Дагъусттаннал арнил кIанттайсса мукьра райондалул, Ну­гъайнал, Тарумовкаллал, Къизлардал ва Бабаюртуллал, аьрщарайн хъацIру багьну бушиврийн бувну республикалий баян бувну бур тагьар нигьачIийсса душиву.

Зулайхат Тахакьаева
ХъацIру багьну бур Бабаюртуллал кIанттайсса Лакрал райондалул цаппарасса хозяйствардал аьрщарайнгу. Шяраваллил хозяйствалун ца яла хъунма­сса зарал биян байсса зиянчитал цайми хозяйствардал аьрщарайнгу багьаннин, ми бухлаган бансса чаранну ххал бигьлагьисса совещание хьунни вай гьантрай Буршиял къутандалий. Муний гьуртту хьунни Лакрал райондалул администрациялул бакIчинал хъиривчу, экономикалул ва шяраваллил хозяйствалул управлениялул каялувчи Макьсуд Кьадиев, шяраваллил хозяйствалул управлениялул хъунама пишакар Аьлил Аьлилов, «Россельхозцентр» ФГБУ-рал Лакрал райондалул отделданул каялувчи МахIаммад ХIажиев, СПК-рдал хъуними.
МахIаммад ХIажиевлул бувсунни Дагъусттаннал «Россельхозцентрданул» сияхIрайн бувну, уттинин ххалдиргьу­сса 101 азарда гектар аьрщарая хъуцIурдил дуркуну душиву 19 га. Гихуннай тIурча хъацIру багьаврия хъуннасса нигьачIаву ду­сса дур 45 азарда гектарданийсса аьрщаран.
Уттинин ххал дурсса 800 гектарданийсса Лакрал райондалул аьрщарайнгу хъацIру багьну бусса бур сайки дачIиннуйн: ЧIурттащиял хозяйствалий – 50 га., Кьубиял аьрщарай – 100 га., Хьурттал аьрщарай – 100 га., Буршиял аьрщарай – 25 га., Ххюлуссуннал аьрщарай – 50 га.
Ванал бусласимунийн бувну, хьхьичIсса шиннардий хъацI рубухлаган бансса давурттан итабакьлай бивкIхьурча 12-15 млн. къуруширттал, гьашину ккаккан бувну бусса бур бувагу 5 млн.
Аьлил Аьлиловлул СПК-рдал каялувчитурая тIалав бунни, цалла аьрщи ххал дурну, шяраваллил хозяйствалул министерствалийн актру диян дан, хъуцIурдищал талансса техникагу, дарурттугу цила чIумал итабакьиншиврул. Ми даруртту загьру хIаласса бушиву хIисавравун лавсун, дюъ дирхьунни даруртту буллалийни мугъаятну бикIан, пишакартурал инструкциярду кани­хьхьун къабуллуну, цайнува цив­ппа миннулсса къабуллан. Къулагъас дан аьркинссар увкунни даруртту ризкьи бусса кIанттая 500 метралул архну бан. ХъацI кьавкьсса ххалайн къабагьай­сса бухьувкун, анавар буккияра увкунни ххулув цулунгу.
КIицI лавгунни Аграханнал жазиралучIан гъансса Каспий хьхьирил зуманицIухсса аьрщарай хъацI бухлаган бансса давуртту микку ялапар хъанахъисса ЯтIул луттирайн лавсъсса лелу­ххантран зарал къабиянну, хъинну мугъаятну дан багьлай бушиву.
Гихунмай ихтилат бия Да­гъусттаннай ризкьилийнгу ла­хъай азарду ппив (ящур, оьцIалу, надулярный дерматит) хъанай душиврия ва миннуйн къаршисса вакцинарду баврия. Миннуя бувсуна Буршиял СПК-лул хъунаману зузисса гъаттарал хIакин, шяраваллил хозяйствалул элмурдал кандидат Халилов Давудлул.
Муния махъ Макьсуд Кьадиев лавгуна къутаннайсса хозяйствардал ялтту уккан.
ХIакьинусса кьининийн Буршиял къутандалий дурцуну дур 25 тонна люцерналул, 50 гектарданийсса ппиринжрайн дирхьуну дур щин.

Гьашину Лакрал райондалул къутаннайсса хозяйствардал аьмну дургьуну дур 1800 гектар хъунил. Миннува 431га. – ппиринжрал, 400 га – люцерналул (люцерналухь дусса дур ларгсса шиналла дургьусса 566 гектаргу), 750 га. – ца шинай дугьайсса ххяххиярттал, 60 га – шагьнал лачIал, 100 га. – нехълул, 50 га. – лачIал, 19 га. – бахчалул, 10 га. – чимусул.
Райондалул каялувчитурал тIалав дурсса пландалий хъуру дургьуну дусса дур ЧукIуннал, ЧIарттал, КIамахъаллал, Хъурхърал, Кьубиял, ГьунчIукьатIрал, Инишиял, Кумиял.
Шаппай нани ххуллий Макьсуд Кьадиев ивуна Лакрал райондалул ветуправлениялухьсса республикалул купка дай­сса кIанттайн. Шикку гъинтнил лухччайн куч хьуну нанисса Щардал хозяйствалул яттий купка дуллай ия гъаттарал хIакин Эфендиев Саламуттин.