал сияхIравун лавсъсса. БавтIминнал хъунма­сса гъирарай вичIидирхьунни Зарема Ажуевнал Дарбантуллал дунияллул культурардал ва диннал тарихрал музейрая бусласимур бутIух. Министрнал бувсунни му ляличIийсса музей баврил сиптачи хьушиву Дагъусттаннал БакIчи Рамазан АьбдуллатIипов ва музейрал фонд щаллу бавриву хъунмасса кумаг бувшиву цинявппагу конфессиярттал вакилтурал. Мукунма министрнал бувсунни Дагъусттаннай 2013 шиная шинмай тIитIлатIисса Аьра­сатнал Халкьуннал аслийсса культуралул центрдал даврия, миллатирттал аьдатру, багьу-бизу буруччавриву, махъа нанисса никирттайн ми биян бавриву ми центрдал бугьлагьисса кIанттуя.
Андрей Шишкиннул гьаз бунни Ухссавнил Ккавкказнаву культуралул ирсирал гьайкаллу дуруччаврийн багьайсса масъала. Бувсунни цивппа хъирив багьан най бушиву Дарбантлив Нарин-КъалалучIан гъанну закондалийн къаршину був­сса къатрацIун дархIусса тагьарданул.