Марияннул гьаттай тIутIал кацI бишайнисса щугълурду ва шаэр Р. Рамазановлул «Бюхттулний бяливчIса балай баллайнма личIан» тIисса макьала дурккун махъ хIасул хьусса пикрирду.

Мариян! Лакрал балайлул Эверест!
Дагъусттаннал ттизаманнул Анхил Мариян! БивкIу бакъасса булбул! Миллатрал магьирлугърал мусил тажираву­сса абадул якьут! На вичIан, вил гьаттай тIутIив дишин увкIссия ина ниттил бувну 60 шин хьу­сса кьини. ВичIан таний бувкIун бия, цикссагу вил бивкIу ба­къасса балайлуйн икрам буллалими, чIявусса агьлу.
-Агь, вай шинну анаварну лирхъун нанисса куц! Ларгунни танияр шиннай мукьра оьлуркьусса, ччанарккусса шин. БувкIру жугу, кIия-шама вил цIагу балайгу дакIния къадуккайми, кьадарсса ккуллалул ина бувтсса кьини вил гьаттай цIунилгу тIутIал кацI бишин. Лажинни ина бакъа 25 шин хьуссарив? Жуяр хьхьичI вичIа бивхьуну бия хъун ба­къасса тIутIал кацI. Бивхьуьун­ссия душваврал, ссил… Бишарду жугу. ДакIурдивунгу пашман­сса щугълурду багьунни. Шийва личIансса дунияллий цучIав акъассархха, гьанссару та-бунугу нагу, шаэр Рамазангу, Баширхъал Хангу, жул пикрилул уссурвалгу. Лажинни яла вил гьаттай тIутIив дишин цучIав къаучIантIиссарив?
Юх. Мариян, хъиннува чIяву­сса букIлантIиссар. Зун­ттул бюхттулшиву архнияр ххал шайсса. Ялун нанисса никиран вил бюхттулшивугу чIумул манзилданияту хъиннура мяълумну чIалантIиссар. ХIакьину вил гьаттай хьхьичIава кунма чIявусса агьлу къабучIаврийгу аьй мадара, багъишла бити ми. Аьй дансса кIанугу бакъархха. Цавай бур хъус-кьинилул, давраннал хъюрду дурцIуну, гай лази-лакьи дуллай, гай канища къадуккан вас-ццах тIий. Гайннан яла ххирамур музыка бур арцул хяр-хяр, яла язимурну бур мусил цIай-цIай. Инагу, вил балайгу гайннан ча дакIний бикIанссар! Гайми чIявуми тIурча синхралну лечлай бур букансса ччатIул касакрах, кулпат ябансса дуланмагърах луглай. Вайгу, байчаратал, балайлулсса буллай бурив…
Ялагу жу багъишла бити, Мариян, миллатрал рувхIанийсса оьрмулул лишан ина бунагу, гьарцагу аслийсса лаккучунал дакIниву мудан ина бунагу, вил аьпалун, вил цIагу, гьунаргу ялун нанисса никиран чIумул лиххан дурну, хъама кьаритан­сса вари чинсса за уттигу кьадурну тIий. Вил цIа уттигу цавагу кучалун, школалун, идаралун къадирзуну тIий. Паракьатну дикIуча вил рухI. Мариян, мигу дантIиссар чара бакъа! Миллат сагъну буссаксса, магьирлугъ сагъну дуссаксса, Рамазанов Рамазан, Баширхъал Хан, миннаха лавхьхьусса цайми патриотътал жула миллатраву буссаксса.
Уссу, Рамазан, вин хъунмасса барчаллагь миллатрал мазрахгу, магьирлугърахгу ина дуллали­сса аякьалухлу ва даврихлу! ЦIуллу аннав ина, миллатран чан къааннав! Шаэрнал цIу бусса мукьуй ина Марияннуягу, Марияннул балайлуягу увкумунин ттул ххи-чан бансса бакъар. Так ттул хъунмасса миннатри лакрал агьулданухь, вай Рамазаннул июльданул 7-нний «Илчилий» ва уттигъанну «Зунттал хъами» журналданий рирщусса макьалартту мюрш бивкIун, дакIнивун ва бакIравун ларсун, дуккаву.
Нава тIурча, Рамазаннул тIимуницIун барчаллагьращал акьлай, ттула чулуха бавияв укунсса маслихIатру:
1.Чара бакъа буван Марияннул цIанийсса фонд. Мунил агьамми масъаларттугу – гьарца Марияннул цIа абад дан дуллалимуницIун ка-кумаг буллалаву; Педуниверситетрал музыкалул факультетрай, музучилищелуву ва культуралул колледжраву Марияннул цIанийсса стипендия булаван гьунар бу­сса, ялун буклакисса зунттал балайчи душвавран; байраннай, конкурсирдай хьхьичIун бувксса жагьилсса балайчитуран Марияннул цIанийсса бахшишру дуллан;
2.Ваниннийн кIира-шанна шинал хьхьичI гьаз бувну бу­ссия Манияннул цIа Гъумучиял магьирлугърал школалун дизан. Хъирив лавну, му масъала щаллу бувну къуртал бан.
3. «ЦIубарз» ккурандалул, «Дараччи» хъаннил клубрал ва музыкальный обществалул правлениялул цачIусса оьвчаву дан Культуралул министерствалийн, Республикалул халкьуннал творчествалул къатлун (Дом народного творчествалун) Марияннул цIа дизара тIисса.
4.Мира кураннал чулуха чичин чагъар МахIачкъалаллал шагьрулул хъунаманайн, шагьрулийсса ца сахIибул-хайр ду­сса кучалун Марияннул цIа дизияра тIисса.
5.Мариян яхъанай бивкIсса, зий бивкIсса къатрай лачIун мемориальный ултту дан. Мукуннасса ула лачIун паччахI ххуллуя Шахьував кIура баллалисса дуламалучIагу.
6.ХIадуршиннагу дурну, ларайсса даражалий кIицI дуван ялун нанисса шинал Мариян ниттил бувну 65 шин шаву.
7.Ми гьарза щаллу буллан личIи бан сакиншиннарал комитет: Баширов Хан – председатель, Рамазанов Рамазан – заместитель, Илиясова Мариян, Штанчаева Асли, Къиштилиева Мериджан, аьркин хьурча цаймигу.
Умуд бур, ялув кIицI лавгсса Рамазанов Рамазаннул «Илчилий» ва «Зунттал хъами» журналданийсса макьаларттаву ва ттулмур чагъардануву гьаз бувсса масъаларттал хIакъираву цала-цала пикри бусанссар лакрал жяматрал, цикссагу Мариян ххираминнал, Мариян кIулнал тIутIисса. Умудрай, ялугьлай буру!
Киров Султанов
«Илчи», 2000 ш., октябрь