ХIАЖИМЯММАЛ ДУШ САЙПУЛЛАЕВА (ШТАНЧАЕВА) САКИНАТ
Хъинну хъуннасса, кьюлтI учин захIматсса кьурчIишиву дирунни ГьунчIукьатIрал шяравасса ХIажимямма ва Сарижат Штанчаевхъал кулпатрал, уссур-ссуннал ялун 11-мур августрал кьини. Вайннал аьзизсса душ, ссу, кIия арснан бишин-битан кIану бакъасса нину, арснал оьрчIан ххаллилсса буттал нину Сакинат хар-хавар бакъасса бивкIулул лавсунни уссур-ссуннал, цуппа бишин-битансса кIану бакъа бивкIминнал дянива.

Сакинат бувну бур 1965 шинал ГьунчIукьатIрал шяраву. Шагьрулийн бивзун махъ Каспийскаллал №8 школагу къуртал бувну, бувххун бур дуклан дарзинал касму-сянат лахьхьин. Замана баххана хьувкун, личIи-личIисса давурттай зийгу бивкIун, яла зун бивкIуна хъатIив бай залдануву администраторну. Хъинну даву кIанийн дагьан дурну дувайсса Сакинат бусравну бикIайва цуппа кIулминнан, цинявппагу уссурссуннан. Цуппагу ляличIину хIаласса, инсантурал дакIния щин хIачIайсса, кумаграл ка тIитIин хIадурсса, аькьлу-пикрилул итххявхсса инсан бия.
Лавгунни нур лархънасса пишлищалсса симангу, цуппагу Сакинат, бивхьунни, апатI хьуну, аьпалувух. Ванил бургъил тIинттал кунна инсаннал дакI гъили лаган дуллалисса пиш къаххал хъанантIиссар утти жун – му ххирану бивкIминнан. ХIайп, ялагу, хIайп.
Шанашу, Сакинат, шанашу, алжаннул къувлул шаний, заназу, Сакинат, заназу алжаннул багъравух. Ина кIулну бивкIминнал вил симан хьхьичIа къагьантIиссар, цивппа дунияллий буссаксса.
Сакинатлул бивкIулул кьурчIи­шиву кIидачIлай, жижара буллай буру ниттихь Сарижатлухь, ласнахь, арсваврахь, ссурваврахь, цинявппа гъан-маччаминнахь, кIулминнахь. Ванин бакъасса оьрмулул бутIа оьрчIан, оьрчIал оьрчIан ххи бувну лякъиннав.
Сакинатлул рухI алжаннул ххари даннав, гьав нурданул дуцIиннав. Ва ххишала бакъа захIматсса бив­кIулул кьадар кьюлтI учинсса ссавур Заннал дулуннав ва аьзизну бивкIминнахьхьун.

Жул мусил чIимучIалий,
Ардая жучIан бувкIун,
Каруннай, хъачIрай бацIлай
Жул дакIру ххари дайсса.

Жул хъару оьрчIи читIуй,
Чаннахь балай учайсса,
Ларзулу кюру бувну,
Жул къатри чIюлу дайсса.

ТIутIаву кIяла тIутIий,
Ххуйшиврул хIайран байсса,
Жул ахъуву хъя куну
Кьинирду чанна дайсса.

Жул мусил чIимучIалий,
ЦIаравун циван ххявхра,
КIюла мусил хъаттирду
КIалашрайн дуккан дуван!..
ГьунчIукьатIрал, Читтурдал, Шахьуйннал жяматру

---

МАХIАММАДЛУЛ ДУШ ИХАЕВА (МИРЗОЕВА) АЬБИДАТ
Хар-хавар бакъасса бала-апатI сававну, оьрмулул 68 шинаву, аьпа­лул хьунни
ГьунчIукьа­тIатусса Ихаева Аьбидат.
Аьбидат бувну бур 1948 шинал ГьунчIукьатIрал шяраву, МахIаммадлул ва ПатIимал кулпатраву. Буттал шяраву школагу був­ккуну, шагьрулийн бивзун, Аьбидат МахIачкъалалив зий бивкIссар личIи-личIисса давурттай.
Аьбидат бия хъинну аьчух­сса дакIнил бутIа буллусса инсан. Чув, ци батIавурттай хьурчангу, ванил мажлис ххуй байва. Балай учин, дялахъру дуван, сий гьаз дан усттар бия. Дуллали­сса давриву Аьбидат хъинну усттарсса, дан-дитан кIулсса хъамитайпа бия. Халкьуннащалгу хIал бавкьусса, ка-кумаг буван хьхьичIунсса бия.
Аьбидатлул бивкIулул кьур­чIи­шиву кIидачIлай, жижара бу­ллай буру ванил оьрчIахь, уссурваврахь, ссихь, цинявппагу гъан-маччаминнахь. Ванин бакъасса оьрму оьрчIан, оьрчIал оьрчIан булуннав.
Цил бунагьирттал аьпа баннав, рухI хъинний дишиннав.
ГьунчIукьатIрал, КIямашрал, Шахьуйннал жяматру

---

Жул ттуруллул
бувгьу баргъ

Арс Бадавинаха

Ттул лякьлул бакI-ххазинай,
Гьантлул хъирив гьантта най,
Ца шин ккуру ларгунни,
Ина зана къахъанай.

КIюрххил буккай ххяххабаргъ,
Вил оьрчIарайн я щайхту,
Къумашиву ххи хьуну,
Яру къявхъатIи бара.

Ина оьрчIний гайз бувсса
Къатрал лултту нани нех,
Чавхь тIий, чарттайх ришлайни,
Вих аьтIиссар учара.

Неххал чIарах бивхьусса
Колхозрал бяълилул багъ,
Мурчал щурщутIи бувни,
Вих зикрилийссар чара.

Вихь бусан къавхьумургу,
Ца-ца хъаралун ца-ца,
Бавкьуну, ххира буллай,
Вил арсваврахь бусара.

Шанашу, арс, абадлий
Алжаннул багъирдаву,
Багъишла бити уча
Ттул ниттихь ва буттахь на,
Ина яан къавхьусса.
Нину Калимат,
ш. ЦIуссаккул

---

Ххирасса ниттирссил Аминатлул аьпалун

Кьадиртссарив дуниял,
ТIутIал кIутIу тIутIисса,
Лавкьуссарив тти яру,
Вил ялун жу бучIайни.

ХIалал бити, ниттирссуй,
Ттуршва миннат Аллагьнахь,
Махъра-махъсса вил лажин
Къанясив хьунни ккаккан.

ДакIний дитанну симан,
НенттабакI тIивтIуннасса,
Зул хьулувух бувххукун,
Зума дакъа ххарисса.

ДакIний битанну ина,
ЧIаравманай аьтIисса,
КъатIайламур тIайла бан
Жан дулунну бавцIусса.

Ниттил кунма, чумартну
Ина оьрмугу бувтссар,
Виричушиврул цIагу
Ччянира хIалал дурссар.

Ина жул дакIурдиву
Буссара гьайчалину,
Бакъассар вин бивкIугу,
Буссаксса вил жу сагъну!

Цинявппагу ина ххирами­ннал цIания Назира,
ш. ЧIяйми

——————————————————————

ХIАЖИНАЛ АРС БАГЪАТИРОВ БАГЪАТИР
Жапасса азаруннища ххассал хьун къавхьуну, оьрмулул 78 шинаву ахиратрал хьунни хъинну хъунмасса бутIа инсаншиврул, хъиншиврул буллусса, чIявучин мяйжаннугу бусравсса, дустал, гьалмахтал чIявусса, ххаллилсса зунтталчу, хIакьсса лаккучу, ХIажинал арс Багъатиров Ба­гъатир.
Багъатир увну ур ЧIурттащиял шяраву ХIажинал ва Гьажардул кулпатраву 1939 шинал. Тай дяъвилул шиннардил оьрчIал кунна, Багъатирдул оьрчIшивугу захIматсса хьуну дур. Школа къуртал бувну махъ увххун Да­гъусттаннал шяраваллил хозяйствалул институтравун (1962-1967) шинал, лавхьхьуну бухгалтер-экономистнал пишагу, зун ивкIссар Ростовуллал областьрайсса «Красный Колос» совхозрал хъунама бухгалтернал хъиривчуну. Цаппара шиннардий зий ивкIссар Шяраваллил хозяйствалул министерствалий, цал хъунама бухгалтернал хъиривчуну, яла бухгалтерский учет-отчетности отделданул начальникну.
Зий уссия Республикалул Госплемобъединениялул хъунама бухгалтерну ва мура отделданул хъунаманугу. 1981 шиная 1991 шинайн ияннин уссия КIанттул промышленностьрал министерствалий учет-отчетности ва финансирттал отделданул начальникну. Яла, махъ, ДАССР-данул Министртурал советрал хIукмулийн бувну, пенсиялийн укканцIа уссия «Дагместпром» Гостерриториальное производственное объединениелий «учет отчетности и контроля» отделданул начальникну.
Багъатирдул щала оьрму лавгссар республикалул министерствардай хъунама бухгалтерну зий. Чув зий унугу, Багъатирдул кка­ккан бувссар цува хъинну грамотнайсса бухгалтер-экономист ушиву, мунияту бусравнугу икIайва цащала архIал зузиминнан, жяматран, цува кIулминнан. Мунищала архIал ия инсантуращал авкьу­сса, паракьатсса, хъярч-махсара кIулсса, дакI-аьмал хъинсса инсангу.
Цала кулпат ПатIиматлущал, цаннай-ца бавкьуну, мяърипат ларайсса, чин эбратрансса кулпатгу дузал бувна. Цибанссар, икъавчIан лявхъусса цучIав акъар.
Багъатирдул бивкIулул кьур­чIишиву кIидачIлай, жижара буллай буру кулпатрахь, арсваврахь, уссихь, ссихь, гъан-маччанахь, агьлу-авладрахь цинявннахьвагу.
Цал гьав нурданул дуцIиннав, алжаннул къапурду тIивтIуну лякъиннав, рухI бигьаний дишиннав. Махънал оьрмурдай барачат бишиннав.
Амин.
ЧIурттащиял жямат

---

ДакIнийхтуну кIидачIлай буру ЧIибил душ Мариян Илиясовал ялун дирсса хъуннасса къумашиву, мунил ххирасса ссил душ
Сакинат
жагьилсса оьрмулий жуятува батIул шаврийн бувну. Махъминнал оьрмурдай барачат бишиннав, Сакинатлул гьав нурданул дуцIиннав.
«Дараччи» клубрал хъами

---

ДакIнийхтунусса жижара буллай, къумашиву кIидачIлай буру «Дараччи» клубрал хъунмур Илиясова Марияннухь ва жула редакциялул зузала ХIажиева Зинфирахь, вайннал аьзизсса инсан – ссил душ ва ссурахъу
Сакинат,
хар-хавар бакъасса апатI савав хьуну, аьпалухьхьун лагаврийн бувну. Цил бунагьирттал аьпа баннав, рухI бигьаний дишиннав.
«Илчи» кказитрал редакция

---

ДакIнийхтуну жижара буллай, кьурчIишиву кIидачIлай буру жула даврил уртакь Чанкура КьурбанмахIаммадовлущал, ванал аьзизсса ссу
ПатIимат
ахиратрахьхьун лагаврийн бувну. Алжаннул ххари баннав, рухI бигьаний дишиннав, махъминнал оьрмурдай барачат бишиннав.
«Илчи» кказитрал коллектив