Гьунар ххисса магьирлугърал ахттарчи, Дагъусттаннал паччахIлугърал филармониялул концертный отделданул начальник София Кьурбановна Разуева юбилейращал барча буллай ура.
Ххирасса София Кьурбановнай!

Ва бигьа бакъасса, ччанавкку­сса заманнай, бусала аьлттумуния, чIихь макIлия личIи дан захIматсса чIумал, агьалинавух ппив хьунни укунсса бусала. ЧIатIаракIру кунмасса бивщу мукъурттил заллухъру, оьрус зумуну учин му­къул хъирив жипливун къабуххайсса КкуллачIа 19-мур аьсрулул ахирданий, 20-мунил дайдихьулий ­оьттул гъансса Аьйша-Разухъал ва Сайма-ХIасанхъал тухумирттаву хьуну бур ирсирай нанисса Узул Къиза, Къизал Узу буллай нанисса мукъул усттартурал щатIи. Махъва-махъмур Узул, Узу Шамилчинмунил 1966-ку шинал июнь зурул 4-нний чIаландаран душ бувкун, утти къарттан цIарду дизлайнма бикIаннув, куну, Къиза къадирзун, София дирзун дур. Амма цIа да­ххана дурнугу, ганин оьрмулул кьадрай мукъул усттаршиврул ва магьирлугърахсса ччаврил аьш кьариртссар тIар Аллагьнал. Мархрайри ккиж ххяххайсса. Шиччар тIар София Кьурбановнал оьрмулул лахIзардугу – дакIнийхтуну ччисса касмугу, сакиншиндарал гьунаргу нанисса.
АцIниясса шиннардил хьхьичI «Илчилий» бувксса, гьунар лавай­сса шаэр ва журналист, мудан жулла дакIурдивунасса «Илчи» Рамазаннул вияратусса макьалалуву уссия вийн Лакрал маданиятрал «самородок» ва магьирлугърал «самоцвет» тIий. Мукунсса мудангу бурахха ина! Учкъулалий классраву хьхьичIунминнаву – дарсирдал «мукьварду-ххюварду», суратрал ва балайлул марцIсса «ххюварду». Школалул хорданий – запевала, драмкружокраву цалчинсса, си­къаслайнмасса шару.
Буттал шяраву 10 класс був­ккукун, Дагкультпросвет училищалувун бувххун, 1985 шинал гагу ЯтIул дипломращал, «организатор массовых мероприятий» тIисса касмулий, къуртал бувну, таман­сса шиннардий зий буссияв Республикалул Халкьуннал творчествалул къатлуву лакрал культуралул хьхьичIунма специалистнал къуллугърай. ТIайланма учин, дахьва зун байбивхьусса жагьил­сса душнин къабигьасса ва жаваблувсса даврий. Тикку ина сигу-сивсунав, бигьа дакъасса давугу кIанийн дуртуна, лархьхьуна. Ги­кку зий буна, заочнайну къуртал бувна ДГУ-лул Дагъусттаннал филологиялул факультетгу. Вил бюхъугу, кушугу чIалай, гичча ина бувцунав Дагъусттаннал паччахIлугърал филармониялул яла агьаммур ва захIматмурну хъанахъисса концертный отделданул хъунмурну. Вай 15-16 шинай шикку ккаккан бунни ина вилва бюхъугу, профе­ссионализмагу. Вил сакиншинначинал ва художник- оформительнал сипталийну цIусса даражалийн гьаз хьунни филармониялул мюрщи оьрчIащалсса ва цивппалу ливчIсса къари-къужращалсса яхI-цIимилул (благотворительный) даву.
Ина дурсса ва дуллалисса, профессиональный дикIу, жяматийсса дикIу, давурттан лайкьсса кьимат бишлай, паччахIлугъралгу, официал идарардал дуллунни цимирагу награда, цIарду ва хIурматрал лишанну: «ДР-лул культуралул лайкь хьусса зузала», АьФ-лул культуралул министерствалул ХIурматрал грамота, ДР-лул Президентнал ХIурматрал грамота, ДР-лул Культуралул министерствалул личIи-личIисса давурттахлу дуллусса хIурматрал грамотартту ва бахшишру.
Ххирасса ссурахъил душ!
ЦIуллу баннав ина, циняв вилла даврилгу, творчествалулгу, кулпатралгу чулухуннайсса нижат­ру, уттинин кунна, чумартну ва марцIну дуллан!
Вил ниттил ссурахъу
Аьйша-Разухъал Киров