Ттигъанну на Лаккуя зана хьура. Утти Гъумуквагу, нава кунмасса, къужри ливчIун бакъар. ЦIана Гъумуксса мюрщимигу наванияр бугьара хьуну чIалай бур. Ттухь аврав, чаувкра учин цачIун хьусса ккурандалуву ихтилат багьуна хIакьинусса жула оьрмулия, багьу-бизулия, инсантурал тIул-тIабиаьтрая, мяърипатрая.

Му ихтилатраву ца дяъвилул ва захIматрал ветераннал увкуна: «Утти­сса жагьилтуран, жула бутта­хъан чикъарчу кьанунну хьуну бивкIсса – мяърипат, тIул-тIабиаьт, адав, хIая, ас-намус, къирият, бунагь, хIалал, хIарам, бурж тIисса мукъурттил мяъна къакIулли. Ва уттисса оьрмулуву жула шагьрурдайгу, районнайгу лахъайсса оькки-оьккисса цIуцIавуртту ппив хъанай дур. Къюк, цурк, хъямалашин, гъара, зуна, гужбаву, инсан ивчIаву, къатри бацаву, къатри пIякьчин даву, машинартту бацаву, цIурду щаву – американал телефилмардай кунна, сийлувун дагьну дур. Вай иширттаяту ливтIусса жула нитти-буттан баярча, гай цала гьаттардивува кIура баенссия…».
Нагу, на акъасса махъмигу вай мукъурттил якьама бувнав.
Мяйжаннугу, цир хъанахъимур, щилли ва оь цIуцIаву ппив дуллалисса? Щилли жула тIул-тIабиаьт, инсаншивугу, инсап душивугу лиллалисса…?
Буттал КIанттул цIанийсса Хъун дяъвилул гай захIматсса шиннардий, га ккаши-мякь бусса чIурусса чIумуву я шагьрурдай, я щархъай къахъанай бивкIсса ялурхъяннарал ишру, утти, ххувшаву ларсун ххюцIалла шинал махъ, хъанахъисса циванни? Мяйжаннугу, вай ишру жула идавстуран ххал хьурча, гайнналгума зурзу учинссия!
Мораль-мяърипат кусса мукъул мяъна ххал дан, на тамансса словарьду, яни мукъузаннал луттирду, ххилтIу бав.
Мораль-мяърипат турк мазрай – эбрат, аьрабнал ва парснал – адаб куну бур. С. М. Хайдакьовлул луттирай ва махъ чивчунувагу бакъар, ХI. Б. Муркъелинскийл луттирай мораль – тIул-тIабиаьт, адав, мяърипат: Н.-И. С. Жидалаевлул луттирай – мораль – мяърипат, кьанун, куну бувчIин бувну бур. На ялагу урувгра СССР-данул Элмурдал Академиялул сакин бувсса синонимирттал словарьданух. Гикку чивчуну бур: «Мораль – система норм, определяющих обязанности человека по отношению к обществу и другим людям».
Ттун дакIнин багьунни ттула оьрчIнийсса ва жагьилнийсса оьр­му, та чIумал жунна буттахъал-ниттихъал лахьхьин дуллай бивкIсса тIул-тIабиаьт, мяърипат…
ХIатти ция та чIумал, кIулсса икIу, къакIулсса икIу, цаяра хъунаманал чIарах нанисса чIивиманал ганахь буттауссу, ниттирссугу увкуну, ссалам, ивзрав, урав къакуну гьан, зий ухьурча, «Заннал ка бакьиннав» къачин! Мукунсса уккарча, ганайн учайва: «Ва ци мяърипат дакъасса гъаттарар». Та чIумалсса шяравусса угьараманахь ихтияр дикIайва ччима оьрчIайн амру бан, ганай бигар бишин. ОьрчIащагу учин къашайва «къагьанна», «къабанна» куну. Му дия та чIумалсса мюрщиминнал адав-хIая, хъуниминнал хIурмат баву.
Мукуннасса чикъарчу законну дикIайва, так ца мюрщинан дакъа, хъунинангу. ХIатти ция жямат заллусса хъуслин цу унугу тамахIкар хьун. Му хъинну бунагьсса, кьюкьаласса ишъя. ХIатти ция цува бусурманна тIисса инсан хIатталлицIух, ягу цурдалусса гьаттацIух нани­сса чIумал алхIам къабувккуну чIарах гьан ягу багьсса чару бухьурча, цанма чирилун га гьаз къабан? Му бия инсаннал бурж, адав душиву, ганал духIин.
Шяравун хъамаличу акъасса кIулакъу увкIун ухьурча, га инсан авлий улайва, ягу мизитравун тIайла уккайва. Му дия шяраваллил мяърипат.
Шяравусса кIичIиртту гьарца кьини, гьарца къатлул цала-цалами бавхьуну, чапалшивруцIа марцI байва. Ххуллувун багьсса чIира, лекьру духьурча, гай дакьин дайва. Шяраваллил щиназаннурду – бярду, кьулларду, ратIру щала жямат бувккун бигарданин марцI байва, ххуллурду бакьин байва, лухччая чартту бувчIайва…
Щялмахъ бусаву, хъяврин аву, макру баву, къюк, цурк, зуна баву кунна, кьадарсса, кьюркьусса, ялурхъяннарайсса къеллуя ми. Ми адав-хIая дакъашиврул, ас-намус бакъашиврул, мяърипат дакъашиврул лишаннуя.
Ттун дакIнин багьлай бур Лаккуйгу, Ккуллал райондалийгу, ЦIуссалакрал райондалийгу вай махъсса шиннардий хьу­сса, инсан цири, щаллусса миллат кьюкьин, кьадар буллали­сса къеллу. Пикри барала, цикссаннал къатри бавцур? Цикссаннал ризкьи бавцур? Цими инсан ивкIунни? Жанаваршиву дакъарив цивппа авадан хьун, кIулагу акъасса оьрчI, душ бавцуну лабивтун, гайннах арцу тIалав дуллалаву? Утти жува ми къеллайн, ми иширттайн цири учинтIисса? Мурив ттизаманнул тIул-тIабиаьт, мяърипат?
Гъумуксса пенсионернал увкумур азариллагу тIайлар.
Жула лакрал халкьуннал учай: «юрт бутIу», «щар рутIу», «ил ливу» куну. Ми бучIибакъулт хьхьичIава инсантуравун бу­ккан къахъанай, лабикIлай бикIайссия ягу, цала минардугу кьариртун, ливхъун лагай­ссия. Миннай щилчIав хIайпгу къачайссия. Мукунсса инсантал бавцIусса кIанттай, миннал чIан-ччанну ччучлачи байссия.
Мува чIумал жула щархъаву бикIайва цала тухумрал, ца­ла шяраваллил, цала илданул сий гьаз дуллалисса, цинявннан бусравсса ххаллилсса инсантал. Миннаяту, так ца цаланан бакъа, чIявусса цайминнангу пахру бикIайва, ай жул вагу ­уссар, тагу уссар тIий. Ми мукунсса инсантуралгурив кьадарсса къел даяр бивкIу кьамул бан хIадурну бикIайва.
Вай кьюркьусса кьадар къеллу дуллан жула жагьилтуран щилли лахьхьин буллалисса? Ва хъинну пикри бан аьркин­сса задну чIалай бур ттун. Жунма кIулли хIанхIачулт, тирияк укулт. Му дур къашайшаву. Утти вай жула жагьилталгу, хIанттил ва тириякрал кунма, къашай буллалисса, авлия буллалисса, яни оькки цIуцIаву лахъан дуллалисса зад цири? Гьай-аман, му цIуцIаву жуйнна лахъан дуллай кьатIаллил паччахIлугъирттал телевизорданувух ккаккан ду­ллалисса муданнасса фильмардурагу дакъарив? Жагьилталгу, мюрщисса оьрчIругу телевизордахун бивчуну бур? Ци ккаккан дуллай бур тайннал жунна: битлатаву, литIлатIаву, хъямалашин, гъара, жимяъ, яни секс… Ссаятур ва щияр эбрат ласунтIисса?
Ва масъалалул хIакъираву на рязисса, ттул пикри кIибачI­лачIисса макьалартту дурккунни ччарча кказитирттай, ччарча журналлай, телевизордавух, ихтилат бунни хъинну хIурмат бусса аьлимтурал, политиктурал, диндалул зузалтрал. Тайннал цинявннал тIутIимуниву ца аьмсса мяъна дур. Мугу тай жунна ккаккан дуллалисса фильмрдал жула жагьилтал, ялун нанисса ник лиян дуллай, зия дуллай, аьян дуллай бур тIисса. Тай фильмру кка­ккан дувултрал мурад кьюркьусса, кьадарсса къеллахун жула жагьилтал бичин, ми лиян бан, минная жанаварт, гъаттарду бан…
На цIухлай ура, циванникьай ми ккаккан дулларчагу, миннух буругайсса? Ттучаннуния авлия айсса хIачIиярттал, наркотикалул бувцIуну бухьурчагу, гайннул чIарах лагайсса хъиннува чIявусса бурхха… Жувания я хIачIулт, ягу наркомантал бакъару!
Бурги, жува цукун буруглай буру кьюркьусса кьадарсса къеллах. Ца хьусса иш мисалдаран бусанна.
ДукIу, 1993 шинал, щалагу Дагъусттаннал халкьуннал адабиятрал ва мада­ниятрал байран хIисаврай, кIани-кIанттурдай шадлугърай кIицI дурссия лакрал хъуна­сса чичу-классик, просветитель МухIуттин Чаринов ниттил увну 100 шин шаву. Ми гьантрай М. Чариновлул буттал шяраву – ХьурукIрав ххарисса мажлисгу бувну, шадлугърай, школалул хьхьичI, бацIан бувссия лакрал скульптор Бюрниев Шагьмирзал бувсса бюст. Гьашину шяравун лавгукун, га бюст бусса кIану къалявкъунни. ЦIувххукун, бюстран хьумур цири куну, бувсунни, цурив ца кIулакъул бюстлин, ­аьщуйн кунма, ттупанг бивтун, ягу бакIрайх чарил бюкь бивщуну гъавгъссар увкуну. Ва хавар бавсса цума лаккучунал къачинссар, му ци вахIшишивури? Мукун­сса къел дурманайн цума сси­ттул къауцIинссар?
МухIуттин Чаринов лакрал миллатран цуксса бусравссарив, цуксса ххирассарив аьлтта чIалачIи бувунни уттигъанну МахIачкъалаллал шагьрулий хьусса лакрал халкьуннал ххюйлчинмур съездрайн бавтIсса делегатътурал. Га съезд дайгу дирхьуна, лагу ларкьуна
«Агь, ттул буттал кIануй,
Ла­кку билаят,
Жул цинявнналагу
аьзиз­сса нинуй…»
тIисса, бюххан­сса мукъур­ттийсса, МухIуттин Чариновлул ххаллилсса балай съездрайн бавтIминнал хорданий увкуну.
Миллатран шаэр ххирашиву, ганан бюхттулсса хIурмат, бусрав бушиву цала дакIурдиву душиву чIалачIи бан ялагу ци аьркинссар?
Циванникьай МухIуттин Чариновлул буттал шяраву му аскисса къел дурсса?
На тIий ура, бити шяраву ми циняв му кьини мурчIи хьуну, бити гай циняв къюкI хьуну, ити буттал шяраву МухIуттин Чариновлул маччашиврул кьанкь дияйссавагу къаливчIун икIан …бити!
Амма чуврикьай бивкIсса ялун нанисса никирахь адав душиврул, инсап душиврул, мяърипат лахьхьин дуллалисса Хьурив ва ХьурукIравсса школардай дарсру дихьлахьисса учительтал? Ягу миннал кIунттилагу къабувгьуссарив М. Чариновлул луттирду, учебникру, хрестоматияртту?
ВичIах чIиртту бавурив мяърипат? Оьккисса тIул дуллай чIалай бунува яру лакьавурив адав? Чуври миннал яхI ва къирият?
Машина, оьл, ниц къачинну, хIатта инава заллусса аьнакIул оьрчI бацирчагума, га бавцунайн ина, зайлай, зумух хъамагу нани дурну, иллай, талай уккара. Цанникьай, щалагу миллатрал пахру-ххаралийн ца учIиакъул пуй учин итан? Циванни га учIиакъу танмихIрайн кIункIу къаан? Мукунсса даву къадавурив инсаншиву? Му цукунни бухIлахIисса кIанттул иширал заллухъруннал, яхI-къирият ду­ссар тIисса чиваркIуннал? Щияту нигьабувсун? Учин мукъун, ХьурукIратугума кIия-кIия инсан милицанай зий уссар тIар, аьдлу ва ццугъа буручлай!
Буттал буттахъая шихуннай къархьусса оькки къеллал, аски давурттал эпидемия цукунни лещан дантIисса? Бабаъ цIуцIаву сукку хьувкунния хъинну хъунисса харж буккан бувну, му лещан дурунни. Ва цIана, жула ялун нанисса никирайн дир­сса цIуцIаву ганияр нигьачIисса дакъарив? Жува щихару зузи­сса, жула дахьталну кьабитлатисса цару? Ччянира чIунни ми бавцIу кIанттай миннал чIан-ччанну ччучлачи бан!
Гай яла захIматми дяъвилул шиннардиву, гай яла миллат къумашиврулусса къиялулусса чIумал лакралния тачIав цала яхIгу, чувшивугу, асгу, намусгу кьюкьин къабувна. Уттирив ми хасиятру жула миллатраву духларгсса?
Ца дачIи шинавун Хъуннасса Ххувшаву ларсун 50 шин шаврил байран кIицI дан циняв хIадур хъанай бур. Га Ххувшаву ласун лакрал щиярчIав хъунна­сса дакъа чIирисса даву къадур­ссар. Гай жула вирттаврацIунну жува хIакъирайсса пахругу буллалисса.
Гана гай виртталсса бутта­хъал арсруру зу. Зу буржлув­ссару гайннал цIарду хъиннура бюхттул дан!
Зуру буржлувсса инсапгу, инсаншивугу, тIул-тIабиаьтгу – мяърипатгу дуручлан, абадул абадлий нааьнаравусса чиву бакъултрая, оьбалачитурая!
Юсуп Хаппалаев
«Илчи», 1994 ш., декабрь