Дагъусттаннал аьрали комиссариатрал нарядрайн бувну, МахIачкъалалия аьралуннавун буцин 380 инсан ккаккан увну ур, миннава 70 резерврай бур. Аьралуннавун бувцуми хъунмурчIин къуллугъ буллан тIий бур Обороналул министерствалул, частирдаву, военно-космический гужирдал ва Национал гвардиялул аьралуннаву. Къуллугъ бан буцлан тIий бур 18-27 шинавусса жагьилтал.

— Ярагъуннил гужирдаву хъунмурчIин контрактрал гьанулий къуллугъ буллай бухьувкун, призыврай буцлацими ялу-ялун чан хъанай бур. Инттухунмай 400 инсан увцуссия призыврай, цIана 310 инсан ур. Ттул пикрилий, мигу къачан­ссар. Цанчирча цIана Аьралуннавун буцлациминная чIярусса тIалавшиннарду дур. ХьхьичIра-хьхьичI хIисавравун ласлай бур ларайсса ягу дянивсса хасъсса кIулшивуртту душиву, аьрали пиша бусса бушиву, цIуллу-цIакьшиву, анавар къабуккай­сса, цала цивппа бувгьусса хасиятрал бушиву. ХIасил, аьралуннаву къуллугъ бан хIадурсса ушиву, — тIий ур ДР-лул аьрали комиссариатрал МахIачкъала шагьрулул отделданул хъунама Муртуз Идрисов.
Ванал бусласимунийн бувну, аьралуннаву къуллугъ бан гьан ччисса чIявусса бур. Ссуттил чIумал призыврацIун дархIусса мероприятиярттайн 10 азарунния ливчусса инсантал бучIан аьркинну бур. Миннава чанма-чанну 5 азара инсан аьралуннавун гьан бан бучIисса бикIан най бур, амма гьан бан тIий бур циняв тIалавшиннардал чулуха яла хIадурми.
— Аьралуннавун буцин чIун дирминнаву, къуллугъ баврия махъаллил хъанахъи­ссагу бур. ЧIявучин ларайсса кIулшивуртту ларсъсса жагьилтуран ччай бакъар Аьралуннаву къуллугъ бан гьан. Инттухуннайсса призыврал хIасиллайн бувну цукунчIав аьралуннаву къуллугъ бан къагьанну тIисса инсантурал хIакъираву уголовное дело сукку дан жу дуларду 7 материал ихтиярду дуруччай органнайн.
Амма укунми чансса бур. ЧIявуми жагьилталлив аьрали бурж лахъан ччисса бур. Хаснува 2014 шинал январь зуруя байбивхьуну №170 федерал закон зун диркIун махъ.
Ва закондалийн бувну, багьана бакъанма аьрали къуллугъ къалавхъсса инсан хIукуматрал муниципал къуллугърайн кьамул уллай акъар, — тIий ур Муртуз Идрисов. БувчIлай бур, аьрали къуллугърая махъаллил хьуминнаща аьрали билетгу ласун къахьунтIишиву.
— ЧIявуми призывниктал бачай жу махъаллил хъанай бакъассияв, бувкIссияв призывной пунктрайн тIий. Му кIул бан бигьассар: гьарица призывникначIа дуссар личное дело, микку ккаккан дайссар гьарица му призывной пунктрайн увкIсса чIун.
Агана жагьил оьрмулул 27 шин хьуннин оьвкутари укIлай, медкомиссиягу, цайми аьркинсса процедурарттугу дуллай ивкIхьурча, амма му аьралуннавун къаувцуну ухьурча, цувагу закондалийн мютIисса инсан ухьурча, жу хIукму байссар мукунсса инсаннан аьрали билет булун, — буслай ур Идрисов. Шиннардий призывной пункт­райнгу къаукIлай, повестка гьан дуркун ягу телефондалувух оьвкукун, къулагъас къадуллай ухьурча, му багьана бакъанма аьрали къуллугърая махъаллил хьушиврий хIукму буллай бур. Мукунсса инсантуран дулай­ссар так справка, амма миннаща хIукуматрал къуллугърай бацIан къашайссар.
Аьралуннавун буцаву ма­хъун дутайссар агана жагьил дук­лай ухьурча, ичIаллил, кулпат­рал хIакъи-хIисаврттайн бувну ягу цIуллу-сагъшиврул тагьарданийн бувну, гьан къахъанахъи­сса бухьурча.
Ларайсса кIулшивуртту ларсъсса ва цаймигу тIалав­шиннардайн бувну аьралуннаву къуллугъ бан бучIисса жагьилтураща бюхъайссар къуллугъ бан контрактрал гьанулий. Мукунсса каши сайки цинявн­нахь дуссар.
Муртуз Идрисовлул бувсунни зий бушиву поручительстволул институт. Гьарица аьра­луннавун уцлацисса инсаннал бикIан аьркинссар поручительтал сий дусса, хIурматрайсса инсантурая. Ми бикIан бюхъай­ссар хIукуматрал къуллугъчитал. шагьрулул ва республикалул депутатътал ва м.ц.
Гьарица призывник ххал ай­ссар МВД-лул ва ФСБ-лул информациялул базалий.
Ахир хIукму байссар призыврал комиссиялул. ХIакинтурал ирглий ххал байссар циняв призывниктал.
Вай гьантрай призыврал комиссиялийн бувкIминнаву бур кIилчин, шамилчин бувкIссагу. Дагъусттаннал медициналул академия къуртал бувсса Пайзуллагь Велиханов буслай ур ларгсса шинал цува дуклай унутIий къаувцушиву, гьашину гьансса умудрай ушиву. Аьра­луннавун медициналул къуллугърайн ччай бур, тIий ур ва. Мукуна кIийла, шамийла военкоматрайн увкIун ур Аьбдулкьадир Шамхаловгу. Ва аьралуннал ва хьхьирил флотрай къуллугъ буллан ччай ур.
— Комиссиялул къуллугъ бан бучIи бунни. Умуд бур гьашину аьралуннавун агьанссара тIисса. Аьрали бурж лавхъун махъгу, контрактрал гьанулий къуллугъ буллан ччай ура, ва ххуллий карьера дан ччай ура. ХIакьину аьра­личунал къуллугъ хъинну аьйлий бур, — тIий ур ва.
Аьралуннавун хIадур баврил ва буцаврил отделениялул хъунама Альберт РахIимов буслай ур хIакьинусса кьини аьралуннавун буцайми хIадур баврил план дурну душиву. Му хъинчулий ккаркшиву шагьрулул бакIчинал ва цIакь дуршиву Дагъусттаннал аьрали комиссариатрал.
Дурну дур мукунна призыврал комиссиялийн бувкIминнал сияхI.
ХIакьинусса кьини мукун­сса 250 инсан ур. Гьарица кьини комиссиялул 50 инсан кьамул уллай бур.
МахIачкъалалия бувцуми хъунмурчIин къуллугъ буллан ­тIий бур билаятрал дянивми регионнай.
МахIачкъала шагьрулул администрациялул пресс-службалул управление
ХIадур бувссар
А. Аьбдуллаевал