Уттигъанну на Каспийскаллал автостанциялия Дарбантлив нанисса машиналий щяивкIссияв. Маршрутка пассажиртурал буцIиннингу ларгуна мадарасса чIун. Му чIумул мутталий ца жагьилсса адаминал машиналул махъмур скамейкалулу ца сумка бивхьуна.

ХIажимурад ХIусайнов
Яла гикку щяивкIсса адаминахь: «Ва сумка Дарбантлив автостанциялий ца инсан ласун учIантIиссарча, ванихгу уругу», — куна. Амма ганал: «Ттуща къахьунссар», — куна. Ттун му лахIзалий дакIнийн багьуна, телевизорданувух хьуннав, полициялул зузалтращалсса хьунабакьаврий хьуннав, кIул акъасса инсаннал буллусса пакет, сумка чунчIав биян бува тIий, маласару, ганиву пIякь учай зат дикIан бюхъайссар тIисса жухьрасса бувчIин бавуртту. Гания махъ сумкалул заллу шоферначIан гъан хьуну, ганайн тапшур бувна сумка. Ттун му затгу, шофер, ласунна, къаласунна къаувкуну, рязий шаву хъиннува аьжаив бивзуна. На яла шофернай бювкьу-аьй дурссия кIул акъа­сса инсаннал, ци дуссарив циву къакIулсса, сумка ласун рязий шаврий. Мукунма на тикрал бувссия утти хъинну мугъаятну бикIан багьлагьисса чIун душиву, жула жува къабуруччирча, щилчIав къабуруччинтIишиву, уттигъанну Бакуй хьусса террорданийн къаршисса хьунабакьавурттай Ухссавнил Ккав­кказнаву терроризмалул ххуллу бувгьусса инсантал чIяву хьунтIишивриясса баян баву дуршивугу.
Амма ганал, на тIутIимунихгу къулагъас къадурну: «На зухлу цинявннахлу жаваб дуллалиссар», — куна. «Цукунсса жавабри ина дулунтIисса машина пIякь учин бувну, жу ливтIуну махъ?» — куссия на. Мунихунгу ганал: «ИвчIан ччай акъахьурча, мащяикIара ттул машиналий», — куна. Гания гихунмай­сса ихтилат ххишаласса бушиву ттун бувчIуна.
Мува мутталий жух вичIи­лийсса сумкалул залуннал, лавсун сумка ттул хьхьичIгу бивхьуну: «Шиву зузиний лаххайсса гьалмахчунал лаххияр дусса, га, ичIувасса ишру багьана хьуну, къаувкIунни шихун. Мунияту вай ганачIан шардайн гьан дуллай ура. Ина тIимунийгу на рязиссара», — куну, гивусса лаххия дуккан дурну, ккаккан дурна.
Бурувччуну бикIияра зула зува!