ДР-лул Шяраваллил хозяйствалул министерствалул прессалул къуллугърал бувсъсса куццуй, ва ведомство луглай бур къюмайтIутIул питомникрал комплекс бансса инвестортурах. Махъсса шиннардий Дагъусттаннай хIарачат буллай бур къюмайтIутIул багъру уттава буккан бан.

2015 шинал Дагъусттаннал хъузалтрал ларсун дур махъсса 30 шинал мутталий къюмайтIутIул яла хъуннамур бакIлахъия – 147,5 азарда тонна.
Уттигъанну Дагъусттаннал аграрийтурал бувну къуртал бунни 627,5 гектарданийсса къюмайтIутIул багъру. 2016 шинал пландалий бур 2070 гектар багъирдал бан, миннувату 1552 гектарданийсса – ссуттил. Ахъулсса шайсса тIутIул багъру бур 17 азарда гектарданий.
КъюмайтIутIул багъру баврихун дахчилай дур республикалий жалгъа бувсса къюмайтIутIул материал дакъашиву.
2014-2020 шиннардийнсса къюмайтIутIул багъру баврил программалий ккаккан бувну бур гьар шинах цIусса къюмайтIутIул багъру буван 2000 гектарданий. Миксса багъру баншиврул аьркинну бур 4,5 млн. бугьансса мурхьру (саженцы), цивппагу сертификация дусса гьаннарал мурхьру. 2020 шинайннин мукунсса мурхьру аьркинни 22,5 млн. Мунияту республикалий чара бакъа аьркинну бур питомникирттал комплекс, жалгъа був­сса мурхьру хIадур баншиврул. Му масъала бур «Мюнпатсса АПК» проектрал пландалуву . Мукун­сса комплекс бан аьркинну дур 525 млн. къуруширттал. Му комплекс баврийну бюхъан тIий бур дянивну лавсун шинал мутталий хIадур буван 5 млн. жалгъа бувсса бугьансса мурхьру, сертификация дусса цила мархри бусса къюмайтIутIул бугьан­сса 2 млн. мурхьру, мукунма щаллу бан гъинтнил чIумуйсса 500-нния ливчусса зузи кIану ва муданмасса 100-лихъайсса зузи кIанттурду. Бюджетравун дучIантIиссар 3,6 млн. къуруширттал 6 шинавату, тIутIул бакIлахъия ласлан бивкIния махъ.