Вай гьантрай МахIачкъалаллал администрациялий хьунни шагьрулул бакIчинал хъиривчу Аьбдулмуъмин Ибрагьимовлущалсса пресс-конференция. БатIаврил савав дия шагьрулул кIичIирттаву махъппурттуву ччюрк къадукьлай, му масъала ссайн буклай бурив хъирив лаянсса.

З.АьбдурахIманова
Шикку бакIчинал хъиривчунал кIицI лавгунни, ччюрк­лил масъала МахIачкъалалив, сайки укунсса чIявусса хъуни шагьрурдайгу бушиву, ца яла зума-ккарччулусса ва ца цIурувкьюсса. Ванал бусаврийну, бакIрайва жула хъуншагьрулий вайксса халкь яхъанан­ссар тIий му иш хIисавравун лавсун, мукун гуж бусса инфраструктуралул щаллуну бакъа­сса бур. Ялттува хIисав бувну, МахIачкъалалив ца миллиондалуха ливчусса халкь яхъанай бу­сса бур. Мунияту ччюрклил масъала ЖКХ-лул щаллу хьуну, чулийн къабуккайсса, чIа –чIаннин гьаз шайсса масъала бур.
-Ччюрк гьарза хьуну дур шагьрулий, ми дукьансса техника тIурча диял хъанай да­къар. Ва даву дан цала бакIрайн лавсъсса компаниялул му ишгу хIисавравун лавсун, цила гужирах бурган аьркинссия. Цищава му даву дуван хьунтIий бурив ххал бан аьркинссия. ЧIалачIиссаксса вай затирдах къулагъас дурну дакъар. Мунияту цила чIумал ччюрк дукьай­сса графикгу шагьрулий бакъар. Яла-яла ччюрклил масъала ягин шай гъинттул чIумал. Шагьрулул администрациялул хъуннасса къулагъас дуссар ва тагьарданух. Ларгсса нюжмардий хIасул буварду ва иширал ялув бавцIуну зунтIисса комиссия. Му зий бушивугу чIал къавхьуну цинявн­нан чIалантIиссар.
Ччюрклил масъалалуцIун жула шагьрулий ца цамургу щаллу хьуну, бакIуйн къабуккай масъалану ванал кIицI лавгунни заллу-зал акъа кIичIирттавух, ми ччюрк дичай кIанттурдай пух-пусур канай занази­сса ризкьи.
-Шагьрулувух ризкьи заназаву му чун нанисса ишри. Яла халкьуннал канай, хIачIлай бур миннуща ттирзусса накI, дур­сса дуки-хIачIия. Ччюрк дичай кIанттурдайх заназисса гъа­ттарал ци накI дулунссар? Антисанитария учайссар мунийн. Махъппурттуву шагьрулий ризкьи ябуллалисса халкьгу чIяву хьуну бур, ми кIичIирттавух, тичча-шичча буклакаврия рязисса заллухъругу гьарза хьуну чIалай бур. Зула ризкьилул заллушиву дувара тIисса жул оьвчавурттах къулагъас къадуркун, жун багьунни кьянкьану ва иширачIан гъан хьун. Ттинин жу мукунсса лухIи ризкьи бувцуну, шагьрулул УЖКХ-лул базалувун бакьай­ссия. Заллу хъирив къаукIлай, лахъи лаглай буну жун ми итабакьин багьайва. Цанчирча миннун ххулув, корма дичин багьлай бия. Утти тIурча шагьрулул Шяраваллил хозяйствалул управлениялул зузалтрал дакьин дурну, цIу дурну заллу-зал акъасса ца ферма, миккун бакьарду лахьхьу-цархьхьу мукун ца залуннал бакI-магъ дакъа кьабивтсса ризкьи. Микку дуссар ризкьилунсса лазуни, миннух ургансса гъа­ттарал хIакин. Цала ризкьи махъунмай буциншиврул залуннал утти аькIлун дулун аьркинссар ца бакIрах 3000 къуруш, ризкьи шиккун буцаврих 500 къуруш ва фермалий миннух дурсса аякьалухгу 500 къуруш. Ахиргу мадарасса арцу дулун багьантIиссар цала хъуслил заллушиву дуван къакIулминнан,-бувсунни Аьбдулмуъмин Ибрагьимовлул.
БакIчинал хъиривчунал ва иширал хIакъираву ххи бувунни, хъиривва мукун аьчIа дулун къаччисса заллухъру фермалул лагмасса чапар гъагълай, биллай-талай бувкIун бивкIшиву. Администрациялул ва низам дуру­ччай къуллугърал зузалтрал ва иш ури хьун къабивтун, багьай­сса ххуллу лавсшиву.
Ахирданийгу Аьбдулмуъмин Ибрагьимовлул цIунилгу тик­рал бунни, ччюрклил масъала чIал къавхьуну «Эко-М» компаниялул щаллу бувантIишиву ва администрациялул миннан дагьайсса арцулмур суалгу щаллу буллай бушиву.