Ахиргу букIлан бивкIунни жучIанма цинявппагу лакран­сса, гьарцаннан ххира хьунтIисса, лакку мазрайсса кказит «Илчи». Гьаксса хъунмасса хIаллай ялугьлай бивкIру ваних. Ца­хьхьун цIуллушиву дулуннав, каши хъун даннав ва тIитIаву мурадрай ца махъ бухьурчагу бувснал, ца хха бухьурчагу чивчунал!

Гьаксса бувчIинну бувсун бия редактор К. ХIусайнаевал цалчинмур номерданий рирщу­сса «Аьзиз­сса миллатран хъинбала буллан» тIисса макьалалуву ва кказитрал мурадрая. Цамур бакъахьурчагума, циняв лакран баяванссар цала аьрщарал арсваврая, цив­ппа яхъанай бухьурчагу Лаккуй ягу ЦIуссалаккуй, Дагъусттаннал шагьрурдай ягу Москавлив, Украиннаву ягу Туркманнаву, Азирбижаннаву ягу УзбакIнаву. Баяван­ссар миннан ци ххаришивуртту, мурадру, цIуцIавуртту дуссарив лакрал. Мийрив жула чансса бакъар. Гьарца шяраваллил, гьарца кулпатрал цила цIуцIаву дур. Миннуя, гьай-гьай, кказитрай чичланссар. КутIану учин, «Илчи» хьун аьркинни мяйжаннугусса жула миллатрал кказитну.
На бусанна уттинин бувкIсса шанма кказитрал хIакъиравусса ттула пикри.
Цалчин, цIанакул жунма къааьркинни нюжмардий цал буккай­сса хъунмасса кказит. Му бухьурча хъина нюжмардий шамийла буклай «Дагъусттаннал правдалул» къалипрай. Циван? Кказитрал буккулт бур зузалт, хъузалт, ризкьичитал, дуклаки оьрчIру, интеллигенция. Вайннавату нюжмардий цал буккайсса кказит буккин бюхъанссар так ца интеллигенциялуща. ДакI дарцIуну ура: минналгума цинявннал щалва къабуклантIиссар. Яла миннан хъиннува захIмат хъанантIиссар. КIира чIапIуйсса кказитрив ххал бангу, буккингу бигьассар. Цал урувгун буккул укун­сса кказитрай кIул байссар цала цумур макьала дуккинтIиссарив, цумур кьаритантIиссарив.
КIилчин, кказитрал хIазмур – макьалартту чIярумурди. Муний чара бакъа бикIан аьркинссар цIусса хаварду. Ва хъанахъиссар кказитрал яла ягьамми буржирдавасса цану. Нюжмардий цал букларчаннив цIусса хаварду «хъунив» хъанан бикIай.
ЦукунчIав хъамабитан къабу­чIир «Илчилул» бурж бушиву лакрал буккултрахь жула районнай, шагьрурдай, республикалий, щала билаятрай, хIатта дунияллий хъанахъисса яла агьамми иширттая кутIану бухьурчагу бусаву.
Гьарца буккун цанма кIулссар мюрш макьалартту дакъасса кказит хIазсса къабикIайшиву ва му буккин гъира къабикIайшиву, цуксса ххуйсса хъуни макьаларттал му бувцIуну бунугу. Кказит сакин байсса, чичултран бакъарча, бу­ккултранни.
Уттинин бувксса жула «Илчилирив», хъинну хIазсса, жунма ва махъа нанисса никиран кIулну бикIан аьркинсса затру чивчуну бунугу, лап хъунисса, яру нигьабусан буллалисса макьалартту дия. На учивияв, кказит журналдануха лахьлай бур, мунийсса макьалар­тту журналданул макьалартту дур, куну. БучIия укун ва кказит итабакьлан, агар жула миллатрал цамургу чIун-чIумуй буккайсса кказит буссания.
Ттунма ккавккун тIий кIулли: кказитрал даву захIматсса давур. ЦIуну байбихьлахьисса кказитрай зун – кIилийну захIматссар. «Илчилул» зузалтрал колектив уттигу щаллу хьуну бакъар, мунияту анавар къабукканну аьй-бювкьурду миннай дувангу. ДакI дарцIуну ура миннал «Илчилия» жунма ччикунсса кказит баншиврий. Аммарив жула, буккултрал, кумаг бакъа миннан хъиннува захIматссар. Гьарца шяраву, шагьрулий, шама лаккучу уний чара бакъа «Илчилул» кумагчи икIан аьркинни. Ялар муния авадансса, хIазсса, буккин гъира багьансса кказит хьунтIисса.
Ца цамургу. ЧIалачIиссаксса, кказитран цIа дизайни ххуйну пикри бувну бакъар. Аьпа баннав цал Саэдхъал Гьаруннул ва цIанищалсса кказит буккан буллай ивкIсса. Та чIумал цIагу, кказитгу бухьунссия цала чIумуха лавхьхьусса. Уттирив жула кказитран бучIир цамур цIа дизан. Цукунсса дизантIиссарив бучIир буккултращал маслихIат бан.
Ххуллухъин баннав вин, «Илчий», захIматшивуртту дух дуллай, халкьуннал мурадру щаллу буллай, миллатраха зун!
Сулайман ХIажимурадов,
ЦIуссалакрал райондалул «Лениннул ххуллийх» кказитрал редактор, СССР-данул Журналистурал союзрал член
«Илчи», 1991 шин, февраль