Ахъушиял райондалийсса Бархъаллал шяраватусса Оьмардул арс Оьмаров Аьвдуллагь увну ур 1937 шинал июнь зуруй. 1950 шинал цала шяраву къуртал бувну бур 7 класс. 1954 шинал май зуруй зун увххун ур «Сулакгэстройрайн» Э.Т.Л. электромонтерну. КIира шинавату 1956 шинал увцуну ур аьрали бурж лахъан Совет Аьралуннавун. 1959 шинал, цалва буржгу лажин кIялану лавхъун, зана хьуну ур шавайн цува зий ивкIсса «Сулакгэстройрайн».
Шикку ва энергохозяйствалийн кьамул увну ур. 1961 шинал Аьбдуллагь зун гьан увну ур «Кавэлектромонтажравун», мунин савав хьуну дур «Сулакгэстройрал» даву лакьаву. Шикку 4 шингу дурну, 1964 шинал Оьмаров Аьбдулла лавгун ур цамур даврийн. Зун ивкIун ур В. И. Лениннул цIанийсса «Каскад Чириюртовских ГЭС»-рал ЭТЛ-даний электро-монтер-релейщикну. Шикку зий уна, хьхьувай дуклай, къуртал бувну бур дянивмур даражалул школа 1970 шинал. Гара шинал увххун ур заочнайну Иваново шагьрулийсса техникумрал энергосистемалул релейный защиталул ва автоматикалул пишакартал хIадур байсса отделениялийн. Аьбдуллагьлул, зий уна, къуртал бувну бур Щалагу Союзрал энергетикалул заочный техникум. 1980 шинал ва ивтун ур ЭТЛ Линиялул хъунаману. 1985 шинал Оьмаров Аьбдуллагьлуя хьуну ур ЭТЛ-данул начальник, мугу ва хъинну цалла даву ларайну кIулсса уну тIий.
2006 шинал Аьбдуллагь ивтун ур релейный защиталул ва противоаварийный автоматикалул участокрал хъунаману. Тай хьхьичIвасса Совет хIукуматрал тарбия дуллусса халкь ххишала бакъа цайнна тапшур дурсса даврий лажин кIялану щилчIав аьйб къаданну зун бикIайва. Мукунминнавасса ур ва жула Оьмардул арс Аьбдуллагьгу. ЗахIматшиврух къаурувгун цалла даву марцIну, цила чIумуй биттур дуллай аьдат хьусса. Ва мудангу цала даврий эбратрайну зий ивкIун ур.
Хъуннасса вихшала аьркинсса къуллугъ тапшур буван ванан цукунсса захIмат бишин багьссарив чIалай бур ванал наградный листравату.
1966 шинал дуллуну дур Дагъусттаннал Верховный Советрал Президиумрал ХIурматрал грамота; 1967 шинал дуллуну дур Совет хIукуматрал 50 шинал юбилейрай ХIурматрал грамота Дагъусттаннал электроорганизациялул зузалтрал обком профсоюзрал чулуха;
1967 шинал дуллуну дур СССР-данул энергетикалул ва электрофикациялул министерствалул ХIурматрал грамота; 1969 шинал дуллуну дур Дагъусттаннал Верховный Советрал Президиумрал ХIурматрал грамота; 1970 шинал – юбилейный медаль «К 100 летию В. И. Ленина»; 1971 ш. – «ЗахIматрал ЯтIул ттугълил орден»; 1972 шинал чIярусса шиннардий бувсса захIматрахлу лайкь хьуну ур Дагъусттаннал Госсоветрал ХIурматрал грамоталун; 1986 шин – хъазамраву лачIайсса «Отличник энергетики и электрофикации СССР» лишан; 1990 шин – «ЗахIматрал ветеран» медальданун; 2001 шин – хъазамраву лачIайсса значок «За заслуги перед обществом»; 2005 шин – ХIурматрал грамота «Дагэнерго» ОАО-лия; 2011 шиналгу – ХIурматрал грамота.
2008 шинал дуллуну дур мусил ссят ДР-лул Президентнал.
2014 шинал – ХIурматрал лишан «10 лет ОАО РусГидро»; 2015 шинал Оьмаровхъал кулпат лахъан бувну бур «Люди света» тIисса луттирайн. РусГидро. Москва. Дагестанского филиала ОАО «РусГидро».
Укунсса яхIлил чувтал лакрал миллатраву чIявусса бур. ЦIуллу аннав ина, Аьбдуллагь.
Амин Аьбдуллаев
