ДР-лул Шяраваллил хозяйствалул министерствалул прессалул къуллугърал бувсмунийн бувну, Дагъусттаннал кIинтнил даэрдаяту ятту зун­ттавунмай куч банну гьашину республикалул бюджетраву ккаккан дурну дур 14 млн. къуруширттал. Арцу итадакьлантIиссар ца яттил хIайвандалун 60 къуруш хIисавну.

Министерствалул бувсмунийн бувну, цIанасса ппурттуву ятту гъинтнил зунттал лухччайн куч баврил давуртту къизгъинну най дур. Цаппара нюжмардал дянив хIухчалтран аьркинссар кIинтнил даэрдая сайки 1,5 млн. яттил бизан бан зунттавунмай. Яттил ттурзанну зунттавун бачин бантIиссар сайки 10 азаллихъайсса хIухчалтрал ва миннал кумагчитурал. Яла архми районнайн ятту биян тIий бур 25 гьантлул дянив.
Ятту куч бавунияр, мунийн хIадур шавугу къабигьасса давур. ЧIиру бувну махъ, аьркинссар профилактикалул давурттугу щаллу дуван – вакциналул ххалаххив буван, ятту букьан ва купка дуван. Яттил купка дайссар Къизилюртуллая арх бакъа Чирюртуллал купка бай­сса кIанай ва Хасавюртуллал ветеринариялул участокрай 14 зунттал райондалийн нанисса яттил ттурзанну. Му хъинну захIматсса давур хIухчалтран.
Ятту куч буллан байбивхьунни цалчин Бабаюртуллал райондалийсса даэрдаяту. Тикку кIинтнил даэрдай бивкIссар 20-нияхъайсса зунттал районнаясса 193 азарва ­яттил хIайван. Тикку яттил чIиру бавугу ххуйсса тагьарданий хьуну дур, 91% чIируннал лавсун бур.
Ятту зунттавунмай куч бавриву хIарачат буллай бур Гумбетуллал, ТIиларатIиял, Лакрал ва Бущихъиял районнал хозяйстварттал.
ХIадур бувссар
ХIасан Аьдиловлул