ЦIусса Кяхулай поселокрал оьрчIан дуккаврил шинал дайдихьулий ххаллилсса бахшиш хьун най дур цIуну бувсса школа тIитIаву. Август зурул 8-нний шагьрулул администрациялул пресс-службалий хьусса совещаниялий баян бунни, МахIачкъалалив сентябрьданул 1-нний, КIулшивуртту дулаврил байрандалул кьини ЦIусса Кяхулай поселокрай 1300 дуклаки оьрчIансса цIусса школа тIитIлатIишиву.
И. Саидова
ХIакьинусса кьини чялишну дуллай бур школалул лагма-ялттусса кIанттурду, школалучIансса ххуллурду бакьин буллалисса давуртту. Август зурул 20-ннийн къуртал дан най дур хIаятравун асфальт бутIлатIисса ва плитка дакьлакьисса давурттив. Август зурул 25-ннийн кабинетирттавун, классирдавун, столовыйлувун, спорзалданувун, актовый залданувун чани буцлацисса давуртту къуртал дан тIий дур. Шагьрулул кIулшивуртту дулаврил управлениялул хъунама ТIагьир Мансуровлул кIицI лавгунни вай цинярда давурттив дурну къуртал дан аьркиншиву дуккаврил шин дайдишиннин.
Совещаниялий кIицI лавгунни Дагъусттаннай школартту баврил масъала хIалли-хIаллих тIий щаллу хъанай най бушиву. Ларгсса шинал Семендер поселокрай бувссар 1296 дуклаки оьрчIансса школа. Чялишну най дур Ак-Гель микрорайондалийгу 804 оьрчIансса школа буллалисса давурттив. 2017 шинал тIитIин дакIний бур ва школагу.
