Августрал 6-нния 12-ннийн бияннин Владимирский областьрай хьуссар жагьилтурал образовательный форум «Территория смыслов на Клязьме» цIанилусса. Му форумрал VI-мур сменалий гьуртту хьуссар Дагъусттаннал паччахIлугърал медициналул университетрал 14 студентная сакин хьусса делегациягу. Миннал му форумрайн ларсун лавгссар элмийсса ва социал проектру.

Дагъусттаннал паччахIлугъ­рал медициналул университетрал студентътурал проектирдавасса ца лавай кIицI лавгсса форумрай лайкь хьуну дур 100 азарда къурушрал лагрулийсса грантран. Грантран лайкь хьусса «Спаси жизнь» тIисса социально-медицинский проект ккаккан дурну дур Диана Султановал. Мунил лагрулий республикалул школарттай, вузирдаву ва ссузирдаву буллан тIий бур личIи-личIисса апатIирттавун багьминнан цалчинсса медициналул кумаг баврин хас бувсса семинарду, тренингру, практикумру. Миннуя­сса хайр-мюнпат цуксса лавай­сса бу­ссарив кIул хьуншиврул, ми булланнин ва бувну махъ анкетирование дуллан тIий бур.
Вай гьантрай ДГМУ-рал ректор Сулайман Маммаев хьунаавкьунни «Территория смыслов на Клязьме» форумрай гьуртту хьусса студентътуращал. Му хьунабакьаврий Диана Султанова тIий бур:
— Жулла проектрал лагрулий республикалул школарттал лавайсса классирттал дуклаки оьрчIахь ва жагьилтурахь буслан тIий буру цалчинсса медициналул кумаг тIайлану цукун буван аьркинссарив, апатI хьусса тагьардануву гьанавиххи къавхьуну, цила чIумал кумаг буван бюхъаншиврул. Пландалийн бувну, пикри буссар республикалул циняв муниципалитетру гьуртту дуван ва давривух. Дуссар проект щаллу даврил план, ккаккан дурну ду­ссар чIун, тренингру даншиврул, ци чIумал ва чун гьантIиссарив ДГМУ-рал студентътал. Уттинин жагьилтурал ва жяматийсса организациярттай дурссар 20-ннийн дирсса тренингру. Амма жун аьркинни арцуйнусса чIаравбацIаву, муляж ва чара бакъасса медикаментру ласуншиврул, мунияту хIукму бувссар му грантран ккаккан дуван, — тIий бур ва ректорнащалсса ихтилатраву.
Сулайман Маммаевлул мас­лихIат бунни МахIачкъалаллал кIулшиву дулаврил управлениялущал кьутIи дуван ми давурттив дуваншиврул, махъ буллунни кабакьу буван проект щаллу давриву.
— Проект цурда диялну хIазсса ва аьркинсса дур. Гьарцаманан кIулну бикIан аьркинссар аварасса, апатIсса тагьардануву медициналул цалчинсса кумаг цукун буван аьркинссарив, мунил хъуннасса агьамшиву дуссар апатIрахьхьун биривминнал оьр­мурду ххассал бавриву, — тIий ур Сулайман Нураттинович.
Вава форумрай ДГМУ-рал студент МахIаммад Султановлул ларсун дур Аьрасатнал Федерациялул ЦIуллу-сагъшиву дуру­ччаврил министерствалул сертификат. Мунил лагрулийсса даву министерствалул биялдаралусса идарарттай цукун, ци форматрай дуллантIиссарив цалсса кIулну бакъар. МахIаммадлул бусаврийн бувну, Аьрасатнал Минздраврал вакилтурал махъ буллуну бур ччясса чIумул мутталий бувчIин буван му даврил хIакъиравусса цимурца.
ДГМУ-рал 6-мур курсирал студент Артур АьлиасхIабовлуйн, цаппарасса цаймигу студентътуравух хIала, лекциярттая махъ оьвкуну бур АьФ-лул цIуллу-сагъшиву дуруччаврил министр Вероника Скворцоващалсса хьунабакьаврийн. Министрнан даши дирзун дур ванал проект ва махъ буллуну бур му щаллу давриву ка-кумаг буван. Артурдул министр­нахь бувсун бур ва шинал ноябрь зуруй Дагъусттаннал медуниверситетраву буван дакIнийсса форумраягу ва оьвкуну бур мунийнгу мунивух гьуртту хьун.
Арсен Ибичаевлул «Волонтерское движение студентов ДГМУ и благотворительный фонд «Паллиативная помощь» цIанилусса проектгу форумрал каялувшиндарал итталун дагьну дур ва му иширайну щаллу даву хъин чулий ккавккун бур, проект цурда грантран лайкь къахьурчагу. Хъин буван къашай­сса къашайшалтран паллиатив кумаг баншиврул, ва проектрал лагрулий ихIсаниятрал фонд сакин дуван дакIний бур, цийн бувну ДГМУ-рал студентътурал волонтер суккушинна щаллу дуллантIисса.
ДГМУ-рал ректорнал махъ буллунни ва форумрай студентътурал ккаккан дурсса циняр проектирттал чIаравацIаву дуван, ми хьхьичIун лирчунугу, къалирчунугу.
— Сентябрьданул 10-ннин ялугьлай ура зуятусса, зулла-зулла проектру щаллу дувансса, планнах, ми иширайну щаллу дуван бюхъаншиврул, шинал мутталий миннуйн бувну зун бюхъаншиврул. Хъиривмур шинал форумрайн зуща гьан бюхъантIиссар зулла проектру щаллу даврил мяълумсса хIасиллащал. Форумрал хъиривсса кампаниялийннин даву гужлан дуван аьркинссар жунна, шайссаксса чIярусса социал проектру хIадур дурну. Планнаву буссар ДГМУ-рал инновационный даврил управлениялучIа жагьилтурал инновационный центр сакин буван, микку щаллу дувантIиссар жулва вузирал студентътурал элмийсса ва социал проектру щаллу дувансса шартIру. Жагьилтурал политика университетрал цIусса каялувшиндарал хьхьичIунсса, приоритетсса направлениярттавасса цар, мунияту ДГМУ-рал шайссаксса чIявусса студентътал кIункIу буллалияра зулла давривун, — увкунни Сулайман Маммаевлул.