Аьрасатнал Культуралул министерствалул кабакьаврийну «Саммерфест 2016» тIисса дунияллул халкьуннал фольклорданул фестивальданул лагрулуву август зурул 12-нния 22-ннийн Венгриянаву Сазхаломбатта, Ракеве, Текель шагьрурдай хьунтIиссар Дагъусттаннал халкьуннал творчествалул кьинирду. Фестиваль дуллалиссар 23-чин ва му хъанай дур Дянивмур Европанаву яла хъунмур дунияллул халкьуннал фольклорданул фестиваль.

Ва фестивальданийн Аьрасатнал чулуха наниссар Лаващиял райондалул муниципал ансамбль «Леваши» ва «Эхо гор» тIисса Дагъусттаннал Халкьуннал творчествалул къатлул ва Хасавюрт шагьрулул ансамбльлу цачIун дурсса ансамбль «Дагестан».
ЦачIун дур ансамбльданул фестивальданийн хIадур дурну дур хъуннасса творческий программа. Ккаккан дан тIий ду­сса дур Дагъусттаннал халкьуннал къавтIавуртту (миннувухра цIахъардал, тIиндиял, дидойллал, рутуллал) ва Дагъусттаннал халкьуннал хъатIул аьдат.
ЦачIун дур ансамбльданул репетициялий ДР-лул Культуралул министрнал хъиривчу, ДР-лул Халкьуннал творчествалул къатлул директор Марита МухIадовал, министр Зарема Буттаевал цIания фестивальданийн наниминнахь ххуллухъин тIий: «Зун багьну бур машгьур­сса ва сий дусса дунияллул халкьуннал фестивальданий гьуртту хьун. ЦачIун дур ансамбльданул коллектив ттинингу цимилвагу гьуртту хьуссар кьатIаллил билаятирттай хъанахъисса фестиваллай. ХIайран бувссар дунияллул халкь жула халкьуннал творчествалул ляличIишиврийну. ЦIанакулгу зуйн хъуннасса вихшала дирхьуну дур чIявумиллатру бу­сса Аьра­сатнал чулуха ва фестивальданий гьуртту хьун. Венгриянавусса фестивальгу, цумурцагу магьирлугърал проект кунна, дуллалиссар Европанал халкь цачIун баву, миннал дянив дусшиву цIакь даву мурадрай. Амма ссаяргу ва этнофорумрай Дагъусттаннал цачIун дур ансамбльданул хIарачат бан аьркинссар дунияллул культуралул пространствалуву Аьрасатнал цIа лахъ дан,» — увкунни.
АцIва гьантлул дянив 12 билаятраясса: Аргентиннавасса, Кипрдаясса, Чехиянавасса, Грециянавасса, Польшанавасса, Македониянавасса магьирлугърал усттартурал ккаккан бантIиссар дунияллул халкьуннал магьирлугърал ирс. Дагъусттаннал халкьуннал творчествалул кьинирдал лагрулуву хьунтIиссар концертру ва «Дагестанские умельцы» тIисса этнокультуралул выставка.
Халкьуннал усттартурал выставка чIюлу дурну дикIантIиссар Дагъусттаннал халкьуннал художествалул сянатирттал ва аьдат­сса касмурдал, канил давур­ттал усттартурал дурсса затурдил. Микку бивхьуну бикIантIиссар гьуцIалтIиял къюнартту, табасараннал халичартту, бархъаллал тIахIунтту, унцIукIуллал тIаннуй ва муххай накьич дирхьу­сса затру, миллатрал лачакру ва цаймигу затру.
Венгриянал оьрчIан жула артистурал бантIиссар дагъусттаннал миллатирттал къавтIавуртту, музыкалул инструментирттай руцин лахьхьин буллали­сса мастер-классру.
«Дагъусттаннай «Человеческий капитал» проектрал лагрулуву дуллай буссар жяматрал мяърипат лахъ дансса, инсантал аьдатсса халкьу­ннал творчествалухун машхул бан­сса давуртту. Му мурадрай ДР-лул Культуралул министерствалулгу, Халкьуннал творчествалул къатлулгу сакин дуллай буссар фестиваллу, билаятрал дазул кьатIув гьансса аьр­ххирду. Укунсса аьрххи-ххуллурду хъанахъиссар багьа бакъасса опытну. На чIявуссалила гьуртту хьу­ссара дазул кьатIув. Ва ттуща дакI дарцIуну учин бюхълай бур, Европанал агьулданун дагъусттаннал магьирлугъ ххирассар, куну,» — увкунни Лаващиял райондалул культуралул управлениялул каялувчи Халид МутIалимовлул.
Дагъусттаннал халкьуннал творчествалул кьинирду Венгиянаву дуллалиссар чIявумиллатру бусса Дагъусттаннал ва аьмну Аьрасатнал аьдатсса культура машгьур даву мурадрай, дунияллул халкьуннал культуралул пространствалуву Дагъусттаннал культуралунсса кIану лякъаву мурадрай.
Хан Баширов,
музыкант, Дагъусттаннал Халкьуннал артист,
Аьрасатнал магьирлугърал лайкь хьусса деятель