Гьашину 9 зурул мутталий ПаччахIлугърал аьрщарал надзорданул управлениялул дурну дур 403 мероприятие АьФ-лул законнал тIалавшинну дуруччаврин хасну. Миннувату 208 дур пландалийнусса ххал даву (проверка) ва 40 пландалий дакъасса ххал даву, мукунна 155 административсса хъиривлаявуртту ва рейдирдай лавгун дурсса давуртту.
ХIасан Аьдилов
Ххал дурну дур 1,5 млн. гектар шяраваллил хозяйствалул аьрщив.
Закон лиян давуртту ляркъуну дур 11 азаллий 912 гектарданий. Машай дуккан дурну дур 9 азаллий 682 гектар ишла къадуллалисса шяраваллил хозяйствалул аьрщарал. Гьарца кьини тIиссакссагу, Управлениялул ашкара буллай бур къурнин (почва) биян буллалисса зараллу тIабиаьт дуруччаврил объект хIисаврай. Масалдаран, МахIачкъалаллал тIабиаьт дуруччаврил прокуратуралущал цачIу ашкара бувну бур сайки 5 гектар аьрщарай ихтияр дакъа ишла буллалисса карьерду (къун ласайсса кIанттурду). Судирттайн тIайла бувккун бур къурдан 53 204 къурушрансса зарал биян баврил ва ми лахъан бан аьркиншиврул хIакъиравусса документру.
Роспотребнадзорданул управлениялущал цачIу ашкара бувну бур кIинтнил даэлул аьрщив навтлил чапал даврил хIакъиравусса иш, зарал биян бувну бур 21280 къурушрансса. Му иширал хIакъираву хIукму кьамул бувну бур административ жаваблувшиврийн кIункIу бан ккаккан бувну.
ДР-лул Россельхознадзорданул управлениялул ва ДР-лул КIинтнил даэрдал управлениялул цачIу ххал дурну дур кIинтнил даэрдал хозяйстварттал аьрщарал законну дуручлай бушиву. 92 хозяйствалул хIакъираву материаллу чирчуну дур, миннал аьрщарал законну лиян дуллай бушиву тасттикь бувну. Управлениялул деларду сукку дурну дур административ кьяйдарду лиян даврил хIакъираву.
Контрольданул мероприятияртту дуллалисса чIумал кIул буллай бивкIун бур къурдал оьргъашиву зия дуллай бурив ягу бакъарив. Мунин хасну ххал дурну дур 233 къурнил образецру (аьрщарал пробарду). Миннувух диркIссар нигьачIаву дусса химиялул затру душиву тасттикь буллалисса, эктопатогенну , патогенну ва тяжелый металлу душиву, навтлил продуктру душиву тасттикь буллалисса образецру. Хъирив лаяврил хIасиллайну сукку дурну дур 95 административ материал. АькIри дирхьуну дур 1 млн. ва 439 азарда къурушрансса. Ларсун дур 984 азарда къуруш аькIрал.
